Ekyilyizátes 5 - Bokyi Bible

*Daryí Ocím mú aa*tî*

¹ Kám byiko eyên ké nkéré a-kú a-wâa ng ké kiǐtí-kyise-kyifen-Osówo echi. Nkyi kanong ńkyí adace ányi a-da-kwâa byěm kyi-shwôm ńkyí adachi byifen wǎ eringe nyí enyam-banet ḿbé baa*nyît ńkyí nkyi kanong* ne ńkyí nkyi kyibî* mbe ba-chi i.

² Kabe ne a-raa. *Daryí Osówo ocím mú aa*tî*. Nyǐ mu kyíbóng, wo amu ké esí. Ké bubwô ámbu, *daraa byiraa a-shwôm*.

³ Â amu a-ryú u a-shwôm, a-man n eri byibî-barê, ne â amu a-raa ng a-shwôm, a-man n eraa enyam-kyiraa.

⁴ Ké bubwô ámbu, â amu a-ryí i Osówo ocím, tî kámú babap. Osówo o*fí ne nkéré ne enyam-onet*. Chi ńkyí a/ryí ocím a/fu, wo a-chi i.

⁵ Nkyi kanong ńkyí aa*ryí ocím* kyi-shwôm ńkyí adaryí ocím mú aa*man etî*.

⁶ *Damîng ejá eyên e-chi ǒ a-chi kyibî* eringe nyí adasét [nchi kyifen-Osówo] a/fu, wo a*da/tigi ne a-raa*. Ebóng ńkyí amu a-chi i Osówo ka-sa ǎ ne wo. Ebóng ńkyí amu a-chi i ǎ o-dugi ńkyí a/chi busa ne a-já.

⁷ Nang amu a-ri ng burê nǎ! nang amu a-chi i enyam-bǎmkpóngé nǎ! nang amu a-raa ng kyiraa nǎ! a-man a-shî Osówo.

Dyikpen dyi*da/byí Chwǒm*

⁸ Kyi*dachi kyi-chi ǒ wǎ chwǒm-akat* ké nkéré aa/ri okákárá o-kú o-cít ng banet-kyikpu* o-né ng kámbé ekye ńkyí kyi/já kámbé* o-ryí i kámbé acît*. Onet-bǎmkpóngé-okákárá nang orá mu o-rem m ké busi ḿbú okínkán-onet-bǎmkpóngé-okákárá, ne mbé kángkáng mbe ké busa ḿbú banet bakíri ḿbé mbe kámbé bakínkán ké bǎmkpóngé-okákárá. [

⁹ Nang otu mu o-jêem m busi ké byiryíng efuu.]

¹⁰ Onet mú akpuga nyi a-jê ng ǎ, aa*tigi a-kwárê ǎ*. Â amu a-ryuu ng esang, aa*ba/chi a-já kángkáng byěm ḿbyí amu a-ryuu ng*. Kyi*da/byí chwǒm*.

¹¹ Â a/já esang chwóó, a-já ng to banet chwóó ḿbé badaryí kányí. Mpún eyên o*da/shwôm onyît mú adanyît a/fu, wo amu ne esang*.

¹² Onet mú mu o-chi i bǎmkpóngé, kakíri o-já ng byiryíng ḿbyí odaryí byi-kwárê ǎ, kakíri oo*já*. Nké o-man n ejá bunyîn-dyityém ḿbú odarê burê kanong. Nké onet-esang o-kabe ng byěm chwóó ḿbyí odawaa achi fúú.

¹³ Nyín kyibî-chwǒm ńkyí me nn/ri ké ejíí ńnyín. Banet ba/mû ba/chwon akpuga ba-tî [ké byise ebe,]

¹⁴ ne akpuga ányi a-tánê kángkáng ké chwǒm ńkyí kyi*da/nwa kámbé dyishí* ne chwǒm kyi*da/waa kámbé ńkyí badakye bwǎn ebe*.

¹⁵ Be byimu byi-mîng ng ejíí ńnyín wǎ eringe nyí byi/bê ké nyǐ, abwô ábwo. Nang ké bǎmkpóngé eten kángkáng ḿbé byimu byi-chi i, chwǒm kyi*fí ńkyí byidakúng byi-dim ne nkyí*.

¹⁶ Kyi*da/nwa*. Be byi-dim m wǎ eringe nyí byi/bê. Be byimu byi-chi i bǎmkpóngé byi-kan n byi/fu, byi-kám m bufú, ne byimu byi-já ng ebóng.

¹⁷ Be byi-kyú u akpen eten [ké kyifip ne bafip] ne káryúryú ne kafâ esa ne orwôm.

¹⁸ Nyín ńkyí me nn/ri n/fu, chwǒm ńkyí kyi/nwa kanong kanong ńkyí onet odachi, kyi*da/shwôm aryî eryí ne bato ejwáp ne bunyîn-dyityém ekyú* ké byěm ḿbyí o/chi bǎmkpóngé o-já* ké kaǎkím-dyikpen ńké Osówo oo/kye ǎ* ké nǎ, něen nké dyikpen ńdyí onet dyi/byí.

¹⁹ Â Osówo o/kye onet esang ne byěm, o-mîng ǎ o-kyú ké bunyîn-dyityém ne mbyí, o-kó Osówo asǎma, o-kyú ké bunyîn-dyityém ké byěm ḿbyí o/chi bǎmkpóngé o-já.

²⁰ Ké nǎ, Osówo oo/mîng ǎ o/fu, okyú ké bunyîn-dyityém, nyǐ oo*jang to ekérê kyi-kim ne eringe nyí dyikpen dyi/kímê*.