Dyitórónómyi 32 - Bokyi Bible

¹ esí ne bubóng jwo n̂g byiraa ejí, fwôo n̂g atông kanong kanong ba-jwo ńkyí mu n-sét ng.

² Byěm ejí ḿbyí mu n-tángê e byi/chi byi-na wǎ abán-omu, byi-pwôo kyísí wǎ kyibû. Byiraa ejí byi/chi byi-na wǎ omu mú odanyérê ké esu-byichí, wǎ omu mú degere, mú odana ké biǐbyâa ḿbyí byi*da/kán ne*.

³ Me n/chi m-kpee dyizîn ńdyí Óburúkpâbí ne banet emen ba/chi ba-sét eringe nyí nyǐ mu kiǐtí.

⁴ Óburúkpâbí mu o-shwane e wǎ buká. Nyǐ mu kanong ne oo*ryí acît* ké kángkáng édúú emen. Osówo enen mu ntûntû ne o-chi i ńkyí odaryí ocím. Nyǐ o-sét ng ńkyí nkyi ntûntû ne ńkyí kyi/kwárê. [

⁵ Nké ben ba*fí ba-fâ dyityém ne nyǐ* ne ba*da/kwárê mú badakyú banet emen*.] Ben ba-chi i oshê mú odanîm banet, mú odachi byibî.

⁶ Něen nké ben badachi Óburúkpâbí dí. Ben enyam-banet ḿbé ba*fí ne dyishí*. Nyǐ nké mu bonchí enen mú o/bê ne ben ké ejíí, o-chi běn ba-firi oshê obónge.

⁷ Kabe n̂g ńkyí kii/shwôm ké esim, ké nkéré mú oo/shwôm ké esim chwóó. Bí n̂g banchí enen ba-sét běn ńkyí kyi/chi. Bí n̂g bakâa-banet ba-sét běn kyi-kim ne nkéré mú oo/shwôm ké esim.

⁸ Nyǐ mú mu kyíbóng kyíbóng nké o/kye eshê esí ebe. Nyǐ nké o/tî byikit ḿbyí banet badakyú. Nyǐ o/kye oshê nang orá osówo obónge.

⁹ Nké nyǐ o/cá bwǎn ḿbé Jekôp ba-firi ḿbé emen.

¹⁰ Nyǐ o/ri kámbé ké mbe ba-yêe ng ké kyikim-dyikán ńkyí kyi*fí ne chwǒm* ńkyí afú adatugi ké nkyí kyi-cé kpárádádát. Nyǐ o/ku kámbé, o-nen kámbé, wǎ eringe nyí mu o-ku ng byiko emen.

¹¹ Wǎ kiinkwa ńkyí [kyidatángê bwǎn emen eringe nyí badabyí,] kyi-kpaa kámbé kyi-fé ké abyibabang emen baa*róng kyísí* éné to nké Óburúkpâbí o*da/mîng Ézerel e-róng kyísí*.

¹² Óburúkpâbí kǎnchí nké o/tông banet emen kiǐfáng, Osówo mú bacinbánet o*da ǎ echwáp*.

¹³ Nyǐ o/mîng kámbé ba-firi batu ḿbé esí nyí eku éku, ne mbé ba/ryí byěm ḿbyí byifát byi/mû byi-kyâ kámbé. Mbé ba/já bakút-bukwan ké afít-aká. Byichí-ólif ebe byi/kán kanong ké esí nyí aká áka.

¹⁴ Bampong ebe ne ebû ebe byi/kye kámbé abî chwóó. Mbé ba/mû ne ebû ne bampong ḿbé ba/nwa ba-shwôm ne esang-byichí nyí e/nwa e-shwôm ne bato ḿbé badanyîn ba-shwôm.

¹⁵ Banet ḿbé Óburúkpâbí ba/já esang, nké ba/bírî bunwa. Mbé ba/mû ba/rêe, ba-zût byiryíng. Mbé ba/mîng Osówo mú o/chi kámbé, ba-né Kiǐtí-Onet-Onyii ebe.

¹⁶ Bakye ebe esháng ba/chi Óburúkpâbí o-firi ne orêm. Byibî ḿbyí ba/chi byi/chi kafâ ka-sa ǎ.

