Dyitórónómyi 9 - Bokyi Bible

Banet-Ézerel ba/né echi ńkyí Óburúkpâbí o/sét Kámbé

¹ Fwôo n̂g atông ba-jwo, ǎ banet-Ézerel. Kurún, ben ba-kú ba-bâ enyáng kace ńké Jódan ba-da-kyú ké esí nyí eshê nyí nyi ne kiǐtí-busa e-shwôm běn. Eshê ebe e/rêe, ne nyi ne ekpe nyí e/nyâam wǎ e/tîm bubóng, nyí e/wâng kányí.

² Banet bayén ba/nárê, ne mbe ne busa. Ba-chi i biǐnât-banet, ne ben baa/jwo ké mbe ba-raa ng ba/fu, onet o*fí mú odaman ebwom bunwa ne mbé*.

³ Nké kurún, ben ba/chi ba-nyît ba/fu, Óburúkpâbí mú mu Osówo enen o/chi o-bwóp běn kashú wǎ okwâ mú odashí byěm o-câ. Nyǐ o/chi o-kpógê kámbé ké nkéré ba-kú ba-cen n ba-câ, eringe ben ba/chi ba-ró kámbé ba-ju kámbé ochéé óchee wǎ eringe nyí o/ryí ocím.

⁴ Ké nkéré mú Óburúkpâbí mú mu Osówo enen oo/ró kámbé o-kye běn, *da n̂g echi ba-raa ne byiko enen ba/fu, nyǐ oo/bê ne ben ba-ba-kyú ké esí ńnyín* ké nǎ, ben ba/kwárê mú badakyú ké nyǐ*. Aa*wááng*. Óburúkpâbí mu o-bâ ebaró banet ḿbén o-kye běn, ké nǎ, banet ámbe ba/bên atyém.

⁵ Kyi*fí* ké nǎ, ben bamu kanong* ne bamu ba-chi i ńkyí nkyi kanong* nké Óburúkpâbí mu o-mîng ng běn ba-koo esí ebe*. Nyǐ o/chi o-ró kámbé, ké nǎ, ba/bên atyém, ne ké nǎ, nyǐ mu o-ryuu ng o/fu, nyǐ o-tî ng ocím emen mú o/ryí banchí enen ḿbé kpákpá, Ébarahâm ne Ázik ne Jekôp.

⁶ Ben ba-man ba-nyît ba/fu, Óburúkpâbí o*fí o-kyâ běn esí ńnyín, nyí edabát byiryíng* ké nǎ, ben ba/kwárê mú badakyú ké nyǐ*. Aa*wááng*. Ben ba-chi i banshwane ashí-banet.

⁷ *Da n̂g echi ba-ráp eringe nyí ben ba/chi Óburúkpâbí mú mu Osówo enen o-sa kafâ ké kyikim-dyikán*. Kyi-fím ké dyicí ńdyí ben ba/dim ba-mîng Éjip tete kyi-ribi ké dyicí ńdyí ben ba/ribi nyín, ben baa/bírî bunwa ne nyǐ.

⁸ Nang ké kaku ńké Sána, ben ba/chi Óburúkpâbí o-sa kafâ ńké ka/chi ǎ o-ju běn.

⁹ Me n/yú kyíbóng-kaku n/fu, n-da ng ekoo biǐbáá-aká ḿbyí ba/sáng ocím mú Óburúkpâbí o/ryí ne ben. Me n/rí áku bajam-ací bafee, chwǒm n*da/ryí* nang omu n*da/jwáp*.

¹⁰ Ne Óburúkpâbí kâng o-kye mě biǐbáá-aká ámbyi byifee ḿbyí nyǐ oyén o/kúng bubwô emen o-sáng byěm ḿbyí nyǐ o/sét běn ké dyicí ńdyí ben ba/bwom ké kaku ne nyǐ, o-bwom ké kafâ-okwâ o-raa ne ben.

¹¹ Ne ké nkéré mú bajam-ací bafee ámbe ba/shwôm, Óburúkpâbí o/kye mě biǐbáá-aká ámbyi byifee, ḿbyí nyǐ o/mû o/sáng ocím mú o/ryí ne ben.

¹² Ne Óburúkpâbí o-sét mě kâng o/fu, shû kaku ochéé óchee, ké nǎ, banet eyên ḿbé wo a/tông kámbé kiǐfáng ba-byí ké Éjip baa/bên byiko ebe ne baa/chi kyibî. Mbé baa/mîng echi ńkyí me n/sét kámbé n/fu, bachi, ne baa/chi orím-bukye ba-kye byiko ebe.

¹³ Óburúkpâbí o/sét mě to o/fu, me mu n-nyît ng eringe nyí banet ḿbén mbe ba-shwane e ashí.

