Dyitórónómyi 8 - Bokyi Bible

Esí nyí Enong nyí Banet badakyú ké nyǐ

¹ Tî n̂g kángkáng byije ḿbyí me nn/kye běn kurún ne dyityém enen, eringe nyí ben ba/chi ba-kpen, ba-jê ba-ca kashú, ba-kyú ké esí nyí Óburúkpâbí o/ryí banchí enen ḿbé kpákpá ocím.

² Zîim m̂ eringe nyí Óburúkpâbí mú mu Osówo enen o/tông běn bukwóp ké kiǐtíbítíbí-bucen ńkyín ké kyikim-dyikán, ké bajam-aje bafee ḿbé baa/shwôm ké esim, o-twóm m busông bu-kâm m běn, eringe nyí nyǐ odanyît ńkyí ben bamu ba-kabe ng ba/fu, ba-chi i, ne â ben ba/chi ba-tî byije emen.

³ Nyǐ o/chi esong e-nwa běn, o-bwa o-kye běn mána ba-ryí, dyizong-byiryíng ḿbyí ben ne banchí enen ḿbé kpákpá ba/mû ba*da/ryí ne*. Nyǐ o/chi ńkyín eringe nyí oda běn etángê o/fu, onet oo*man o-jêem dyikpen emen ké byiryíng byírying* o/fu, byichi ǎ nyǐ o-kpen* nké o-man o-jêem kándyí ké kángkáng byěm ḿbyí Óburúkpâbí mu o-sét ng.

⁴ Ké bajam-aje ḿbén bafee, byídí enen byi*da/kâa ne* nang byiká enen byi*da/mut ne*.

⁵ Zîim m̂ ba/fu, Óburúkpâbí mú mu Osówo enen mu o-tángê e běn dyishí wǎ eringe nyí bonchí odatángê bwǎn emen dyishí.

⁶ Ké bubwô ámbu kâng, chi n̂g eringe nyí Óburúkpâbí oo/sét běn. Kyú n̂g eringe nyí byije emen byi/sét, ba-kû ǎ eshî.

⁷ Óburúkpâbí mú mu Osówo enen mu o-bâ ne ben ké esí nyí edabát byiryíng, esí nyí nyi ne buce ne boǒbwán-buce ḿbú budabyí kyísí bu-sen n ké eku ne ewo,

⁸ esí nyí edazím esang-byichí ne byirim-byichí wǎ fyîk ne pamagáránit ne ólif, e-kyú to ne bakút-bukwan.

⁹ Esong ee*ba/chi e-nwa běn ké esí ányi* ne chwǒm kii*ba/chi kyi-kaa běn*. Aká emen nyi ne áyon ké kafâ, ne e-man n ekyú to ne kópa ké eku emen.

¹⁰ Ben ba/chi ba-já nang ebóng ńkyí bamu ba-ryuu ng ba/fu, ba-ryí i, ne ba/chi ba-kó Óburúkpâbí mú mu Osówo enen asǎma ké esí ányi nyí edabát byiryíng, nyí nyǐ oo/kye běn.

Ekó ekuri kyi-kim ne Óburúkpâbí eráp

¹¹ Tî n̂g kánkyí ké dyityém ba/fu, baa*ba/chi ba-ráp Óburúkpâbí mú mu Osówo enen*. *Da n̂g echi ba-né kyije emen nang kyibónge* ńkyí me mu n-kyâ běn kurún*.

¹² Ké nkéré baa/já kángkáng byiryíng ḿbyí bamu ba-ryuu ng, ne baa/bi byise ḿbyí byinong byinong ḿbyí badakyú,

¹³ ne ké nkéré mú bampong ne ebû enen ne basyílyíba ne bagûl enen ne kángkáng byěm enen byikíri bii/jê,

¹⁴ tî n̂g ké dyityém ba/fu, ben baa*ba/chi ba-kpet etông byiko* ba-ráp Óburúkpâbí mú mu Osówo enen* mú o/nyii běn ké abwô nyí Éjip* ké kyikit ńkyí ben ba/mû básóng*.

¹⁵ Nyǐ o/tông běn kiǐfáng ba-nyáng kiimbâng-kiinchi bushî-kyikim-dyikán ánkyi, ńkyí kyi/mû ne efyi ne boonang-aro. Ké kiǐjínjwóm-esí ánkyi, nyǐ o/chi omu o-byí ké biinshinshwan-aká o-kye běn.

¹⁶ Ké kyikim-dyikán ánkyi, nyǐ o/kye běn mána ba-ryí, dyizong-byiryíng ńdyí banchí enen ḿbé kpákpá ba/mû ba*da/ryí*. Nyǐ o/twóm běn busông eringe nyí oda běn ekan, eringe nyí ké nkuli kyikû, nyǐ o/chi o-kye běn byěm ḿbyí byinong.

¹⁷ Ké bubwô ámbu kâng, ben baa*man ba-kabe ba/fu, baa/fang ké busa ḿbú enen ben bayén*.

¹⁸ Zîim m̂ ba/fu, Óburúkpâbí mú mu Osówo enen nké mu o-kyâ běn busa ḿbú badafiri banfang-banet. Nyǐ mu o-chi i ńkyín, ké nǎ, tete kurún, nyǐ o/tôong o-tî ng ocím emen mú o/ryí ne banchí enen ḿbé kpákpá.

¹⁹ *Da n̂g echi ba-ráp Óburúkpâbí mú mu Osówo enen* ba-bírî ba-kpet efé esówo ekíri* ba-kyâ kányí ofê*. Â ben ba/chi éné, me mu n-kuri ng běn ekó kâng kurún n/fu, ba-man ba-ju běn.

²⁰ Â ben ba*da/chi ńkyí Óburúkpâbí o/sét běn* ba/chi ba-ju běn wǎ eringe eshê nyí áku, nyí nyǐ mu o-bâ ebaju kányí â ba-kú ba-cen n ba-câ.