Dyitórónómyi 34 - Bokyi Bible

Bukyû ḿbú Músis

¹ Músis o/dim ké esí nyí ndege ńdege nyí Mówep, o-da-yú kaku ńké Nébo, o-ribi kyíbóng-kaku ńké Pyísaga, ké kyicê-Jéríku ńkyí esû edabyí. Ányi nké Óburúkpâbí o/tông ǎ esí emúmú nyí Kínan, kyi-fím ké kyikim-esí ńkyí Gyílet, tete kyi-ribi ké oshê mú Dǎn.

² O/tông ǎ kángkáng kyikim-esí ńkyí Nafatályi ne byikim-esí ḿbyí Éferem ne Manáse ne kyikim-esí ńkyí Júda, tete kyi-ribi ké baya ḿbé Medeterényan.

³ O/tông ǎ kyicê-busyísen-Júda ne esí nyí ndege ńdege nyí e/fím ké Zówa e-ribi oshê mú Jéríku, mú mu ne bayêp chwóó.

⁴ Ne Óburúkpâbí o-raa kâng ne Músis o/fu, esí ńnyín nké me n/ryí Ébarahâm ne Ázik ne Jekôp ocím n/fu, n/chi n-kye bwǎn ebe. Me mm/mîng ǒ a-ri kányí, nké me mm*ba/chi m-bángê ǒ a-ribi ké nyǐ*.

⁵ Ne Músis mú onet-Óburúkpâbí kâng o-kpú ányi ké esí nyí Mówep wǎ eringe nyí Óburúkpâbí o/mû o/sét o/fu, o/chi o-kpú ányi.

⁶ Óburúkpâbí o/ryii ǎ ké owo obónge ké Mówep, mú o/bírî kashú ne oshê mú Bét-Pôo, nké tete kurún, onet o*fí mú mu o-nyît ng ochíchí-kyikit ńkyí o/ryii ǎ*.

⁷ Músis o/rí bajam-aje nyâchât ne o-kpú. O/mû o/tôong ne busa kanong kanong, ne o/mû o/tôong o-rángê e kanong kanong.

⁸ Banet ḿbé Ézerel ba/ta ǎ dyikán ké ací bujam esim diǐkpú, ké esí nyí ndege ńdege nyí Mówep.

⁹ Jóshwa mú wǎn-Nûn o/já bubong kanong kanong, ké nǎ, Músis o/mû oo/fîm ǎ o/fu, okúng kyikit emen. Banet ḿbé Ézerel ba/chi ńkyí Jóshwa o/sét kámbé, ba-tî byije ḿbyí Óburúkpâbí o/kye Músis o-kye kámbé.

¹⁰ Mkpábé mú odasét byiraa-Osówo mú o/kyú ké Ézerel o*fí mú o/fyi ne Músis*. Óburúkpâbí o/pem ne nyǐ ba-ri ng barî.

¹¹ Mkpábé mú odasét byiraa-Osówo okíri o*fí to* mú o/chi biinkaa byiko-byěm wǎ ḿbyí Óburúkpâbí o/twóm Músis o/fu, ochi otu mú Éjip* ne banet-ashí-oshê emen* ne oshê emen omúmú ké byiko*.

¹² Mkpábé mú odasét byiraa-Osówo okíri o*fí to mú oo/man echi biǐtí-biinchi bushî-byěm* ḿbyí Músis o/chi ké bushú ḿbú kángkáng banet-Ézerel*.