Efyíshan 4 - Bokyi Bible

Ncibi mú Enyam-Byiko nyí Karâs Kyikit Kyibónge

¹ Me, ké bubwô ámbu kâng, mú mu onet-mgbokobá ké dyishí-Otu Kyítá, mu n-tîm m běn arông n/fu, kyú n̂g dyikpen ńdyí dyi/kwárê, ne eringe Osówo o/tî kándyí ké nkéré nyǐ o/kó běn.

² Tî n̂g byiko enen kyísí, ba-kyú degere ne dyityém chee kángkáng nkéré. Kû n̂g etông kyijé enen ké barî echwáp.

³ Kan n̂ byiko enen, eringe nyí badatî ncibi mú Busun-Osówo mbu bu-kyâ běn ké bunyîn-dyityém ḿbú mbu bu-cibi ng běn kyikit kyibónge.

⁴ Enyam-byiko nyí Karâs nyi ebónge ne Busun-Osówo mbu to bubónge, wǎ eringe nyí achi etî nyí Osówo o/kye běn ké nkéré mú nyǐ o/kó běn nyi abónge.

⁵ Otu Kyítá mu obónge. Dyityém efé ne Karâs ndyi dyibónge. Osoo mú Osówo mu obónge.

⁶ Osówo mu obónge, ne mu Bonchí mú kángkáng banet, ne Otu Kyítá to mú kángkáng byěm, ne mu o-chi i bǎmkpóngé ké atyém nyí kángkáng banet, ne mu ké atyém nyí kángkáng banet to.

⁷ Nké Karâs oo/kye nang yeě nang yeě eyáré emen kerededet wǎ eringe nyí Karâs mu ne nyǐ chwóó.

⁸ Wǎ eringe nyí ejá-Osówo nyí ba/sáng kyísí e/sét e/fu, ké nkéré nyǐ o/yú o-jâ kyíbóng, nyǐ o/kpî básóng chwóó ba-dim ne nyǐ. Nyǐ o/kye banet eyáré.

⁹ Nké nyǐ o/jé kyíbóng, ányi kyi/byí nǎ. Kyi/byí kyi/fu, ké mbwôp kashú, nyǐ o/shû o-ca kyísí, ányi ké oshê-bakúsí.

¹⁰ Ké bubwô ámbu, nyǐ mú o/shû o-ca kyísí nké mu nyǐ to obónge mú o/yú o-jâ kyíbóng kyíbóng o-shwôm bubóng, eringe nyí kángkáng byěm byida ǎ ekye ofê.

¹¹ Kyi/mû nyǐ nké o/kye banet eyáré. Nyǐ o/cá banet bakíri o/fu, bakyú banet-kyitwóm emen, bakíri bakyú bamkpábé ḿbé badasét byiraa-Osówo, bakíri bakyú bansêt byiraa-Osówo, bakíri bakyú bambâm ebû nyí Osówo ne bantánge byiraa-Osówo.

¹² Nyǐ o/chi ńkyín, eringe nyí odakpá kángkáng banet-Osówo byiko ké bǎmkpóngé ḿbé banet ḿbé ba/bángê ne Karâs, akîm ba-nap enyam-byiko nyí Karâs.

¹³ Ne ké bubwô ámbu, be byi/chi byi-bâ kyikit kyibónge ké ncibi obónge, ké dyityém eten ńdyí byi/fé ne Karâs, ne ké onyît eten mú byimu byi-nyît ng Wǎn mú Osówo. Be byi/chi byi-firi banet ḿbé baa/kán ké dyityém ba-ribi jangjang ne Karâs oyén.

¹⁴ Be bii*ba/chi byi-chîkyú kâng wǎ bwǎsíng* ḿbé kace ńké kadanáng kadayip kámbé* ne kángkáng afú nyí nyi a-fím m ké otánge mú bannîm banet* ḿbé ké boǒnyídíng ebe ḿbú mbe ba-nyît ng, ba-tín n banet bakíri ba-fé ké byibî-okabe.

¹⁵ Nké, ké ntûntû echi ne dyityém ńdyí kyijé, be byi/chi byi-kán ké kángkáng akwóp byi-kâm Karâs mú mu onet-dyishí.

¹⁶ Ké bubwô emen, kángkáng acit nyí enyam-byiko emen a-níbî ng enyam-byiko emúmú kyikit kyibónge. Ké bubwô ámbu, enyam-byiko emúmú e-kán n, ne e-nap ng byiko emen ké bubwô-kyijé, â kyipang-enyam-byiko nang kyirá nkyi kyi-chi i bǎmkpóngé emen kanong.

