Efyíshan 6 - Bokyi Bible

Bwǎn ne Banchí ne Bané Ebe

¹ Bwǎn, nkyi bǎmkpóngé enen wǎ banet ḿbé ba/bángê ké Karâs ńkyí badakye banchí ne bané enen ofê, ké nǎ, ńkyín nké nkyi ochíchí-chwǒm mú badachi.

² Kye n̂g ńchân ne ńnân ofê nké nkyi mbwôp kashú-kyije ńkyí Osówo o/sû ocím mú nyǐ o/ryí,

³ eringe nyí kángkáng byěm byi/chi byi-nwa byi-kye běn, ne ba-ryí dyikpen.

⁴ Banchí ne bané, *da n̂g etî bwǎn enen ké bukwóp ḿbú badachi kámbé ba-sa dyityém*. Nké tángê ê kámbé dyishí ne bacê ké bukwóp ḿbú banet ḿbé ba/bángê ké Karâs.

Kyi-kim ne Básóng ne Banchí Ebe

⁵ Básóng, chi n̂g ne bushî ne banê ńkyí banchí enen ḿbé mbe ne enyam-byiko ba/sét běn ba/fu, ben bachi. Chi n̂g kánkyí ne dyityém ńdyí degere, éné wǎ ben bamu ba-chi i ńkyí Karâs.

⁶ Chi n̂g ńkyín, *chí ké nkéré mú mbé mbe ba-tún n běn nké nke* eringe nyí mbé bada běn ekpee*. Nké chi n̂g ńkyí Osówo mu o-ryuu ng ne dyityém enen kángkáng wǎ básóng ḿbé Karâs.

⁷ Chi n̂g bǎmkpóngé enen wǎ básóng ne bunyîn-dyityém, éné wǎ ben bamu ba-chi i ḿbé Otu Kyítá, *chí ḿbé banet*.

⁸ Zîim m̂ ba/fu, Osówo o-kyâ nang yeě eyáré ké bǎmkpóngé ḿbé banong ḿbé onet ámu mu o-chi i, nang mu ósóng nang o*fí ósóng*.

⁹ Banchí, tún n̂ básóng enen ké dyizong-édúú ebónge, ba-mîng kámbé achi epii. Zîim m̂ ba/fu, ben ne básóng enen ba/já Bonchí obónge mú mu kyíbóng, mú mu o-pan n kángkáng banet mpan acît oo*ryí*.

Byidóng-Byití Byimúmú ḿbyí Osówo mu o-kyâ Bě

¹⁰ Ké nkuli kyikû, fé n̂g busa enen ké ocibi ne Otu Kyítá ne ké bubwô ḿbú kiǐtí-busa emen.

¹¹ Fé n̂g kángkáng byidóng-byití ké byiko ḿbyí Osówo mu o-kyâ běn, eringe nyí badaman enwa ne boǒbî-byinyídíng ḿbú Otu-Byibî-Barím.

¹² Ké ebóng, be byi*fí byi-nwa ng ne banet* nké byimu byi-nwa ng ne busa ḿbú byibî-bací ḿbyí mbyi kyíbóng ne byibî-barím ne busa-bakye ne kángkáng byibî-busa ḿbú nkéré mún mú kyifip.

¹³ Ké bubwô ámbu kâng, kántîk, yip n̂g byidóng-byití ḿbyí Osówo mu o-kyâ běn. Eringe ké nkéré mú kyibî-dyicí oo/fyi, ben ba/chi ba-man ebwom ké bunwa ḿbú onet-bushwôn, ne ké nkéré mú baa/nwa ba-ribi ké dyishí, ben ba/chi ba-bwom kíngkíng.

¹⁴ Ké bubwô ámbu, kpá n̂g byiko. Kyú n̂g ne ntûntû wǎ emâp nyí ben badasît ké osín. Fé n̂g kanong echi ńké Osówo wǎ nkyû-byití,

¹⁵ ne ké byiko ekpá ḿbyí badasét Bǎmpém ḿbé Banong ḿbé bunyîn-dyityém wǎ ékpúkput nyí abe-byiká enen.

¹⁶ Kángkáng nkéré, níbî n̂g dyityém enen ńdyí ba/fé ne Karâs wǎ kiinku byiko. Ne dyityém enen ándyi, abán nyí Otu-Byibî-Barím mu o-châ aa*man běn eta*.

¹⁷ Koo n̂g to onyii mú Osówo wǎ etam-byití ne byiraa-Osówo wǎ kashwám-byití ńké Busun-Osówo mbu bu-kyâ běn.

¹⁸ Chi n̂g ńkyín kángkáng ne nshwam efé, ba-bí ng ochwâp mú Osówo. Fé n̂g nshwam ké nkéré nang orá wǎ eringe Busun-Osówo mbu bu-tông ng běn bukwóp. Ké bubwô ḿbún, kpá n̂g byiko kángkáng nkéré. *Da n̂g ezú abwô*. Fé n̂g nshwam kángkáng nkéré ba-kye Osówo ké dyishí kángkáng banet-Osówo.

¹⁹ Ne fé n̂g nshwam to ba-kye Osówo ké dyishí ejí, eringe Osówo o/chi o-kye mě kyitwóm ké nkéré mú me mm/kpá byiko ḿbyí ndaraa, eringe ndaraa nang onet nn*shî* ne n-chi banet ba-nyît Bǎmpém ḿbé Banong ḿbé mbe Osówo ké dyityém.

²⁰ Ké dyishí-Bǎmpém ḿbén, me mu onet mú ba/twóm ǎ, nang ké m/bwa n-firi ké mgbokobá kántîk. Fé n̂g nshwam, eringe ndaraa kyi-kim ne nkyí, onet nn*shî* wǎ eringe nyí ndaman n-raa.

Nkuli Kyikû-Kyiraa eta

²¹ Tyíkyíkus mú wǎn-boné eten mú dyityém, ne ḿgbán to mú o/fé dyityém emen ké bǎmkpóngé ḿbé Otu Kyítá, o/chi o-sét běn kángkáng bǎmpém kyi-kim ne me, eringe nyí ben badanyît eringe nyí me mu n-câ kashú ne bǎmkpóngé.

²² Bubwô ámbu nké me mu n-twóm m ǎ o-kâm běn n/fu, oba-sét běn eringe nyí be kángkáng byimu byi-câ kashú, ne ké bubwô ámbu, o/chi o-fé atyém enen busa.

²³ Kyi/bát Osówo Bonchí eten ne Jisos Karâs, Otu Kyítá bakye kángkáng bwǎn-bané eten bunyîn-dyityém ne kyijé ne dyityém efé ne Osówo.

²⁴ Kyi/bát ochwâp mú Osówo okyú ne kángkáng banet ḿbé Jisos Karâs, Otu Kyítá eten mu o-jê ng kámbé ne kyijé ńkyí kii*man*.