Dyitórónómyi 5 - Bokyi Bible

Byije-Osówo Diǐkpú

¹ Músis o/kó kángkáng banet ḿbé Ézerel kyikit kyibónge, o-sét kámbé o/fu, banet-Ézerel, fwôo n̂g atông ba-jwo kángkáng byije ḿbyí me mu n-kyâ běn kurún. Kwâa n̂g kámbyí, ba-ri ba/fu, ben ba-tî ng kámbyí.

² Ké kaku ńké Sána, Óburúkpâbí mú mu Osówo eten o/ryí ocím mú o/sem dyizîn emen,

³ *chí ne banchí eten nké nke* nké o/ryí to ne be ashí kángkáng mú byi/tôong okpó kurún.

⁴ Ké kaku ánke, Óburúkpâbí o/bwom ké okwâ o-raa ne ben wááng.

⁵ Ké nkéré ámu, me m/bwom ké otyém ne otyém mú enen ne Óburúkpâbí n-sét běn ńkyí nyǐ o/fu, ké nǎ, ben ba/mû ba-shî ng okwâ ámu, ba/fu, ben baa*yú kyíbóng-kaku*. Óburúkpâbí o/raa o/fu,

⁶ me n-chi i Óburúkpâbí mú mu Osówo enen, mú o/nyii běn ké abwô nyí Éjip, ké kyikit ńkyí ben ba/mû básóng.

⁷ *Da n̂g efé Osówo okíri kyi-cibi ne me*.

⁸ *Da n̂g echi ba-sím orím-bukye mú chwǒm nang kyibónge ńkyí nkyi kyíbóng* nang ńkyí nkyi ké ejíí* nang ńkyí nkyi ké kace* ba-kye byiko enen*.

⁹ *Da n̂g echi ba-tíngê kyísí ké bushú-orím-bukye nang obónge* ba-kye kámú ofê* ké nǎ, me n-chi i Óburúkpâbí mú mu Osówo enen, ne n*fí m-bángê e n/fu, osówo okíri okan bujinjang ne me*. Nang ebóng banet ḿbé mu n-sa ng kámbé kafâ, n-kyâ kámbé ne bwǎn ebe busông tete kyi-ribi ké byitông-banet byichât nang byinyii.

¹⁰ Nké banet ḿbé mu n-jê ng kámbé ba-tî ng to byije ejí, n-tông ng kámbé ne bwǎn ebe kyijé ejí ké [byitông-banet ḿbyí bii*nwa epan*.]

¹¹ *Da n̂g ezîim dyizîn ejí ké bukwóp ḿbú bu/kim ne kyibî* ké nǎ, me Óburúkpâbí mú mu Osówo enen n-kyâ nang yeě busông mú o/zîim dyizîn ejí ké bukwóp ḿbú boo*nwa*.

¹² Tî n̂g byije ḿbyí dyicí-ékwâbashi, ba-tî kándyí wǎ dyicí-ociring, wǎ eringe nyí me Óburúkpâbí mú mu Osówo enen nn/sét běn.

¹³ Ben bamu ne ací nyâchât nyí badachi bǎmkpóngé enen,

¹⁴ nké ké ací káchâtkányi, dyicí ándyi dyi-chi i dyicí-dyijâng ńdyí dyi/já mě. Ké dyicí ándyi, onet nang obónge o*dachi o-chi bǎmkpóngé* nang ben bayén* nang bwǎn enen* nang básóng enen* nang byitú enen* nang bacinbánet ḿbé mbe ba-kyú u ké oshê enen*. Básóng enen ba-man ba-jáng wǎ eringe nyí ben bayén badajáng.

¹⁵ Zîim m̂ ba/fu, ben ba/mû básóng ké Éjip, ba-zîim to ba/fu, me Óburúkpâbí mú mu Osówo enen n/nyii běn ké kiǐtí-busa ejí. Nkyí nké kyi/chi ne mu n-kyâ běn kyije n/fu, batî byije ḿbyí dyicí-ékwâbashi.

¹⁶ Kye n̂g bonchí ne boné enen ofê, wǎ eringe nyí me Óburúkpâbí mú mu Osówo enen mu n-sét ng běn, eringe nyí kángkáng byěm byida běn ece kanong, ne eringe nyí ben badakyú ka-bwon ké esí nyí me mu n-kyâ běn.

