Dyitórónómyi 6 - Bokyi Bible

Kiǐtí-Kyije

¹ Byije ḿbyín kángkáng nké Óburúkpâbí mú mu Osówo enen o/kye mě busa o/fu, me ntángê běn. Chi n̂g eringe nyí byi/sét, ké esí nyí ba/chi ba-da-nung ba-kyú ké nyǐ.

² Ké kyikim-nkéré ńkyí ba/chi ba-kyú bakpó, ben ne bwǎn enen ba-man ba-kye Óburúkpâbí mú mu Osówo enen ofê, ba-tî kángkáng byije emen ḿbyí me mu n-kyâ běn, eringe nyí ben ba/chi ba-kyú ké esí ányi ka-bwon chwóó.

³ Banet-Ézerel, fwôo n̂g atông ba-jwo kámbyí, ba-tî kámbyí. Â ba/chi éné kâng, kángkáng byěm byi/chi byi-ca běn kanong ne ba/chi ba-firi kiǐtí-oshê ba-kyú ké esí nyí enong ányi, nyí edabát byiryíng, wǎ eringe nyí Óburúkpâbí mú mu Osówo mú banchí eten ḿbé kpákpá oo/ryí ocím.

⁴ Zîim m̂ ńkyín, ǎ banet-Ézerel. [Óburúkpâbí kǎnchí nké mu Osówo eten.]

⁵ Óburúkpâbí mú mu Osówo enen ojê běn ne dyityém enen kángkáng ne basun enen kángkáng ne busa enen kángkáng.

⁶ *Da n̂g echi ba-ráp byije ḿbyín ḿbyí me mu n-kyâ běn něen kurún*.

⁷ Tángê ê bwǎn enen kámbyí. Fu n̂g kámbyí ba-bírî ng ké nkéré bamu ké byise enen ne ké nkéré baa/byí kyíjí ne ké nkéré ba-kú ba-jáng ng ne ké nkéré ba-kú ba-chi i bǎmkpóngé.

⁸ Bwá n̂g kámbyí ké abîng-bubwô enen ne ké bambwô enen eringe nyí badakûzîim kámbyí.

⁹ Sáng n̂g kámbyí ké ecím-afyi enen ne ké afyi-oshê enen.

Ekó ekuri kyi-kim ne Kyije ebên

¹⁰ Wǎ eringe nyí Óburúkpâbí mú mu Osówo enen o/ryí banchí enen ḿbé kpákpá ocím, Ébarahâm ne Ázik ne Jekôp, nyǐ o/chi o-kye běn esí nyí nyi ne biimbâng-biǐtí-eshê nyí ben ba*da/bi*.

¹¹ Byise ámbyi byi/chi byi-sú ne byěm ḿbyí byinong ḿbyí ben ba*da/fé ké kafâ* ne abíng-omu a/chi a-kyú nyí ben ba*da/sím* ne byifát-byirim-byichí ḿbyí ben ba*da/kwón*. Ké nkéré Óburúkpâbí oo/bê ne ben ké esí ányi, ne ba/firi ne kángkáng byěm ḿbyí bamu ba-ryuu ng ba/fu, ba-ryí i,

¹² tî n̂g ké dyityém enen ba/fu, ben baa*ba/chi ba-ráp Óburúkpâbí mú oo/nyii běn ké abwô nyí Éjip* ké kyikit ńkyí ben ba/mû básóng*.

¹³ Shî n̂g Óburúkpâbí mú mu Osówo enen, ba-kye ǎ nyǐ nké nke ofê, ba-ryí ecím enen ké dyizîn emen nké nke.

¹⁴ *Da n̂g efé esówo ekíri* nang osówo obónge* mú banet ḿbé mbe ba-kyú u ba-fárâng ng běn*.

¹⁵ Â ben ba/fé esówo ekíri, busa-dyityém ḿbú Óburúkpâbí bu/chi bu-bâ bu-kâm běn wǎ okwâ, ne bu/chi bu-ju běn kángkáng, ké nǎ, Óburúkpâbí mú mu Osówo enen, mú mu ne ben ké burwám, oo*bángê osówo okíri o-kan bujinjang ne nyǐ*.

¹⁶ *Da n̂g echi ba-kan Óburúkpâbí mú mu Osówo enen* wǎ eringe nyí ba/kan ǎ ké Mása*.

¹⁷ Tî n̂g ké dyityém enen ba/fu, ben ba-tî ng kángkáng byije emen ḿbyí nyǐ oo/kye běn.

¹⁸ Chi n̂g ńkyí Óburúkpâbí o/sét o/fu, nkyi kanong, ne kángkáng byěm byi/chi byi-ca běn kanong. Ben ba/chi ba-man ekoo esí ányi nyí edabát byiryíng, nyí Óburúkpâbí o/ryí banchí enen ḿbé kpákpá ocím,

¹⁹ ne ba/chi ba-ró banet-bushwôn enen ba-byí ké nyǐ wǎ eringe nyí nyǐ o/ryí ocím.

²⁰ Ké nkéré mú mu o-bâ ké kashú, bwǎn enen ba/chi ba-bí běn ba/fu, ebóng Óburúkpâbí mú mu Osówo eten o/sét bě o/fu, be byitî kángkáng byije ḿbyín.

²¹ Ben sét n̂g kámbé kâng ba/fu, be byi/mû básóng ḿbé otu mú Éjip, ne Óburúkpâbí o/kúng kiǐtí-busa emen o-nyii bě ké abwô-otu ámu.

²² Be byi/kúng achi eten byi-ri akat ne biinchi bushî-byěm ḿbyí nyǐ o/chi banet ḿbé Éjip ne otu ebe ne kángkáng banet-ashí-oshê emen.

²³ Nyǐ o/fîm bě ké abwô nyí Éjip, eringe nyí nyǐ odabê ne be nyín o-kye bě esí ńnyín, wǎ eringe nyí nyǐ o/mû o/ryí banchí eten ḿbé kpákpá ocím o/fu, nyǐ o-chi i.

²⁴ Ne Óburúkpâbí mú mu Osówo eten kâng o-sét bě o/fu, be byikûtî kángkáng byije ḿbyín, byi-kû ǎ eshî to. Â be byi/tî kámbyí, nyǐ kángkáng nkéré o-bám m oshê eten, o-chi kámú o-firi ne byěm chwóó. [

²⁵ Â be byi/chi kángkáng byěm ne atyém eten, ḿbyí Osówo oo/sét bě o/fu, be byichi, kyi/chi kyi-nyîn ǎ ne be.]