Dyitórónómyi 30 - Bokyi Bible

Byěm ḿbyí badachi ne Óburúkpâbí o-bwa ne Ben Esim, o-jware Běn

¹ Kántîk, me nn/tî běn byěm byifee ḿbyí badafîm kyibónge, ojware ne kyishû. Ké nkéré mú byěm ḿbyín kángkáng bii/chi běn, ne ba-kú ba-kyú u ké eshê nyí Óburúkpâbí mú mu Osówo enen oo/pwó běn ké nyǐ byiryibyiryi, ben ba/chi ba-zîim byěm ḿbyín byifee ḿbyí n/tî běn.

² Â ben ne bwǎn enen ba/chi ba-bwa esim ba-kâm Óburúkpâbí, ba-tî byije emen ḿbyí me mu n-kyâ běn kurún ne atyém enen kángkáng,

³ Óburúkpâbí mú mu Osówo enen kâng o/chi o-ri běn bafip. Nyǐ o/chi o-kúng běn ké eshê nyí o/pwó běn ké nyǐ byiryibyiryi o-bwa ne ben esim, ne o-chî ng běn echi ba-já byěm.

⁴ Nang o-bwa o-pwó běn ba-ribi ké eshê nyí e/tíbî e-shwôm, Óburúkpâbí mú mu Osówo enen o-bwa ng ne ben esim,

⁵ eringe nyí ben badachîman ekyú ké esí nyí banchí enen ḿbé kpákpá ba/mû ba/kyú. Ne o/chi o-chi běn ba-já byěm chwóó, ba-jê to chwóó ba-shwôm eringe nyí banchí enen ḿbé kpákpá ba/mû.

⁶ Óburúkpâbí mú mu Osówo enen o/chi o-kye běn ne bwǎn enen atyém nyí bada ǎ ekûfé, eringe nyí nyǐ oda běn ekûjê ne atyém enen kángkáng, ne ba-kû ng ekyú ké esí ányi ba-câ kashú.

⁷ Nyǐ o/chi o-bírî kángkáng byishû ḿbyín byi-kâm banet-bushwôn enen ḿbé ben ba/mû ba-sa ng kámbé kafâ, ba-cít ng běn,

⁸ ne ben ba/chi ba-chî ǎ ekye ofê, ba-tî kángkáng byije emen ḿbyí me mu n-kyâ běn kurún.

⁹ Óburúkpâbí o/chi o-chi běn ba-ryí bufa ké nang ebóng chwǒm ńkyí bamu ba-chi i. Ben ba/chi ba-fwon bwǎn chwóó ba-firi to ne byitú chwóó, ne byifát enen byi/chi byi-bát byiryíng chwóó. Nyǐ kyi/chi kyi-nyîn ǎ ńkyí oda běn echi ba-já byěm chwóó wǎ eringe kyi/nyîn ǎ ne o-chi banchí enen ḿbé kpákpá ba-já byěm chwóó.

¹⁰ Nké ben ba-man ba-fé ǎ, ba-tî kángkáng byije emen ḿbyí ba/sáng ké nwet mú ba/sáng byěm ḿbyí o/tángê. Ben ba-man ba-bírî ba-kâm ǎ ne atyém enen kángkáng.

¹¹ Byije ḿbyí me mu n-kyâ běn kurún byi*fí byi-jang ng esóng byi-shwôm* ḿbyí baa*man etî*.

¹² Byi*fí áku ké bubóng*. Byi*fí ḿbyí ben badabí ba/fu, yeě o/chi o-yú kyíbóng o-da-kúng kámbyí o-bâ bě ne mbyí* eringe nyí badajwo kámbyí* byi-tî kámbyí*.

¹³ Byi*fí nang ké bukô-baya ḿbé baryên ḿbú áku*. Byi*fí ḿbyí ben badabí ba/fu, yeě o/chi o-nyáng baya ḿbé baryên o-da-kúng kámbyí o-bâ bě ne mbyí* eringe nyí byidajwo kámbyí* byi-tî kámbyí*.

¹⁴ Aa*wááng* mbyi nyín ne ben. Ben bamu ba-nyît ng kámbyí, ne ba-man n ekám kámbyí ké dyishí, ké bubwô ámbu kâng, tî n̂g kámbyí.

¹⁵ Kurún, me mu n-tî ng běn byěm byifee n/fu, fîm m̂ kyibónge, kyibî ne kyinong, dyikpen ne bukyû. [

¹⁶ Â ben ba/tî byije ḿbyí Óburúkpâbí mú mu Osówo enen] ḿbyí me mu n-kyâ běn kurún, â nyǐ mu o-jê ng běn, ba-kye ǎ ofê, ba-tî kángkáng byije emen, ben kâng ba/chi ba-já byěm chwóó, ba-firi oshê mú mu ne banet chwóó. Óburúkpâbí mú mu Osówo enen o/chi o-jware běn ké esí nyí ba-kú ba-bâ ekyú ké nyǐ.

¹⁷ Nké â ben ba/né, ba-mîng atông efwôo, ba-bírî ba-kpet esówo ekíri efé,

¹⁸ Óburúkpâbí o/chi o-ju běn. Me mu n-kuri ng běn ekó ńnyín kántîk. Ben baa*ba/chi ba-rí ka-bwon* ké esí nyí badanyáng kace ńké Jódan ba-ribi ké nyǐ* nyí ben ba-kú ba-bâ ekyú ké nyǐ*.

¹⁹ Me mu n-tî ng běn byěm byifee n/fu, fîm m̂ kyibónge, dyikpen ne bukyû, ojware mú Osówo ne kyishû ńkyí Osówo, ne me mu n-kó ng bubóng ne esí n/fu, byibwom ntûesé ké ńkyí ben ba/fîm. Fîm m̂ dyikpen.

²⁰ Óburúkpâbí mú mu Osówo enen ojê běn, kye n̂g ǎ ofê, ba-tî dyityém ne nyǐ, ne ben ne bwǎn enen kâng ba/chi ba-rí ka-bwon ké esí nyí nyǐ o/ryí ocím o/fu, nyǐ o-kyâ Ébarahâm ne Ázik ne Jekôp, ḿbé ba/mû banchí enen ḿbé kpákpá.