Efyíshan 2 - Bokyi Bible

Osówo o/jwóbê Bě ké Bukyû byi-bwa ké Dyikpen

¹ Ké nkéré mú o/shwôm ké esim, ben ḿbé ba*fí banet-Jûs* ba/mû baa/kpú ké basun, ké bubwô-byibî enen ne ofê mú o*fí běn*.

² Ké nkéré ámu, ben ba/mû ba-chi i byěm ké kyibî-bukwóp ḿbú ejíí. Ben ba/mû ba-chi i ńkyí otu mú byibî-bací ḿbé mbe ké bufú o/fu, bachi. Otu mú byibî-bací ámu mú mu ne busa kántîk ne banet ḿbé ba*fí ba-chi i ńkyí Osówo o/fu, bachi*.

³ Ké ntûntû, be banet-Jûs ashí amúmú byi/mû wǎ mbé, ne byi/mû byi-kyú u wǎ eringe nyí enyam-byiko eten nyi e-ryuu ng, ne byi/chi ńkyí kyi/kwárê enyam-byiko eten ne atyém eten. Wǎ eringe nyí nang yeě nang yeě mu, be to wǎ banet byi/mû byi-man byi-ri busông ḿbú kafâ esa ńké Osówo.

⁴ Nké bafip ḿbé Osówo mu o-ri ng bě ba/jê kanong kanong, ne kyijé emen ńkyí mu o-tông ng bě kyi/jê to kanong kanong,

⁵ ḿbyí nang ké nkéré mú byi/mû bii/kpú ké basun, ké byěm ḿbyí Osówo mu o-ryuu ng ḿbyí byi/mû byi*fí byi-chi i* nyǐ o/jwóbê bě byi-bwa ké dyikpen ne Karâs. Nkyi ké ochwâp mú Osówo nké nyǐ oo/nyii běn.

⁶ Ké ocibi eten ne Jisos Karâs, Osówo oo/jwóbê bě ne nyǐ, ne o-kúng bě butu kyíbóng.

⁷ Nyǐ o/chi ńkyín, eringe nyí odatông ké kángkáng nkéré mú mu o-bâ efang nyí ochwâp emen nyí ee*nwa eri* ké kyijé ńkyí nyǐ oo/tông bě ké Jisos Karâs.

⁸ Ké ebóng, ké bubwô-ochwâp mú Osówo nké nyǐ oo/nyii běn ké bubwô-dyityém efé ne Karâs. *Chí ben bayén nké ba/chi kánkyí* nké eyáré nyí Osówo.

⁹ Chwǒm kyi*fí nyín ńkyí ben badatyem bubwô ké kakim* ké nǎ, kyi*da/fím ké bubwô-busa enen efé*.

¹⁰ Osówo nké o/chi bě. Ne ké ocibi eten ne Jisos Karâs, nyǐ o/chi bě o-tî ké dyikpen ńdyí bǎmkpóngé ḿbé banong echi, ḿbé nyǐ oo/nap kyikû ké esim o-tî bě o/fu, be byichi.

Ncibi Obónge ké Karâs

¹¹ Ben mú ba*fí banet-Jûs ké enyam-byiko* banet-Jûs ba-kó ng běn banet ḿbé baa*cên* ḿbé mbe ba-kó ng byiko ebe banet ḿbé mbe ba-cên n, ké ebóng, mbé ba-chi i kánkyí ké enyam-byiko ebe. Zîim m̂ eringe nyí ba/mû ké nkéré mú o/shwôm ké esim.

¹² Ké nkéré ámu, ben ba/mû ba*fí fáráng ne Karâs*. Ben ba/mû bacinbánet, ne ba/mû ba*fí ké burwám ḿbú banet ḿbé Osówo o/cá kámbé*. Osem mú Osówo o/sem byiko emen chwóó, mú o/jêem busi ké ocím mú o/ryí banet emen, o/mû o*da/kim ne ben*. Ben ba/mû ba-kyú u ké ejíí ńnyín, achi etî a*fí běn* ne Osówo to o*fí běn*.

¹³ Nké kántîk, ké ocibi ne Jisos Karâs, ben mú ba/mû ba*fí fáráng* bukyû ḿbú Karâs boo/bê ne ben fáráng.

¹⁴ Ké nǎ, Karâs oyén oo/bê bě ne bunyîn-dyityém ké bubwô ḿbú o/chi banet-Jûs ne banet ḿbé ba*fí banet-Jûs* ba-firi banet babónge. Ne ké enyam-byiko emen ekye, nyǐ o/bú ekpe nyí e/mû e/pap kámbé e-tî kámbé banet-ociring.

¹⁵ Nyǐ o/byiryi byije ḿbyí banet-Jûs ne busa ḿbú byije ámbyi, eringe nyí odachi byikim-banet ámbyi byifee ba-firi banet babónge ḿbé bafyîfî ké ocibi ne nyǐ oyén, ne ké bukwóp ḿbún o/chi bunyîn-dyityém.

¹⁶ Karâs o/bên ociring ámu ké bubwô-bukyû emen ké kyikwap ńkyí badashwân onet, ne ké bubwô-kyikwap ánkyi, nyǐ o/cibi byikim-banet ámbyi ké enyam-byiko ebónge, ne o-bwa ne mbé esim ba-kâm Osówo.

¹⁷ Ne Karâs o/bê, o-pem kángkáng banet Bǎmpém ḿbé Banong ḿbé bunyîn-dyityém. O/pem běn ben mú ba*fí banet-Jûs* ḿbé ba/mû ba*fí fáráng ne Osówo*. O/pem to banet-Jûs ḿbé ba/mû fáráng ne nyǐ.

¹⁸ Nyǐ ké bubwô-Karâs nké be kángkáng, banet-Jûs ne ḿbé ba*fí banet-Jûs* byi-kú byi-man n ebê ké Busun-Osówo ámbu bubónge, ké bushú ḿbú Bonchí eten mú mu kyíbóng.

¹⁹ Ké bubwô ámbu kâng, ben banet ḿbé ba*fí banet-Jûs* ba*fí to bacinbánet*. Ben kántîk ba/firi ké burwám-bayén-oshê ne banet-Osówo, ne banet ké kyikû-banet ńkyí Osówo.

²⁰ Ben to bamu wǎ ekpí-ecing nyí Osówo mu o-kúng ng běn o-bi ké kyikû-ekpe ńkyí banet-kyitwóm-Jisos ne bamkpábé ḿbé badasét byiraa-Osówo. Ochíchí-okpí-ecing mú kángkáng ekpí-ecing nyí áku nyi e-jêem m esim ké mǔ, ányi Jisos Karâs oyén.

²¹ Nyǐ nké mu onet mú mu o-níbî ng kyise kyimúmú kyikit kyibónge, ne mu o-chi i kánkyí kyi-câ kashú kyi-firi kiǐtí-kyise-kyifen-Osówo echi ńkyí kyi/já Otu Kyítá.

²² Ben to ké ocibi ne nyǐ, Osówo mu o-bi ng běn ba-firi kyise kyibónge ne banet ḿbé áku kángkáng, ńkyí Osówo odakyú ké nkyí ké bubwô ḿbú Busun emen.