Ekyilyizátes 4 - Bokyi Bible

¹ Me n/chîtún achi kâng n-ri kángkáng acît nyí mbe ba-ryí i ké ejíí ńnyín. Banet ḿbé mbe ba-cít ng kámbé mbe ba-tii ng bukyû, ne onet o*fí mú odachwáp kámbé*. Onet o*fí mú odachwáp kámbé* ké nǎ, banet ḿbé mbe ba-cít ng kámbé mbe ne busa.

² Orêm mu o-chi i mě ne banet ḿbé baa/kpú. Kyi/nwa ne mbé kyi-shwôm banet ḿbé ba/tôong bakpó.

³ Nké kyi/nwa ne mbé ashí amúmú kyi-shwôm banet ḿbé ba*da/fwon ne kámbé* ḿbé ba*da/ri ne acît eryí nyí mbe ba-ryí i ké ejíí ńnyín*.

⁴ Me nn/kwâa to n-nyît dyishí ńdyí banet mbe ba-chi i bǎmkpóngé ba-fâ busa. Nkyi ké bubwô ḿbú orêm mu o-chi i kámbé ne barî-banet ebe. Nké nkyí kyi*da/byí chwǒm*. Nkyi wǎ bufú ekám.

⁵ Ba/fu, onet o-chi i enyam-onet â o/fút abwô o-kpú esong.

⁶ Kakíri nkyi éné. Nké kyi/nwa ńkyí adakyú ne kaǎnyín ne dyityém chee kyi-shwôm ńkyí adachi bǎmkpóngé kángkáng nkéré abwô amúmú a-kan n eringe nyí adakám bufú.

⁷ Me nn/ri chwǒm kyikíri ké dyikpen ńkyí kyi*da/byí chwǒm*.

⁸ Nyín něen onet mú mu o-kyú u kǎnchí. Nyǐ o*fí ne wǎn* o*fí ne wǎn-boné*. Nang ké nkyi éné, nyǐ kángkáng nkéré mu o-chi i bǎmkpóngé. Esang nyí mu ne nyǐ ee*kwárê ǎ*. Nyǐ mu o-chi i bǎmkpóngé ḿbén o-fâ busa o-tî yeě, o-né ng enyam-byiko emen bunyîn-dyityém ekye o-tî yeě. Ńkyín to kyi*da/byí chwǒm*. Nkyi dyikpen ekyú ké bafip.

⁹ Banet bafee ba-nwa ng ba-shwôm onet obónge, ké nǎ, mbé ashí afee cibicibi ba-man n echi bǎmkpóngé kanong kanong.

¹⁰ Â onet obónge ké burwám ebe ashí afee o/myii, óbe o-chwáp ng ǎ o-bûu. Nké â onet mu kǎnchí ne o-myii, kyi/bên kyi-shwôm, ké nǎ, onet o*fí mú oda ǎ echwáp*.

¹¹ Â dyibyi ndyi dyi-nwa ng banet ashí afee, ba-man n erí kyikit kyibónge ba-kám barî kiinsóngé, nké kiinsóngé kyi-cen n nǎ ne kyi-kám ǒ â a/rí kǎnchí.

¹² Banet ashí afee ba-man n ekpógê bunwa ḿbú badakpógê onet kǎnchí. Orí mú ba/muu kámú ne byiká-orí byichât o-sóng ng ekét.

^13-14 Onet o-man n efím ké kyikpu o-firi otu mú oshê emen. Kakíri o-fím m ké mgbokobá o-firi ké kakyúng-butu. Nké â ké bukâa emen nyǐ mu enyam o-shwôm mú oo*jwo bacê* nyǐ o*da/shwôm wǎ-kyisat* mú mu kyikpu* nké mu ne bubong.

¹⁵ Me n/kabe kyi-kim ne kángkáng banet ḿbé mbe ba-kyú u ké ejíí ńnyín. Ne n/ri n/fu, wǎn-kyisat mu kô mú o/chi o-kúng kyikit ńkyí otu.

¹⁶ Nang bunyerenyere bu*fí ké ocím-banet ḿbé otu odatún*. Ké nkéré nyǐ o*fí to* onet o*fí mú o/chi o-kó ǎ asǎma ké ńkyí nyǐ oo/chi*. Ńkyín kyi*da/byí chwǒm*. Nkyi wǎ bufú ekám.