Dyitórónómyi 33 - Bokyi Bible

Músis o/jware Byikû-Banet ḿbyí Ézerel

¹ Ńnyín banjware ḿbé Músis mú mu onet-Osówo o/kye banet ḿbé Ézerel ne o-kûkpú.

² O/fu, Óburúkpâbí o/fím ké kaku ńké Sána o-bâ. Nyǐ o/byí wǎ óbyísû o-bwom ké Édom, o-bwom ké kaku ńké Páran o-san banet emen ké byiko. [Barím emen ḿbé banong chwóó ba/mû ne nyǐ ké kyikû, ne okwâ o/mû mu o-mang ng ǎ ké bubwô-etyebéng.]

³ Óburúkpâbí, [banet emen] ba-jê ng ǎ, ne mu o-ku ng banet ḿbé ba/já ǎ. Ké bubwô ámbu, be byimu [byi-tíngê e kyísí] ké byiká emen byi-tî ng byije emen.

⁴ Be byimu byi-tî ng byije ḿbyí Óburúkpâbí o/kye mě n-kye běn, ḿbyí mbyi kiǐtí-chwǒm ńkyí kyi/rêe kyi-shwôm, ńkyí oshê eten mu ne nkyí.

⁵ Óburúkpâbí o/firi Otu mú banet emen ké nkéré mú byikû-banet ebe ne banet-ashí ebe ba/cibi kyikit kyibónge.

⁶ Músis o/sét kyi-kim ne kyikû-banet ńkyí Rúben, o/fu, kyi/bát Rúben o*dachi o-tánê* nang ké banet ebe ba*da/jê*.

⁷ Kyi-kim ne kyikû-banet ńkyí Júda, nyǐ o/raa o/fu, Óburúkpâbí, fwôo atông a-jwo bukyû ebe ḿbú mbe ba-tii ng ba/fu, wo achwáp kámbé. Chîyip kámbé a-cibi ne byikû-banet ḿbyí áku. [Óburúkpâbí, nwa bunwa ké bubwô ebe, a-chwáp kámbé ba-nwa ne banet-bushwôn ebe.]

⁸ Kyi-kim ne kyikû-banet ńkyí Lyíva, nyǐ o/raa o/fu, wo, ǎ Óburúkpâbí, chi banet ba-nyît dyityém eyên ké ámám ńyí badakó búrim ne túmim, ké abwô nyí bǎmgbán eyên ḿbé mbe bǎmgbán-nchi kyifen-Osówo, ḿbé ba/fé dyityém ne wo. Wo a/kan kámbé ké Mása, a-tông eringe nyí mbé mbe ne dyityém dyibónge ké kace ńké Meryíba.

⁹ Mbé ba/kye ǒ wo ofê o-shwôm mú ba/kye banchí ne bané ebe nang bwǎn-bané ebe nang bwǎn ebe. Mbé ba/tî byije eyên ne ba/tî to ocím mú ba/ryí ǒ, ba-sem dyizîn eyên.

¹⁰ Mbé ba/chi ba-tángê bwǎn eyên ba/fu, bakûtî byije eyên. Mbé ba/chi ba-shí byifen ké kyikit-kyifen eyên echi.

¹¹ Óburúkpâbí, chwáp kyikû ebe kyi-kyú shwaneshwane. Nang ebóng nké ba/chi kyinyîn ǒ. Ju kángkáng banet-bushwôn ebe. Ba*dachi ba-chîbûu nensang*.

¹² Kyi-kim ne kyikû-banet ńkyí Běnjámin, nyǐ o/raa o/fu, kyikû ńkyín nké nkyi kyi-jê ng Óburúkpâbí, ne mu o-ku ng kánkyí. Nyǐ mu o-bám m kánkyí kyirim-dyicí kyimúmú, [o-kyú u ké burwám ebe.]

¹³ Kyi-kim ne kyikû-banet ńkyí Josêf, nyǐ o/raa o/fu, kyi/bát Óburúkpâbí ojware esí ebe omu o-na ké nyǐ, o-kye to kányí omu mú odafím kyísí.

¹⁴ Kyi/bát esí ebe ekyú ne ojware mú byirim-byichí ḿbyí esû edachi kámbyí byi-bwam. O-chi kányí e-sú ne byirim-byichí dyije nang dyirá ḿbyí byidanwa byi-shwôm.

¹⁵ Kyi/bát eku ebe nyí e/fím ne karé ekyú ne byirim-byichí ḿbyí byinong chwóó.

