Dyitórónómyi 3 - Bokyi Bible

Banet-Ézerel ba/kpógê Otu Ôok

¹ Byi/dim kâng kyicê ńkyí bushûyû ḿbú ké kyikim-esí ńkyí Báshan, Otu Ôok o-byí ne banet emen kángkáng o/fu, nyǐ o-bâ ng enwa ne be fáráng ne oshê mú Édara.

² Nké Óburúkpâbí o/sét mě o/fu, *dachi eshî ǎ*. Me n/chi n-kúng ǎ ne banet emen ne kángkáng esí emen n-kye ǒ. Chi ǎ wǎ eringe nyí a/chi Otu Síhon mú otu-Ámórit, mú o/mû otu ké Héshibon.

³ Ké bubwô ámbu, Óburúkpâbí o/kúng to Otu Ôok ne banet emen o-fé bě ké abwô, byi-ju kámbé kángkáng.

⁴ Ké nkéré ámu, byi/koo kángkáng eshê emen, oshê o*fí* mú byi*da/koo*. Kángkáng kangkang, byi/koo bajam-eshê bachât, kyikim-esí kángkáng ńkyí Ágop, ńkyí Otu Ôok o/mû otu mú Báshan.

⁵ Eshê ńnyín kángkáng ba/mû ba/bi ekpe nyí nyáám e-wáp kányí, ba-fé afyi ne biǐré ḿbyí badafín afyi. Eshê to e/mû chwóó nyí ba/mû ba*da/bi ekpe ba-wáp kányí*.

⁶ Byi/bên eshê ányi kángkáng byi-ju kángkáng banyinchéng ne banyinyi ne bwǎsíng, wǎ eringe nyí byi/chi ké eshê nyí e/mû e/já Otu Síhon mú Héshibon.

⁷ Byi/kúng byitú ebe, byi-koo byěm-oshê ebe.

⁸ Ké nkéré ámu, byi/koo esí nyí kyicê-kace-Jódan ńkyí óbyísû mu o-byí i, ké abwô nyí batu-Ámórit ámbe bafee, kyi-fím ké kace ńké Ánon tete kyi-ribi ké kaku ńké Hémon.

⁹ Banet ḿbé Sádon ba-kó ng kaku ńké Hémon, Síryon, banet ḿbé Ámórit ba-kó ng kánké Séne.

¹⁰ Byi/koo kángkáng esí nyí Otu Ôok mú Báshan, eshê nyí e/mû ké ndege-esí mú mu kyíbóng-kaku ne esí nyí Gyílet ne nyí Báshan tete kyi-ribi ké eshê nyí Saléka ne Édara, ké kyicê ńkyí óbyísû odabyí.

¹¹ Otu Ôok o/mû nkuli kyikû-otu mú banet ḿbé Réfyam. [Mkpukpu] mú ba/ryii ǎ, mú ba/chi ké [aká,] o/mû bamyíta banyii ké butang, ne bamyíta bafee ké baryên, â ba/kan kámú ké bachíchí-erí nyí badakan byěm. Â a/ce ké oshê-Rába mú banet ḿbé Ámon, a-ri ng kámú.

Byikû-Banet ḿbyí byi/kyú ké Kyicê-Jódan ńkyí Óbyísû odabyí

¹² Ké nkéré mú byi/koo esí ányi e-firi nyí eten, me n/kúng kyikim-esí ńkyí bushûyû-oshê mú Áro, fáráng ne kace ńké Ánon, ne kyicê-esí-eku éku nyí Gyílet, cibicibi ne eshê ebe, n-kye kyikû-banet ńkyí Rúben ne ńkyí Gât.

¹³ N-kúng kyicê-esí nyí Gyílet nyí e/waa, ne Báshan omúmú mú Otu Ôok o/mû otu, ányi kyi/byí, kyikim-esí kyimúmú ńkyí Ágop, n-kye kyicê-kyikû-banet ńkyí Manáse. Ba/mû ba-kó ng Báshan esí nyí Réfyam.

¹⁴ Jáyi mú o/fím ké kyikû ńkyí Manáse o/kúng esí emúmú nyí Ágop, ányi kyi/byí, kyi-fím ké esí nyí Báshan tete kyi-ribi ké buti ḿbú Géshu ne Máka. O/kúng eshê ányi o-fé kányí dyizîn emen, ne ba/tôong ba-kó ng kányí eshê nyí Jáyi.

¹⁵ N/kúng Gyílet n-kye kyikim-banet ńkyí Mákyi, ḿbé kyikû ńkyí Manáse.

