Dyitórónómyi 7 - Bokyi Bible

Banet ḿbé ba/já Óburúkpâbí

¹ Óburúkpâbí mú mu Osówo enen o/chi o-bâ ne ben ké esí nyí ben ba/chi ba-da-nung ba-kyú ké nyǐ, ne o/chi o-ró eshê chwóó e-byí ké esí ányi. Â ba-kú ba-cen n ba-câ, nyǐ o/chi o-ró eshê káchâtkányi nyí e/rêe, ne nyi ne busa e-shwôm běn. Eshê ányi nyi banet ḿbé Hyítat ne ḿbé Gyígashit ne ḿbé Ámórit ne ḿbé Kínan ne ḿbé Périzit ne ḿbé Hyíbit ne ḿbé Jébus.

² Ké nkéré mú Óburúkpâbí mú mu Osówo enen oo/kúng banet ḿbén o-fé běn ké abwô enen, ba-kpógê kámbé, ba-man ba-ju kámbé ashí kángkáng. *Da n̂g echi ba-chi kyikwáré ne mbé* ba-ri nang kámbé bafip*.

³ *Da n̂g ebé onet nang obónge ké burwám ebe* ne *da n̂g echi ba-bángê bwǎn enen ba-bé kámbé*

⁴ ké nǎ, mbé ba/chi ba-chi bwǎn enen ba-mîng Óburúkpâbí efé ba-kpet efé esówo ekíri. Â kyi/chi éné, Óburúkpâbí o/chi o-sa kafâ ne ben, o-ju běn ké abe ányi.

⁵ Ké bubwô ámbu kâng, bên n̂ byikit-byifen ebe echi. Sé n̂g aká-ociring ebe rugirugi, ba-bên biinchéng-bukye ḿbú badakó Ashéra, mú osówo-onyinyi ebe, ba-shí erím-bakye ebe.

⁶ Chi n̂g ńkyín, ké nǎ, ben ba/já Óburúkpâbí mú mu Osówo enen. Ké kángkáng burwám-banet ḿbé ké ejíí, nyǐ o/cá běn ben o/fu, bakyú banet ḿbé emen nyǐ oyén.

⁷ Óburúkpâbí o/cá běn, ké nǎ, ben bamu ba-jê ng ǎ, *chí ké bubwô ḿbú ben ba/jê ba-shwôm banet ḿbé áku*. Ben nké oshê enen o/mû o/sîi o-shwôm eshê nyí ké ejíí.

⁸ Nké ben ba/mû ba-jê ng Óburúkpâbí ne o/mû mu o-ryuu ng o/fu, nyǐ o-tî ng ocím emen mú nyǐ o/ryí banchí enen ḿbé kpákpá. Nkyí nké kyi/chi ne o-yip kiǐtí-busa emen o-chi běn ba-fem ké búsóng ḿbú ben ba/mû ba-ta ng ba-kyâ otu mú Éjip.

⁹ Zîim m̂ ba/fu, Óburúkpâbí mú mu Osówo enen nké mu Osówo kǎnchí, ne nyǐ o-tî ng ocím emen mú odaryí. Nyǐ o/chi o-tî ocím emen mú o/ryí o-sem dyizîn emen, o-tông kyijé emen ńkyí kii*man* ne banet ḿbé nyǐ mu o-jê ng kámbé ba-tî ng to byije emen, ké byitông-banet ḿbyí bii*nwa epan*.

¹⁰ Nké nyǐ oo*bên nkéré ne o-kye banet ḿbé nyǐ mu o-sa ng kámbé kafâ busông*.

¹¹ Ké bubwô ámbu kâng, chi n̂g ńkyí baa/tángê běn. Tî n̂g kángkáng byije ḿbyí me nn/kye běn kurún.

Banjware ḿbé Byije etî

¹² Â ben ba/chi ba-fwôo atông ba-jwo byije ḿbyín, ba-tî kámbyí ne atyém enen, Óburúkpâbí mú mu Osówo enen kâng o/chi o-tî ocím emen mú o/ryí ne ben o-ca kashú, ne o/chi o-tông běn kyijé emen ńkyí kii*man* wǎ eringe nyí nyǐ o/ryí banchí enen ḿbé kpákpá ocím.

