Efyíshan 5 - Bokyi Bible

Dyikpen ekyú ké Kiinwángé

¹ Ké eringe nyí ben bamu bwǎn-dyityém-Osówo, ba-man ba-kan ekûkyú dyikpen to wǎ nyǐ.

² Akpen enen a-man a-kyú ké bubwô ḿbú kyijé ne barî-banet wǎ eringe nyí be byi/jê Karâs ne o-kye kyitông emen ké dyishí eten wǎ eyáré nyí kyifen echi nyí edanyîn kyinung ne kyifen to ńkyí kyidanyîn Osówo dyityém.

³ Ké bubwô ḿbú ben bamu banet-Osówo, kyi*da/nwa ńkyí ben badakûraa nang kaǎchwóm ne barî kyi-kim ne byibî-byěm echi* nang kyi-kim ne karíng erí ne banet byiryibyiryi* nang ne byěm eshwam*.

⁴ Nang byiraa-babép ne enyam-byiraa ne byibî-byiraa byi*da/kwárê ḿbyí ben badaraa*. Nké kû n̂g ekó Osówo asǎma.

⁵ Nyît n̂g ńkyín ké ntûntû ba/fu, onet mú mu o-chi i byibî-byěm, o-rí i ne banet byiryibyiryi, ne o-shwam m byěm o*fí nang obónge* mú o/chi o-já mpât ké Butu ḿbú Karâs ne Osówo ne banyá*. Ké nǎ, â wo amu a-shwam m byěm, ányi kyi/byí, amu a-kyâ byěm ofê a-shwôm Osówo oyén.

⁶ *Da n̂g ebángê onet nang obónge o-yip enyam-byiraa o-nîm běn*. Ké nǎ, ochíchí-byěm ḿbyín nké busa-dyityém Osówo bu/chi bu-bâ bu-kâm banet ḿbé ba*fí ba-chi i ńkyí o/fu, bachi*.

⁷ Ké bubwô ámbu, *da n̂g ekyú ne chwǒm ńkyí badachi kyi-kim ne azong-banet ányi*.

⁸ Ké nǎ, ben to ké byiko enen ba/mû ké kyifip. Nké ké ben ba/firi banet ḿbé Otu Kyítá, ben ba/firi ké kiinwángé. Ben ba-man ba-kyú kâng ké dyikpen ńdyí banet ḿbé mbe ké kiinwángé.

⁹ Ké ebóng, kiinwángé nké kyidacen ne kángkáng byěm enwa ne kanong echi ké bushú ḿbú Osówo ne ntûntû esét.

¹⁰ Kû n̂g ekan ekwâa byěm echi ḿbyí byidanyîn Otu Kyítá dyityém.

¹¹ *Da n̂g ekûfé abwô enen ké byěm ḿbyí byi*da/byí chwǒm* ḿbyí banet ḿbé mbe ké kyifip mbe ba-chi i*. Nké fîm m̂ kámbyí ba-tî ké kiinwángé.

¹² Kyi-chi i ne éshwân eraa kyi-kim ne byěm ḿbyí mbé mbe ba-chi i ké kadip.

¹³ Nké ké nkéré mú kángkáng byěm byi/firi ké kiinwángé, ányi kâng nké ochíchí-kafâ-byěm ámbyi odabyí kyíjí gbúúl.

¹⁴ Ké ebóng, nang ebóng chwǒm nké kii/byí kyíjí gbúúl, chwǒm ánkyi kyi-firi ng kiinwángé. Nkyí nké ba/raa ba/fu, bûu nensang, ǎ nrê burê, a-jwóbê to ké bukyû, ne Karâs o/chi o-kû ǒ esan ké byiko.

¹⁵ Ké bubwô ámbu, kû n̂g ebám akpen enen kanong kanong. *Da n̂g echi ba-kûtî akpen enen wǎ banet ḿbé ba*fí ba-nyît ng chwǒm*. Nké tî n̂g kányí wǎ banet ḿbé mbe ne byinyídíng.

¹⁶ Nang ebóng mpât mú ben ba/já, mú badachi chwǒm, chi n̂g kánkyí ké bukwóp ḿbú bunong. Ké ebóng, ací ńnyín něen a-chi i byibî-ací.