Dyikpen ńdyí Dyifyîfî ekyú ne Karâs

¹⁷ Ké bubwô ḿbú Otu Kyítá kâng nké me mu n-sét ng běn ńkyín wǎ bacê n/fu, ben *da n̂g echîkyú ké dyikpen wǎ banet ḿbé ba*fí ba-fâ atyém ebe ne Karâs* ḿbé ekabe ebe ee*byí chwǒm*

¹⁸ ne atyém ebe to nyi ké kyifip. Mbé ba*fí nang ne kaǎnyín-dyikpen ńdyí Osówo mu o-kyâ*. Ké ebóng, mbé ba*fí ba-nyît ng nang kaǎnyín-chwǒm kyi-kim ne ndyí* ne mbe ba-shwane e to ashí.

¹⁹ Mbé ḿbé ba*fí to ne éshwân ké bushú*. Baa/kúng byiko ebe kángkáng ba-kye ké karíng erí ne banet byiryibyiryi, ba-chi i to byibî-acáá nang byiko baa*kám*.

²⁰ *Chí éné nké ben ba/mû ba/kwâa kyi-kim ne Karâs*.

²¹ Nké ben ntûntû ba/mû ba/jwo kyi-kim ne nyǐ, ne ben, wǎ banet ḿbé bamu ba-cen n ne Karâs ké kyikû, nyǐ o/mû oo/tángê běn ntûntû mú emen.

²² Nké zú n̂g atyém enen nyí kpákpá, nyí nyi a-chi i běn ba/tôong ba-kyú u wǎ eringe nyí ba/mû. Atyém ányi nyi a-chi i běn ba-chi i byibî-byěm ḿbyí byida běn ecen ne bukyû ekpú ba-câ kashú.

²³ Ben ba-man ba-yángê atyém enen ne okabe enen kángkáng byi-firi ḿbyí byifyîfî.

²⁴ Ba-man ba-kyú ne atyém nyí afyîfî, nyí Osówo o/kye běn ké obî mú emen. Atyém ányi a-man a-kûtông kyíjí wááng ké bukwóp ḿbú dyikpen ńdyí dyi/kwárê ekyú, ńdyí ndyi dángdáng ne kanong kanong.

²⁵ Kyisédéng kyi*dachîkyú kâng*. Nang yeě o-man o-sét orî-onet ntûntû, ké nǎ, be kángkáng byimu byipang-enyam-byiko ké enyam-byiko nyí Karâs.

²⁶ Â kafâ ka-kú ka-sa ng běn, *da n̂g ebángê kafâ esa enen ánke ka-chi běn ba-nung ké byibî* ne *da n̂g ewaa ké kafâ esa ké kyirim-dyicí kyimúmú*.

²⁷ *Da n̂g ekye Otu-Byibî-Barím mpât*.

²⁸ Onet mú mu o-jii ng o-man o-mîng kajii o-kpet bǎmkpóngé echi, eringe nyí odajá chwǒm ńkyí kyinong ńkyí dyikpen emen, ne eringe nyí nyǐ odakûman echwáp banet-kyikpu.

²⁹ *Da n̂g ebángê byibî-byiraa byi-byí běn ké ocím*. Raa n̂g byiraa ḿbyí byidachwáp, ḿbyí byidanap ne ḿbyí byidatyeem, eringe ńkyí ben badafu kyi/chi kyi-chi kanong kyi-kye banet ḿbé mbe ba-jwo ng běn.

³⁰ Ne *da n̂g echi ba-chi Busun-Osówo bu-firi ké bafip*. Ké ebóng, Busun-Osówo nké mbu ekap nyí nyi e-tông ng e/fu, ben Osówo nké o/já běn, ne mbú to nké bu/bwom wǎ chwǒm ńkyí nkyi kyi-tông ng ntûntû kyi/fu, dyicí ndyi dyi-bâ ńdyí nyǐ o/chi o-chi běn ba-fem ké byibî.

³¹ Mîng n̂g dyityém esa ne kiikuku echi ne kafâ esa. *Da n̂g echînyán barî-banet* nang barî-banet edángé ekye*. Mîng n̂g kángkáng azong-kafâ esa.

³² Nké kû n̂g ecángê dyityém ba-kyú to ne dyityém ńdyí dyinong ne barî-banet. Pwoo n̂g to barî-banet wǎ eringe nyí Osówo oo/pwoo běn ké bubwô-Karâs.