Dyitórónómyi 4 - Bokyi Bible

Músis o/sét Banet-Ézerel o/fu, bakûchi ńkyí Osówo odasét Kámbé

¹ Músis o-sét kâng banet-Ézerel o/fu, tî n̂g kángkáng byije ḿbyí mu n-tángê e běn. Â ba/tî kámbyí, ben ba/chi ba-kpen ba-kyú ké esí nyí Óburúkpâbí mú mu Osówo mú banchí enen ḿbé kpákpá mu o-kyâ běn.

² *Da n̂g echi ba-fé chwǒm kyikíri* ké byěm ḿbyí mu n-sét ng běn* ne *da n̂g echi to ba-fîm nang chwǒm kyibónge ké mbyí*. Tî n̂g byije ḿbyí Óburúkpâbí mú mu Osówo enen, ḿbyí nn/kye běn.

³ Ben bayén ba/ri ńkyí Óburúkpâbí o/chi ké kaku ńké Pôo. O/ju nang yeě nang yeě mú o/mû o-fâ orím-bukye-Bâl ké kaku ánke,

⁴ nké ben mú ba/fé dyityém ké Óburúkpâbí mú mu Osówo enen ba/tôong okpó tete kurún.

⁵ Me nn/tángê běn kángkáng byije wǎ eringe nyí Óburúkpâbí mú mu Osówo ejí o/sét mě o/fu, ne ntángê běn. Tî n̂g kámbyí ké esí nyí ba-kú ba-bâ ekoo ba-kyú ké nyǐ.

⁶ Tî n̂g kámbyí ne atyém enen, ne kyi/chi kyi-tông banet ḿbé eshê ekíri eringe nyí bamu ne bubong. Â ba/jwo kyi-kim ne kángkáng byije ḿbyín, ba/chi ba-raa ba/fu, banet-kiǐtí-oshê mún mbe ne bubong ne byinyídíng kanong kanong.

⁷ Oshê okíri o*fí to* nang o-bwa o-kyú nǎ* mú mu ne osówo mú odafárâng kámbé ké nkéré ba-kú ba-ryuu ng ǎ* wǎ eringe nyí Óburúkpâbí mú mu Osówo eten mu ne be*. Nyǐ o-faa ng bě nang nkéré orá nké byi/kó ǎ byi/fu, ochwáp bě.

⁸ Oshê okíri o*fí to* nang o-bwa o-kyú kiǐtí nǎ* mú mu ne byije ḿbyí ntûntû* wǎ ḿbyí me nn/tángê běn kurún*.

⁹ Bám m̂ byiko enen. Tî n̂g kánkyí ké dyityém ba/fu, ké kyikim-nkéré ńkyí ben bamu okpó, baa*ba/chi ba-ráp* ńkyí ben baa/ri ké achi enen*. Sét n̂g bwǎn enen ne bwǎn ḿbé bwǎn enen

¹⁰ kyi-kim ne dyicí ńdyí ba/bwom ké bushú ḿbú Óburúkpâbí mú mu Osówo enen, ké kaku ńké [Sána,] ké nkéré mú o/sét mě o/fu, kó banet-Ézerel ba-ba-cibi kyikit kyibónge. Me mu n-ryuu ng kámbé n/fu, bajwo ńkyí mu m-bâ ebasét kámbé, eringe nyí mbé badakwâa eringe nyí bada mě ekûfé ké kángkáng dyikpen ebe, eringe nyí mbé ba/chi ba-tángê bwǎn ebe ba-kû mě eshî.

¹¹ Sét n̂g bwǎn enen eringe nyí ben ba/dim ba-da-bwom ké kyikû-kaku ńké kiǐkpîn-ófíbí mú arúkwâ nyí pyampyam ne okwâ byi/mû byi/cít kánké tete byi-ribi kyíbóng.

¹² Sét n̂g kámbé eringe nyí Óburúkpâbí o/bwom ké okwâ ámu o-raa ne ben, eringe nyí ben ba/jwo ejá emen, nké ba*da ǎ eman eri ké bukwóp nang bubónge*.

¹³ Nyǐ o/sét běn ńkyí ben badaman ba-chi, eringe badatî ocím mú nyǐ o/ryí ne ben o-sem dyizîn emen. Ba-man ba-tî byije ámbyi diǐkpú, ḿbyí nyǐ o/sáng ké biǐbáá-aká byifee.

¹⁴ Óburúkpâbí o/sét mě o/fu, me ntángê běn kángkáng byije ḿbyí ben ba/chi ba-tî ké esí nyí ben ba-kú ba-bâ ekoo ba-kyú ké nyǐ.