¹⁶ Kyi/bát esí ebe esú ne kángkáng byěm ḿbyí byinong, ḿbyí Óburúkpâbí mú o/bwom ké kyichí ńkyí nkyi kyi-mang ng o-raa, oo/jware kámbyí. Kyi-bát banjware ḿbén babâ ba-kâm kyikû-banet ńkyí Josêf, ké nǎ, nyǐ o/mû onet-dyishí mú bwǎn-bané emen.

¹⁷ Josêf mu ne busa ḿbú otyép-mpong ne etwóm nyí kiinyinyǎm. Etwóm emen e/bwom ké égot-banet-Manáse etánge, ne bajam-égot-banet-Éferem batánge. Mu o-kúng ng kányí o-tím eshê, o-tírîng kámbé o-da-tî ké bakô-ejíí.

¹⁸ Kyi-kim ne kyikû-banet ńkyí Zébélon ne ńkyí Ézaka, nyǐ o/raa o/fu, kyi/bát banet ḿbé Zébélon baryí bufa ké kasî ebe ńké mbe ba-cen n ké baya ḿbé baryên. Ne kyi/bát esang nyí Ézaka ejê ké byise.

¹⁹ Mbé mbe ba-kó ng bacinbánet ba-bâ ké kaku ebe, ba-chi i byifen ḿbyí byi/kwárê ké nké. Mbé mbe ba-já ng akpuga ebe ké baya ḿbé baryên ne ké éshíshě nyí nyi ké bukô-baya.

²⁰ Kyi-kim ne kyikû-banet ńkyí Gât, nyǐ o/raa o/fu, kpee n̂g Osówo mú o/chi kyikim-esí ebe kyi-rêe. Gât mu o-bám m wǎ ekpang, o/fu, nyǐ o-jâa ng bubwô nang dyishí.

²¹ Mbé ba/kúng esí nyí e/nwa e-shwôm ba-kye byiko ebe. Ba/kúng kyicê ńkyí kyi/já onet-dyishí ba-kye kámbé. Mbé ba/tî kángkáng byije ḿbyí Óburúkpâbí, [ké nkéré mú banet-ashí ḿbé Ézerel ba/cibi kyikit kyibónge.]

²² Kyi-kim ne kyikû-banet ńkyí Dǎn, nyǐ o/raa o/fu, Dǎn o-chi i kyisu-ekpang. Nyǐ o/fím ké Báshan o-pyiryi o-byí kyíjí.

²³ Kyi-kim ne kyikû-banet ńkyí Nafatályi, nyǐ o/raa o/fu, Óburúkpâbí o/jware Nafatályi kanong kanong ké kanong emen. Esí ebe e/fím ké baya ḿbé Gályílyi e-ribi ké kyicê ńkyí busyísen.

²⁴ Kyi-kim ne kyikû-banet ńkyí Ásha, nyǐ o/raa o/fu, Óburúkpâbí o/jware Ásha o-shwôm byikû-banet ḿbyí áku. Kyi/bát nyǐ ojê bwǎn-bané emen, ne kyi/bát esí emen ekyú ne byichí-ólif chwóó.

²⁵ Kyi/bát baku eshê emen ne afyi nyí biǐré, ne kyi/bát nyǐ kángkáng nkéré okyú chwǒm kii*ta ǎ*.

²⁶ Banet ḿbé Ézerel, Osówo okíri o*fí to* wǎ Osówo enen* mú mu o-yú u ké busa emen o-nyáng ng bubóng* o-yú u ké éfíbí o-bâ ng běn ebachwáp*.

²⁷ Kángkáng nkéré, Osówo nké mu o-ku ng běn. Abwô emen nyí adawaa ne banyá nké nyi a-níbî ng běn. Nyǐ o/ró banet-bushwôn enen ké nkéré bamu ba-cen n ba-câ, o-sét běn o/fu, ben baju kámbé kángkáng.

²⁸ Ké bubwô ámbu, bwǎn ḿbé Jekôp ba-kú ba-kyú u ké bunyîn-dyityém. Mbe ba-kyú u beem ké esí nyí ee/sú ne byiryíng ne bato, ké kyikit ńkyí kyibû nkyi kyi-fím m kyíbóng kyi-na ng kyísí.

²⁹ Ézerel, ben bamu ké bunyîn-dyityém kanong kanong. Oshê o*fí mú mu wǎ ben*. Oshê mú Óburúkpâbí oo/nyii kámú. Óburúkpâbí oyén nké mu běn édem ne kashwám, mú odanwa bunwa o-kye běn, o-chi běn ba-kpógê. Banet-bushwôn enen ba/chi ba-ba-tîm arông ba/fu, ben bari kámbé bafip, ne ben ba/chi ba-cím kámbé ba-fé kyísí.