Ekyilyizátes 1 - Bokyi Bible

Dyikpen dyi*da/byí Chwǒm*

¹ Nyín byiraa ḿbyí onet mú o/kwâa byinyídíng, mú wǎn-Otu Dívit, mú o/mû otu ké Jerúsélem.

² Nyǐ mú mu ne bubong o/fu, dyikpen dyi*da/byí chwǒm*. Dyi*da/byí chwǒm* dyi*da/byí chwǒm nang onyin*.

³ Ebóng mpún mú onet odaryí ké kángkáng bǎmkpóngé ḿbé mu o-chi i ké dyikpen emen.

⁴ Ḿbé bafwǒn mbe ba-fwon n, ḿbé bakpúú mbe ba-kpú u, nké ejíí e*fí e-yángê e*.

⁵ Óbyísû o/tôong o-byí i ne o/tôong o-ríbî ng, o-shwôm m babap o-jâ ké kyikit ńkyí o/chi o-chîbyí.

⁶ Afú nyi a-tugi ng a-jâ bushûyû, a-tugi ng a-jâ busyísen, a-tugi ng a-bírî ng.

⁷ Kace nang kará nke ka-sen n ka-jâ ké baya ḿbé baryên, nké baya ba*fí ba-sú u*. Omu mú baya o-chî ng ebwa esim ké kyikit ńkyí kace kadabyí ka-chîsen ka-jâ ké baya. [

⁸ Kángkáng byěm] byi-cen n ne kyikyee, kyikyee ńkyí onet oo*man esét*. Achi eten aa*tigi a-man eri byěm byi-kwárê kányí*. Atông eten aa*tigi a-man ejwo byěm byi-kwárê kányí*.

⁹ Ńkyí kyi/mû kii/chi kyi/chi kyi-chîchi. Ńkyí ba/mû baa/chi ba-chî ng echi kánkyí. Chwǒm kyi*fí nang kyibónge ké ejíí ńkyí kyi/mû kyi*da/chi ne*.

¹⁰ Chwǒm nkyi nang kyibónge dí, ńkyí banet mbe ba-raa ng ba/fu, ri n̂g, ńkyín kyi/mû kyi*da/chi ne*? Aa*wááng*. Kyi/mû kii/chi kpáá ne ba-kû bě efwon.

¹¹ Onet o*fí mú odazîim ńkyí kii/chi ké nkéré mú o/shwôm ké esim*. Onet to o*fí ké nkéré mú mu o/bâ ké kashú mú o/chi o-zîim ńkyí nkyi kyi-chi i ké nkéré mún*.

Byěm ḿbyí Onet-Bubong oo/kwâa

¹² Me onet mú n/kwâa byinyídíng nn/kyú otu mú banet-Ézerel ké Jerúsélem.

¹³ Me n/tî dyityém ejí n/fu, m-kpúrî ng n-kwâa kángkáng byěm ḿbyí mbe ba-chi i ké ejíí ńnyín. Osówo oo/tî bě bǎmkpóngé ḿbé ba*fí ne bunyîn-dyityém*.

¹⁴ Me nn/ri kángkáng byěm ḿbyí banet mbe ba-chi i ké ejíí ńnyín, ne mu n-sét ng běn n/fu, mbyí kángkáng byi*da/byí chwǒm*. Mbyi wǎ onet mú mu o-kan n bufú ekám.

¹⁵ Onet oo*man enabe chwǒm ńkyí nkyi nyibínyibí*. Onet oo*man epan byěm ḿbyí byi*fí ányi*.

¹⁶ Me n/sét byiko ejí n/fu, me n/firi kiǐtí-onet ne me mu ne bubong n-shwôm nang yeě mú o/mû otu mú Jerúsélem kpáá. Me mu n-nyît ng ké ntûntû eringe nyí bubong ne byinyídíng mbyi.

¹⁷ Me m/mû nn/tî dyityém n/fu, n-kwâa ng eringe byinyídíng ne enyam eróng byi/yángê ne barî, ne eringe bubong ne kyifún byi/yángê to. Nké me n/ri n/fu, nkyi éné wǎ mu n-kan n bufú ekám.

¹⁸ Ké nǎ, bubong ejá chwóó bu-cen n ne ékyíkéré ké dyityém, ne byinyídíng ejá chwóó byi-cen n ne bafip ekyú.