¹⁷ *Da n̂g eju onet*.

¹⁸ *Da n̂g echi kyinam*.

¹⁹ *Da n̂g ejii kajii*.

²⁰ *Da n̂g ebât onet kyiraa ńkyí kyi*fí ké kafâ*.

²¹ *Da n̂g eryuu ba/fu, ba-koo ng onyi-onet* nang kyise emen* nang esí emen* nang básóng emen* nang bampong emen* nang boonyam-atû emen* nang chwǒm kyikíri ńkyí nyǐ mu ne nkyí*.

²² Byije ḿbyín nké Óburúkpâbí o/kye běn ashí amúmú ké nkéré ben ba/cibi kyikit kyibónge ké kaku ńké Sána. Ké nkéré nyǐ o/bwom ké okwâ ne ké kiǐkpîn-ófíbí o-raa ne ejá nyí nyi ne busa, byije ḿbyín nké o/kye běn, o*da/kye byikíri*. Ne o-sáng kâng kámbyí ké biǐbáá-aká byifee o-kúng o-kye mě.

Bushî bu/róng Banet-Ézerel

²³ Ké nkéré okwâ o/mû mu o-mang ng ké kaku kamúmú, ne ben ba-jwo ejá nyí e/fím ké kyifip, batu ne banet-ashí enen ba/bê ba-kâm mě

²⁴ ba/fu, Óburúkpâbí mú mu Osówo eten o/tông bě eringe nyí nyǐ mu kiǐtí ne busan emen ḿbú ragerage ké nkéré mú byi/jwo ǎ ńdyí o/bwom ké kafâ-okwâ o-raa ne be. Kurún, be bii/ri byi/fu, onet o-man n echîkpen o-ca kashú nang ké Osówo oo/pem ne nyǐ.

²⁵ Nké ebóng be byidachîfé akpen eten ké bukwóp ḿbú bukyû. Kyibî-okwâ ánkyi kyi-ju ng bě. Be byi-man byi-kpú â byi/chîjwo Óburúkpâbí mú mu Osówo eten o-raa ne be.

²⁶ Onet mu kô mú oo/chîkpen? ké nkéré oo/jwo Osówo mú mu okpó o-bwom ké okwâ o-raa ne nyǐ?

²⁷ Bwa esim, ǎ Músis, a-da-fwôo atông a-jwo kángkáng byěm ḿbyí Óburúkpâbí mú mu Osówo eten mu o-sét ng. Ne a-bwa esim kâng a-ba-sét bě ńkyí nyǐ o/sét ǒ. Be byi-fwôo ng atông byi-jwo, byi-chi ńkyí nyǐ o/sét.

²⁸ Ké nkéré mú Óburúkpâbí o/jwo ńkyín, nyǐ o/sét mě o/fu, me nn/jwo ńkyí banet ḿbén ba/fu, ne ńkyí ba/sét nkyi ntûntû.

²⁹ Kyi/mû kyi/chi kyi-nwa â kángkáng nkéré mbé ba-kû ng ekabe éné. Â mbé kángkáng nkéré ba/mû ba-kû ng mě ekye ofê ba-chi kángkáng byěm ḿbyí ndasét kámbé, eringe kángkáng byěm byidace kámbé ne bwǎn ebe kanong ne banyá.

³⁰ Ca a-da-sét kámbé ba-bwa esim dyijê ké boompyep ebe.

³¹ Nké wo, ǎ Músis, kyú nyín ne me, ne n/chi n-kye ǒ kángkáng byije ejí ne byěm ḿbyí mu n-ryuu ng n/fu, bachi. Tángê banet-Ézerel kámbyí, eringe mbé badakûtî kámbyí ké esí nyí mu n-kyâ kámbé.

³² Banet ḿbé Ézerel, tî n̂g ké dyityém enen ba/fu, ben ba-chi i kángkáng byěm ḿbyí Óburúkpâbí mú mu Osówo enen oo/sét běn o/fu, ben bachi. *Da n̂g echi ba-róng kyije emen nang kyibónge*.

³³ Tî n̂g kámbyí kángkáng eringe nyí kángkáng byěm byida běn ece kanong, ne eringe nyí ben badakûkyú ba-câ kashú ké esí nyí ben ba/chi ba-kyú ké nyǐ.