¹⁷ Mbé ba/chi byifen ba-kye esówo nyí e*fí ké kafâ* esówo nyí efyîfî, nyí banchí ebe ḿbé kpákpá ba/mû ba*da/nyît ne* esówo nyí banet ḿbé Ézerel ba*da/kye ne kányí ofê*.

¹⁸ Mbé ba/ráp Osówo ebe mú mu Kiǐtí-Onet-Onyii ebe, mú o/kye kámbé dyikpen.

¹⁹ Ké nkéré mú Óburúkpâbí o/ri byěm ḿbyín, kafâ ka/sa ǎ, ne o-né bwǎn emen.

²⁰ O-raa o/fu, mm*ba/chi n-chîchwáp kámbé*. Ne n/chi n-ri kâng ńkyí kyi/chi kyi-chi kámbé, banshwane ashí-banet ámbe, ḿbé ba*da/fé dyityém ne me*.

²¹ Baa/kúng erím-bakye ebe ba-chi kafâ ka-sa mě. Ba-chi orêm o-kpet mě echi ne esówo ebe nyí e*fí ké kafâ*. Ké bubwô ámbu, n/chi n-kúng oshê mú o*fí ké kafâ* n-chi kámbé ba-sa kafâ. Me n/chi n-chi orêm o-kpet echi kámbé ne oshê mú enyam-banet.

²² Kafâ esa ejí ka/chi ka-mang wǎ okwâ ka-shí kángkáng byěm ké ejíí. Ka/chi ka-ribi ké oshê-bakúsí, ka-shí byikû-eku.

²³ Me n/chi m-bâ kámbé ne busông ḿbú boo*man* n-ché kámbé kángkáng abán ejí.

²⁴ Mbé ba/chi ba-kpú esong ne mbyép-byiko. Byibî-erwôm byi/chi byi-ju kámbé. N/chi n-twóm byibî-enyam byi-ba-kye kámbé bunwa, n-twóm byibî-efyi byi-ba-jwóm kámbé.

²⁵ Byití byi/chi byi-ju kámbé ké byiká-oshê. Bushî bu/chi bu-róng kámbé ké byise. Byisat ne ásé ba/chi ba-kpú, nang bwǎn-ojújwô nang bakâa-banet baa*waa*.

²⁶ M/mû n/chi n-ju kámbé ashí kángkáng, eringe nyí onet nang obónge oo*zîim to kámbé*.

²⁷ Nké mm*ba/chi m-bángê banet-bushwôn ebe ba-tông byiko ba/fu, mbé baa/kpógê banet ejí* ké nǎ, me oyén nké n/ju kámbé.

²⁸ Ézerel e-chi i oshê mú o*fí ne dyishí*. Bubong bu*fí kámbé nang kaǎnyín*.

²⁹ Mbé ba*fí ba-nyît ng ńkyí kyi/cen ne ba-kpógê kámbé*. Baa*man enyît kyikû kyi-kim ne ńkyí kyi/chi*.

³⁰ Ebóng onet obónge o/ju égot-banet etánge, banet bafee ba-ju égot-banet diǐkpú. Óburúkpâbí mú mu Osówo ebe oo/mîng kámbé. Kiǐtí-Onet-Onyii ebe oo/kúng kámbé o-kye banet-bushwôn ebe.

³¹ Banet-bushwôn ebe mbe ba-nyît ng ba/fu, esówo nyí ebe e*fí ne busa*. E*fí kiǐtí wǎ Osówo mú Ézerel*.

³² Banet-bushwôn ebe, ḿbé badachi byibî wǎ Sódom ne Gomóra, mbe wǎ byichí ḿbyí byidazím byirim ḿbyí byidaruu, ḿbyí onet odaryí o-kpú,

³³ wǎ bato ḿbé badachi ké dyífa-efyi.

³⁴ Óburúkpâbí mu o-zîim m ńkyí banet-bushwôn ebe baa/chi. Nyǐ mu o-bám m ochíchí-nkéré o-fyi mú nyǐ odakye kámbé busông.

³⁵ Óburúkpâbí o/chi o-só ewa, o-kye kámbé busông. Nkéré mu o-bâ mú mbé ba/chi ba-róng. Dyicí ebe ńdyí badakpú dii/fárâng.

³⁶ Óburúkpâbí o/chi o-nyii banet emen ké nkéré mú oo/ri o/fu, busa ebe boo/man. Nyǐ o/chi o-ri banet ḿbé mbe ba-fâ ǎ bafip, ké nkéré oo/ri o/fu, ba-kú ba-ryuu ng ochwâp.