Ekó ekuri kyi-kim ne Bakye esháng

¹⁵ Ké nkéré mú Óburúkpâbí o/bwom ké okwâ o-raa ne ben ké kaku ńké Sána, ben ba*da ǎ eri ké bukwóp nang bubónge*. Ké kanong ńké enen kâng, tî n̂g kánkyí ké dyityém

¹⁶ ba/fu, ben baa*ba/chi ba-chi kyibî ńkyí badachi orím-bukye nang orá ba-tî byiko enen* nang mú onyinchéng* nang mú onyinyi*

¹⁷ nang mú enyam* nang mú kanurung*

¹⁸ nang mú efyi* nang mú kakworê*.

¹⁹ *Da n̂g echi ba-bángê ba-nîm běn ba-kye byěm ḿbyí bamu ba-ri ng kyíbóng ofê* nang óbyísû* nang otukáku* nang ékpére*. Óburúkpâbí mú mu Osówo enen oo/kúng byěm ámbyi kángkáng o-kye banet bakíri o/fu, bakûkye kámbyí ofê.

²⁰ Nké ben nké bamu banet ḿbé nyǐ oo/nyii běn ké Éjip nyí o/mû běn wǎ bumang-okwâ. Nyǐ o/fîm běn ba-byí o/fu, nyǐ o-chi i běn ba-firi banet emen wǎ eringe nyí bamu kurún.

²¹ Ké dyishí enen, Óburúkpâbí mú mu Osówo enen o/sa kafâ ne me, o-sem byiko emen o/fu, me mm*ba/chi n-nyáng kace ńké Jódan* n-da-nung ké esí nyí edabát byiryíng* nyí nyǐ mu o-bâ ekye*.

²² Me n/chi m-kpú ké esí ńnyín, mm*ba/chi n-nyáng kace* nké ben ba-kú ba-bâ enyáng kánké ba-da-kyú ké esí ányi nyí edajang enwa byiryíng.

²³ Tî n̂g ké dyityém enen ba/fu, ben baa*ba/chi ba-ráp ocím mú Óburúkpâbí mú mu Osówo enen o/ryí ne ben*. Tî n̂g kyije ńkyín ba/fu, ben baa*ba/chi ba-chi orím-bukye nang obónge ba-tî byiko enen*

²⁴ ké nǎ, Óburúkpâbí mú mu Osówo enen mu wǎ okwâ mú mu o-mang ng. Nyǐ oo*bángê o/fu, osówo okíri okan bujinjang ne nyǐ*.

²⁵ Nang ké nkéré ba/chi ba-rí chwóó ké esí ányi, ba-fwon bwǎn, ne bwǎn ḿbé bwǎn enen, *da n̂g echi ba-chi kyibî ńkyí badachi orím-bukye ké bukwóp nang burá ba-tî byiko enen*. Ńkyín kyi-chi i kyibî ké bushú ḿbú Óburúkpâbí, ne kyi-chi i ǎ o-kpet esa kafâ.

²⁶ Me mu n-sét ng bubóng ne esí byi-bwom wǎ ntûesé n/fu, â ben ba/né ńkyí me mu n-sét ng běn, kaa*bwon to ne ba-rím esí ányi*. Ben baa*ba/chi ba-kyú ka-bwon ké esí nyí adanyáng kace ńké Jódan a-byí ké nyǐ* nyí ba-kú ba-bâ ekoo*. Ba/chi ba-ju běn ashí kángkáng.

²⁷ Óburúkpâbí o/chi o-pwó běn byiryibyiryi ké eshê ekíri, ké byikit ḿbyí boǒnyín-banet enen nké nke bu/chi bu-kpen.

²⁸ Ké eshê ányi nké ba/chi ba-fé erím-bakye nyí banet ba/chi ké abwô, nyí ba/sím ké byichí ne ké aká, nyí ee*rángê* ee*jwo atông* ee*ryí byiryíng* ee*jwo kyinung-byěm*.

²⁹ Ké eshê ányi nké ben ba/chi ba-kyé Óburúkpâbí mú mu Osówo enen, ne â ba/kyé ǎ ne atyém enen kángkáng, ba/chi ba-ri ǎ.

³⁰ Ké nkéré baa/firi ké afaníkong, kángkáng byěm ámbyi byi-kpet běn echi, nkéré ámu kâng nké ba/chi ba-bírî ba-kâm Óburúkpâbí ba-kpet ǎ ekye ofê.

³¹ Nyǐ o-chi i Osówo mú odari banet bafip. Oo*ba/chi o-mîng běn* o-ju běn* ne oo*ba/chi o-ráp ocím mú nyǐ o/ryí ne banchí enen ḿbé kpákpá*.

³² Kabe n̂g kyi-kim ne nkéré mú oo/shwôm ké esim, ké nkéré mú ba*da běn efwon ne* tete kyi-ribi ké nkéré mú Osówo o/chi onet o-tî ké ejíí. Kabe n̂g kyi-kim ne ejíí emúmú. Chwǒm nkyí kô ńkyí kii/chi? ńkyí kyi/rêe kyi-shwôm ńkyín? Onet mu kô mú o/mû oo/jwo dyizong-chwǒm wǎ ńdyín?