¹⁶ N-kúng kyikim-esí ńkyí fím ké Gyílet tete a-ribi ké kace ńké Ánon, n-kye kyikû-banet ńkyí Rúben ne ńkyí Gât. Buti ebe ḿbú kyicê ńkyí busyísen bu/mû ké otyém-kace-Ánon, ne buti ebe ḿbú kyicê ńkyí bushûyû bu/mû ké kace ńké Jábok, ńké ka/mû buti to ḿbú esí nyí banet-Ámon.

¹⁷ Ké kyicê ńkyí óbyísû mu o-ríbî ng o-jâ, esí ebe n/nere tete e-ribi ké kace ńké Jódan, kyi-fím ké baya ḿbé Gályílyi ké kyicê ńkyí bushûyû tete e-ribi ké baya ḿbé Bukyû, ké kyicê ńkyí busyísen tete kyi-ribi ké kyikû-kaku ńké Pyísaga, ké kyicê ńkyí óbyísû odabyí.

¹⁸ Ké nkéré ámu to, me n/sét kámbé byiraa ḿbyín n/fu, Óburúkpâbí mú mu Osówo enen oo/kye běn esí ńnyín nyí ké kyicê-Jódan ńkyí esû edabyí o/fu, ben bakyú ké nyǐ. Kántîk, kye n̂g bannwa byití enen byěm-bunwa, ba-twóm kámbé ba-nyáng Jódan, ba-bwóp byikû-banet-Ézerel ḿbyí áku kashú, ba-da-chwáp kámbé ba-koo esí ebe.

¹⁹ Banyi enen ne bwǎn enen ne byitú enen nké nke nké ba/chi ba-waa ké eshê nyí nn/tî běn. Me mu n-nyît ng n/fu, ben bamu ne byitú chwóó.

²⁰ Chwáp n̂g barî-banet-Ézerel enen tete ba-koo esí nyí Óburúkpâbí mu o-kyâ kámbé, nyí nyi ké kyicê-Jódan ńkyí esû edaríbî e-jâ, tete Óburúkpâbí o-mîng kámbé ba-kyú ké bunyîn-dyityém wǎ eringe nyí oo/chi běn bamu ba-kyú u nyín. Ké nkéré baa/chi éné, ba-man n ebwa esim ké esí ńnyín nyí nn/kyii n-kye běn.

²¹ Ne n-sét kâng Jóshwa n/fu, wo aa/ri ńkyí Óburúkpâbí mú mu Osówo eyên oo/chi batu ámbe ashí afee, Otu Síhon ne Otu Ôok, ne o/chi o-chi nang yeě nang yeě mú o/chi o-kye esí emen bunwa dyizong-chwǒm ándyi dyibónge.

²² *Dachi a-shî kámbé* ké nǎ, Óburúkpâbí mú mu Osówo eyên o/chi o-nwa bunwa o-kye ǒ.

Óburúkpâbí o*da/bángê Músis o-nung ké Kínan*

²³ Ké nkéré ámu, me n/fé nshwam kanong kanong n/fu,

²⁴ Óburúkpâbí mú mu Otu Kyítá, me mu n-nyît ng n/fu, wo aa/tông mě kiimkpet kyikû-biǐtí-byěm ḿbyí wo amu a-bâ echi. Osówo okíri o*fí ké bubóng nang ké esí* mú odaman echi biǐtí-byěm ḿbyí wo aa/chi*.

²⁵ Mîng mě, ǎ Óburúkpâbí, n-nyáng kace ńké Jódan n-ri esí nyí edajang ebát byiryíng, nyí kyicê ńkyí áku, esí-eku éku nyí enong enong, ne eku nyí Lebánon.

²⁶ Nké ké bubwô-dyishí enen, Óburúkpâbí o/mû mu o-sa ng kafâ ne me, ne o*da/fwôo atông o-jwo mě*. Nké o/bwa o-sét mě o/fu, nn*sa to kafâ*. *Dachi a-chîzîim dyizong-chwǒm ńdyín nang kabónge*.

²⁷ Ca ké dyishí-kaku ńké Pyísaga, a-tún bushûyû ne busyísen ne kyicê ńkyí esû edabyí ne ńkyí edaríbî e-jâ. Kpúrî kanong kanong ké ńkyí amu a-ri ng, ké nǎ, wo aa*ba/chi a-nyáng kace ńké Jódan*.

²⁸ Sét Jóshwa ńkyí odachi. Fé ǎ busa, ké nǎ, nyǐ o/chi o-ca banet-Ézerel kashú ba-nyáng Jódan ba-da-koo esí nyí amu a-ri ng.

²⁹ Ne byi-waa kâng ké owo mú o/bírî kashú ne oshê mú Bét-Pôo.