¹⁴ *Dachi a-kan a/fu, wo a-chi i mě m-mîng echi ńkyí mu m-bâ echi*. Me nn/tî okabe mú ndaju kámbé eringe nyí onet oo*ba/chi o-chîzîim kámbé*. Me n/chi n-chi ǒ kâng a-firi bonchí mú oshê mú o/chi o-rêe o-kyú ne busa o-shwôm kámbé.

¹⁵ Ne m-bírî kâng n-shû kaku ne biǐbáá-aká ámbyi byifee ḿbyí nyǐ o/sáng ocím eryí ámu. Bumang-okwâ bu/mû mbu bu-byí i ké kaku ánke.

¹⁶ N-ri n/fu, ben baa/né etî kyije ńkyí Óburúkpâbí mú mu Osówo enen o-kye běn, ne baa/chi kyibî ké bushú emen, ńkyí ba/chi orím-bukye-kiǐré mú mu wǎ otyép-mpong.

¹⁷ Ké bubwô ámbu, m/bwa ne biǐbáá-aká ámbyi m-pwó kyísí ké bushú enen byi-sêe byicê byicê.

¹⁸ Ne n-chîtíngê kyísí kâng ké bushú ḿbú Óburúkpâbí ké bajam-ací bafee, nang omu n*da/jwáp* nang chwǒm to n*da/ryí*. Me n/chi ńkyín, ké nǎ, ben baa/chi kyibî ké bushú ḿbú Óburúkpâbí, ne baa/chi kafâ ka-sa ǎ.

¹⁹ Me m/mû mu n-shî ng kyibî-kafâ esa ńké ka/mû ka-sa ng Óburúkpâbí, ké nǎ, ka/mû ka-sa ng ǎ ńké oda běn eju. Nké Óburúkpâbí o/chî mě ejwo.

²⁰ Kafâ ka/mû ka-sa ng Óburúkpâbí kanong kanong ne Éron to ńké o/fu, nyǐ o-ju ng ǎ, ne ké bubwô ámbu, n/fé to nshwam nkéré ámu obónge n-kye ǎ ké dyishí-Éron.

²¹ Me n/kúng kyibî-mpong ánkyi, ńkyí ben ba/chi n-twóp kámú ké kafâ-okwâ. Ne n-sé kámú kâng rugirugi, n-kwa kámú o-bírî wǎ édúkǎndú, n-yip édúkǎndú ányi m-pwó ké kace ńké nke ka-fím m kyíbóng-kaku ka-sen n ka-bâ kyísí.

²² Ben to ba/chi Óburúkpâbí mú mu Osówo enen o-sa kafâ ké nkéré ba/mû ké Tábéra, ne ké Mása, ne ké Kyíbot-Hátaba.

²³ Ne ké nkéré mú nyǐ o/twóm běn ké Kádyishi-Bánya o/fu, ben baca ba-da-koo esí nyí nyǐ o/fu, nyǐ o-kyâ běn, ben baa/bírî bunwa ne nyǐ, ba*da/fé dyityém ne nyǐ* ba-kye ǎ ofê*.

²⁴ Kyi-fím ké nkéré mú me n/nyît běn, ben bamu ba-bírî ng bunwa ne Óburúkpâbí.

²⁵ Ké bubwô ámbu, me n/tíngê kyísí ké bushú ḿbú Óburúkpâbí, ké bajam-ací ámbe bafee, ké nǎ, me n/nyît n/fu, nyǐ o/mû o/tî okabe o/fu, nyǐ o-ju ng běn.

²⁶ Ne n/fé nshwam n/fu, Óburúkpâbí mú mu Otu Kyítá, *dachi a-ju banet eyên* banet ḿbé wo a/nyii kámbé* a-fîm kámbé ba-byí ké Éjip ké kiǐtí-busa eyên*.

²⁷ Zîim bǎmgbán eyên, Ébarahâm ne Ázik ne Jekôp, ne *dachi a-sa kafâ kyi-kim ne dyishí eshwane ne dyityém ebên ne kyibî ńkyí banet ḿbén*.

²⁸ Â kyi*fí éné* banet ḿbé Éjip ba-kû ng eraa ba/fu, wo a*da/man ekúng banet eyên a-jâ ne mbé ké esí nyí wo a/mû a/ryí kámbé ocím*. Ba-kû ng eraa to ba/fu, wo a/kúng banet eyên a/fu, wo a-da ng eju kámbé ké kyikim-kyikán, ké nǎ, mbé ba/mû ba-sa ng ǒ kafâ.

²⁹ Â a/kabe kâng, banet ḿbén nké wo a/cá kámbé a/fu, bakyú banet ḿbé eyên, ḿbé wo a/fîm kámbé ba-byí ké Éjip ké kiǐtí-busa eyên.