³³ Banet mbe kô ḿbé baa/chîkpen ké nkéré baa/jwo kyibî-orím kyi-bwom ké okwâ kyi-pem ne mbé wǎ eringe nyí ben baa/jwo?

³⁴ Osówo okíri mu kô mú oo/kan o/fu, nyǐ o-da ng efîm banet ké oshê okíri o-chi kámbé ba-firi banet ḿbé emen? wǎ eringe nyí Óburúkpâbí mú mu Osówo enen o/chi běn ké Éjip? Ben ba/yip achi enen ba-ri ké nkéré mú o/tông kiǐtí-busa emen, o-bâ ne busông ne byití, o-chi biǐtí-akat-byěm ne byěm byikíri ḿbyí byidachi bushî.

³⁵ Óburúkpâbí oo/tông běn byěm ḿbyín, eringe nyí oda běn echi ba-nyît ba/fu, nyǐ kǎnchí nké mú Osówo, okíri o*fí to*.

³⁶ Nyǐ o/chi běn ba-jwo ejá emen nyí e/fím kyíbóng, eringe nyí nyǐ oda běn etángê byěm, ne nyín ké ejíí, o/mîng běn ba-ri kyibî-okwâ emen, ne o/bwom ké mǔ o-raa ne ben.

³⁷ Ké na, banchí enen ḿbé kpákpá ba/mû ba-jê ng ǎ, nyǐ o/cá běn, ne ké kiǐtí-busa emen, nyǐ o/fîm běn ba-byí ké Éjip.

³⁸ Ké nkéré mú bamu ba-cen n ba-câ, nyǐ o/ró eshê nyí e/mû ne kiǐtí-busa e-shwôm běn, eringe nyǐ odabê ne ben, o-kúng esí ebe o-kye běn, nyí e/tôong nyí enen.

³⁹ Ké bubwô ámbu, zîim m̂ kurún, ba*dachi ba-ráp* ba/fu, Óburúkpâbí mu Osówo mú bubóng ne esí*. Osówo okíri o*fí to*.

⁴⁰ Tî n̂g kángkáng byije emen ḿbyí me nn/kye běn kurún, ne kángkáng byěm byi/chi byi-ca běn ne bwǎn enen kanong. Ben ba-kyú u ba-câ kashú ké esí nyí Óburúkpâbí mú mu Osówo enen mu o-kyâ ben o/fu, efiri nyí enen ne banyá.

Eshê nyí badachêe ba-jâ, nyí nyi ké Kyicê-Jódan ńkyí Esû edabyí

⁴¹ Ne Músis o-cá kâng eshê echât o-tî, ké kyicê-Jódan ńkyí esû edabyí,

⁴² nyí onet nang orá mú o/ju onet mú o*fí onet-bushwôn emen* ké ofene, odachêe o-jâ chwǒm kii*chi ǎ*. O-man n echêe o-jâ ké oshê nang orá ké eshê ńnyín echât baa*ju ǎ*.

⁴³ Kyikû-banet ńkyí Rúben, o/tî kámbé oshê mú Béze ké ndege-esí mú mu kyíbóng-kaku ńké kyikim-dyikán. Kyikû-banet ńkyí Gât, o/tî kámbé oshê mú Rímot, ké kyikim-esí ńkyí Gyílet. Kyikû-banet ńkyí Manáse, o/tî kámbé oshê mú Gólan, ké kyikim-esí ńkyí Báshan.

Kiimkpet Kyikû-Byije-Osówo ekye

⁴⁴ Músis o/kúng byije-Osówo ne byěm ḿbyí o/tángê o-kye banet-Ézerel.

^45-46 Kyi/mû ké nkéré mú ba/dim ba-mîng Éjip, ba-ribi ké owo mú kyicê-kace-Jódan ńkyí esû edabyí, mú o/bírî kashú ne oshê mú Bét-Pôo nké Músis o/kye kámbé byije ḿbyín. Ńkyín kyi/mû ké kyikim-esí ńkyí kyi/mû kyi/já Otu Síhon mú Ámórit, mú o/mû otu mú oshê mú Héshibon. Músis ne banet ḿbé Ézerel ba/kpógê ǎ ké nkéré mú ba/mîng Éjip.

⁴⁷ Mbé ba-koo esí emen ne esí nyí Otu Ôok mú Báshan, mú o/mû otu-Ámórit mú obónge, mú o/mû o-kyú u ké kyicê-Jódan ńkyí esû edabyí.

⁴⁸ Esí ńnyín e/mû e/fím ké oshê mú Áro ké bukô-káce ńké Ánon tete e-ribi ké kyicê-bushûyû ké kaku ńké [Síryon,] ányi kaku-Hémon.

⁴⁹ Esí ányi e/mû e/kpaa to kyikim-esí ńkyí kyicê-kace-Jódan ńkyí esû edabyí tete a-ribi ké kyicê-busyísen, ké baya ḿbé Bukyû, e-ribi ké kyicê ńkyí esû edabyí, ké kyikû-kaku ńké Pyíga.