¹³ Ben ba/chi ba-jê ǎ, o-jware běn, eringe nyí ben badajê ba-fwon bwǎn chwóó. Nyǐ o/chi o-jware byifát enen, eringe nyí ben badajá byiryíng ne bato ne bakút-ólif, ne o/chi o-jware běn o-kye běn bampong ne etám-ebû chwóó. Nyǐ o/chi o-kye běn banjware ḿbén ké esí nyí nyǐ o/ryí banchí enen ḿbé kpákpá ocím o/fu, nyǐ o/chi o-kye běn.

¹⁴ Kyikim-banet kyi*fí ké ejíí* ńkyí o/chi o-jware kámbé wǎ ben*. Onet nang obónge ké burwám enen o*fí* nang byitú enen byi*fí ḿbyí byi/chi byi-waa bukwom*.

¹⁵ Óburúkpâbí o/chi o-ku běn ké bushú ḿbú kángkáng banet-bushwôn enen, ne oo*ba/chi o-kye běn kyibî-orwôm nang kyibónge ńkyí kyi/nwa běn ké Éjip*. Nké o-kúng ng kámbyí kángkáng o-kye banet-bushwôn enen.

¹⁶ Bên n̂ oshê nang orá mú Óburúkpâbí mú mu Osówo enen o/fé běn ké abwô, *da n̂g echi ba-ri kámbé bafip*. *Da n̂g echi ba-fé erím-bakye ebe* ké nǎ, ńkyí ánkyi kyi/chi kyi-kyú běn wǎ kaǎtám.

¹⁷ *Da n̂g echi ba-kûkabe ba/fu, banet ḿbén ba/jê ba-shwôm běn* ne baa*man eró kámbé ba-byí*.

¹⁸ *Da n̂g echi ba-shî kámbé*. Zîim m̂ ńkyí Óburúkpâbí mú mu Osówo enen o/chi otu mú Éjip ne kángkáng banet emen.

¹⁹ Zîim m̂ busông ḿbú ben ba/ri ké achi enen ne biǐtí-akat ne kiǐtí-busa ńkyí Óburúkpâbí mú mu Osówo enen o/yip ne o-chi běn ba-fem. Ké dyizong-bukwóp bubónge ḿbú nyǐ o/ju banet-Éjip, o/chi o-kúng to kámbú o-ju kángkáng banet ḿbén, ḿbé ben bamu ba-shî ng kántîk.

²⁰ Nyǐ o/chi [o-chi kámbé ba-firi yógeyóge ne barî,] ne o/chi o-ju banet ḿbé badachêe ba-da-rem.

²¹ Ké bubwô ámbu, *da n̂g echi ba-shî banet ḿbén*. Óburúkpâbí mú mu Osówo enen mu ne ben. Nyǐ o-chi i Osówo mú kiǐtí, mú bada ǎ eshî.

²² Ké onyin ké onyin, nyǐ o/chi o-ró eshê ńnyín â ba-kú ba-cen n ba-câ. Ben baa*ba/chi ba-man eju kámbé kángkáng nkéré obónge* ké nǎ, â ba/chi éné, byibî-enyam byi/chi byi-jê byi-shwôm, ḿbyí byida běn ekûkye afaníkong.

²³ Óburúkpâbí o/chi o-fé běn banet-bushwôn enen ké abwô, o-fé kámbé bushî tete ba-ju kámbé.

²⁴ O/chi o-kúng batu ebe o-fé běn ké abwô. Ben ba/chi ba-ju kámbé, ne ba/chi ba-ráp kyi-kim ne mbé. Onet o*fí mú o/chi o-man běn eku ké bukwóp*. Ba-ju ng nang yeě nang yeě.

²⁵ Shí n̂g erím-bakye ebe. Basyílyíba ne bagûl ḿbé mbe ké nyǐ ba*dachi ba-jê běn* ne *da n̂g echi ba-kúng kámbé ba-já běn*. Â ba/chi éné, kyi/chi kyi-kyú běn wǎ kaǎtám, ké nǎ, bakye esháng ba-nut ng Óburúkpâbí.

²⁶ *Da n̂g echi ba-bâ ne erím-bakye ányi ké byise enen*. Â ba/chi éné, kyishû ńkyí nkyi kányí ké byiko kyi/chi kyi-bwa kyi-kâm běn. Erím-bakye ányi e-man e-sa běn kafâ, e-nut běn, ké nǎ, Óburúkpâbí oo/shú kányí.