¹⁷ *Da n̂g echi ba-firi enyam-banet*. Nké kan n̂ ekyé kyikû ba-nyît kyi-kim ne ńkyí Otu Kyítá mu o-ryuu ng o/fu, ben bachi.

¹⁸ *Da n̂g ekûjwáp bato chwóó ḿbé bada běn ebwóm* ḿbé badabên enyam-byiko enen*. Nké Busun-Osówo busú běn ké enyam-byiko.

¹⁹ Kû n̂g ekwán kángkáng azong-ekwan-ékwâbashi nyí Karâs ne barî-banet. Kwán n̂ ekwan ba-kye Otu Kyítá ne akpee ké atyém enen.

²⁰ Kángkáng nkéré, kû n̂g ekó Osówo Bonchí eten asǎma ké kángkáng byěm, ké dyizîn ńdyí Jisos Karâs, Otu Kyítá eten.

Batyép ne Banyi

²¹ Jwâa n̂g byiko enen kyísí ba-kye barî ké bubwô-ofê enen mú bamu ba-fâ Jisos Karâs.

²² Banyi, jwâa n̂g byiko enen kyísí ba-kye batyép enen wǎ eringe nyí bamu ba-jwâa ng ba-kyâ Otu Kyítá.

²³ Ké ebóng, otyép nké mu ne busa o-shwôm onyi wǎ eringe nyí Karâs mu ne busa o-shwôm banet ḿbé mbe ba-fâ atyém ebe ne nyǐ. Ne Karâs to ké kakim emen nké mu Onet-Onyii mú banet ḿbé ba/fé atyém ebe ne nyǐ. Banet ámbe ba/bwom wǎ enyam-byiko emen.

²⁴ Nké ké bubwô ámbu, banyi ba-man ba-jwâa byiko ebe kyísí byiká ne abwô ba-kye batyép ebe wǎ eringe nyí banet ḿbé mbe ba-fâ atyém ebe ne Karâs mbe ba-jwâa ng byiko ebe kyísí ba-kyâ ǎ.

²⁵ Batyép, banyi enen bakû běn ejê wǎ eringe nyí banet-ékwâbashi nyí Karâs ba/jê ǎ, ne o-kye kyitông emen ké ashí ebe.

²⁶ Nyǐ o/chi ńkyín, eringe nyí odakúng banet ámbe o-kye Osówo, ányi oo/bwóp kpá kashú ké ejá emen, o-soo kámbé ké omu ba-cé.

²⁷ Eringe nyí odakúng kámbé o-kye byiko emen ne bunong ebe ne atyém kpárám, nang kaǎnyín-ébîn kaa*kyú* nang dyikpât dii*chi* nang enyáp ké byiko ee*chi* nang chwǒm to kyikíri ńkyí kyi*fí kanong* kii*kyú*.

²⁸ Batyép ba-man ba-kyú ne kyijé ne banyi ebe wǎ eringe nyí enyam-byiko nyí ebe nyi e-nyîn n kámbé. Otyép mú onyi emen mu o-jê ng ǎ, ányi kyi/byí, byiko ḿbyí emen nyǐ oyén nké mbyi byi-jê ng ǎ.

²⁹ Onet nang obónge o*fí mú enyam-byiko emen ee*nyîn ǎ*. Nké oyén o-nen n kányí, ne o-tún n to kányí kanong kanong wǎ eringe nyí Karâs mu o-chi i to ne banet-ékwâbashi nyí emen.

³⁰ Ké ebóng, be byi-chi i byipang-enyam-byiko ḿbyí Karâs.

³¹ Wǎ eringe nyí ejá-Osówo nyí ba/sáng kyísí e/fu, ké bubwô ḿbún, onyinchéng o-mîng ng bonchí ne boné, o-da-cibi kyikit kyibónge ne onyi emen, ne mbé ashí afee ba-firi wǎ onet obónge.

³² Kyikit-ejá-Osówo nyí ba/sáng kyísí ńkyín kyi/tông kiǐtí-ntûntû wááng, ne me mu n-nyît ng n/fu, kyi/raa kyi-kim ne Karâs ne banet-ékwâbashi nyí emen.

³³ Nké ńkyín kyi/ta běn to. Otyép nang orá o-man o-kyú ne kyijé ne onyi emen wǎ eringe enyam-byiko emen nyi e-nyîn n ǎ. Nké onyi to nang orá o-man o-kye otyép emen ofê.