³⁷ Óburúkpâbí kâng o/chi o-bí banet emen o/fu, biǐtí-esówo ámbyi ḿbyí ba/fé atyém ne mbyí mbyi nyá.

³⁸ Ben ba/kúng bafwám-enyam enen ḿbé bamu ba-chi i byifen ba-kye kámbyí, ba-kyâ kámbyí bato byi-jwáp. Esówo ányi ebâ kâng e-ba-chwáp běn, e-zóngê e-ba-nyii běn.

³⁹ Me kǎnchí nké mu Osówo, osówo okíri o*fí to mú mu ké kafâ*. Me mu n-ju ng banet n-kyâ kámbé dyikpen, n-némê ng banet, n-chi i kámbé ba-nyange e. Onet o*fí mú odané ńkyí ndachi*.

⁴⁰ Wǎ eringe ké ntûntû me mu Osówo mu mu okpó, me mu n-ryí i ocím n-sem byiko ejí n/fu,

⁴¹ n/chi n-jee kashwám ejí ńké kadakédê kasabang, n-két mpan o-bên kámbé. Me n/chi n-só banet-bushwôn ejí ewa, n-kye banet ḿbé mu n-sa ng kámbé kafâ busông.

⁴² Abán ejí a/chi a-kûsuri baróng ebe, kashwám ejí ka/chi ka-ju banet ḿbé mbe ba-kán n mě ké dyishí. Nang yeě mú o/nwa ne me mm*ba/chi m-mîng ǎ* nang banet ḿbé ba/némê kámbé ne ḿbé mbe bamgbokobá ba/chi ba-kpú.

⁴³ Eshê, ben ba-man ba-kpee banet ḿbé Óburúkpâbí. Nyǐ mu o-kyâ kángkáng banet ḿbé mbe ba-ju ng kámbé busông. Nyǐ mu o-só ng banet-bushwôn emen ewa, o-pwoo ng byibî ḿbyí banet emen.

⁴⁴ Músis ne Jóshwa mú wǎn-Nûn ba/kwán okwan mún eringe nyí banet ḿbé Ézerel badaman ejwo kámú.

Bankuli Kyikû-Bacê ḿbé Músis

⁴⁵ Ké nkéré mú Músis oo/sét banet-Ézerel byěm ḿbyí Osówo o/tángê byi-man,

⁴⁶ nyǐ o/raa o/fu, tî n̂g ké dyityém ba/fu, ben ba-tî ng kángkáng byije ḿbyín, ḿbyí me nn/kye běn kurún. Sét n̂g bwǎn enen kámbyí eringe nyí mbé badaman etî byěm ḿbyí Osówo o/tángê kámbé ne atyém ebe.

⁴⁷ Byěm ḿbyí n/tángê něen byi*fí ejá nyí dyikáá*. Mbyí nké mbyi dyikpen enen. Tî n̂g kámbyí, ne ben ba/chi ba-kyú ka-bwon ké esí ányi nyí ké esim-kace ńké Jódan nyí áku, nyí ba-kú ba-bâ ekoo.

⁴⁸ Ké dyicí ándyi dyibónge, Óburúkpâbí o/raa ne Músis o/fu,

⁴⁹ ca ké eku nyí Ábarim, ké esí nyí Mówep, nyí e/bírî kashú ne oshê mú Jéríku. Yú kaku ńké Nébo a-tún achi a-ri esí nyí Kínan nyí me n-kú m-bâ ekye banet ḿbé Ézerel.

⁵⁰ Wo a/chi a-kpú ké kaku ánke wǎ eringe nyí Éron mú wǎn-boné eyên o/kpú ké kaku ńké Hôo,

⁵¹ ké nǎ, ben ashí afee ba*da/fé dyityém ne me* ké bushú ḿbú banet-Ézerel*. Ké nkéré mú ba/mû ké kace ńké Meryíba, fáráng ne oshê mú Kádyishi, ké kyikim-dyikán ńkyí Zîn, ben ba*da mě ekye ofê* ké bushú-banet-Ézerel*.

⁵² Wo a/chi a-bwom tíbítíbí a-ri esí ányi, nké wo aa*ba/chi a-nung ké esí ányi* nyí mu n-kyâ banet ḿbé Ézerel*.