Dyitórónómyi 29 - Bokyi Bible

Ocím mú Óburúkpâbí o/ryí ne Banet-Ézerel ké Esí nyí Mówep

¹ Ńnyín byiraa-ocím eryí ḿbyí Óburúkpâbí o/sét Músis o/fu, oryí ne banet-Ézerel ké esí nyí Mówep. Ḿbyín kángkáng byi/cibi ne ocím mú Óburúkpâbí o/mû oo/ryí ne mbé ké kaku ńké Sána.

² Músis o/kó kángkáng banet-Ézerel kyikit kyibónge o-sét kámbé o/fu, ben bayén ba/ri ńkyí Óburúkpâbí o/chi otu mú Éjip ne banet-ashí-oshê emen ne oshê emen omúmú.

³ Ben ba/ri afaníkong ne biǐtí-akat ḿbyí Óburúkpâbí o/chi.

⁴ Nké tete dyicí ńdyí kurún, nyǐ o*da běn echi ne ba-nyît kyikû* kyi-kim ne byěm ḿbyí ben ba/ri*.

⁵ Ké bajam-aje bafee, Óburúkpâbí o/tông běn kiǐfáng ba-cen ké kyikim-dyikán ne byídí enen ne abe nyí bamu ba-fâ ké byiká byi*da/kâa*.

⁶ Ben ba*da/já berêt mú badaryí* nang bato ḿbé badajwáp* nké Óburúkpâbí o/kye běn kángkáng byěm ḿbyí bamu ba-ryuu ng eringe nyí oda běn etángê o/fu, nyǐ o-chi i Osówo enen.

⁷ Ne ké nkéré mú be byi/ribi ké kyikit ńkyín, Otu Síhon mú Héshibon ne Otu Ôok mú Báshan ba/byí ba-bâ ebanwa ne be. Nké ba byi/kpógê kámbé,

⁸ byi-koo esí ebe, byi-kyii kányí byi-kye byikû-banet ḿbyí Rúben ne Gât ne kyicê-kyikû-banet ńkyí Manáse.

⁹ Tî n̂g kángkáng byiraa ḿbyí ocím eryí mún ne atyém enen, eringe nyí nang ebóng chwǒm ńkyí bamu ba-chi i kyida běn ebyí dyishí.

¹⁰ Kurún, ben baa/bwom ké bushú ḿbú Óburúkpâbí mú mu Osówo enen, ben ashí kángkáng, banet-ashí-oshê ne bakínkán ne banyinchéng ne

¹¹ banyinyi ne bwǎn enen ne bacinbánet ḿbé mbe ba-kyú u ne ben, ba-sá ng běn ekwón, ba-tó ng běn omu.

¹² Ben bamu nyín kurún ba/fu, ba-ryí i ocím mún mú Óburúkpâbí mú mu Osówo enen mu o-ryí i ne ben, ba-bángê ké kángkáng byěm ḿbyí ba/chi ba-ryí ocím mún,

¹³ eringe nyí Óburúkpâbí odabángê o/fu, ben ba-chi i banet emen ne nyǐ o-kyú u Osówo enen, wǎ eringe nyí nyǐ o/ryí běn ne banchí enen ḿbé kpákpá ocím, ḿbé ba/mû Ébarahâm ne Ázik ne Jekôp.

¹⁴ *Chí ben nké nke* nké Óburúkpâbí mu o-ryí i ocím mún ne ben* byije ḿbyí ocím eryí ámu*.

¹⁵ Nyǐ mu o-ryí i kámú ne be ashí kángkáng mú byi/bwom nyín ké bushú emen kurún ne kángkáng bwǎn enen ḿbé ba/chi ba-fwon.

¹⁶ Zîim m̂ eringe nyí dyikpen dyi/mû ké Éjip ne eringe dyi/mû ké nkéré mú ba/cen ké esí nyí eshê ekíri.

¹⁷ Ben ba/ri banunut-erím-bakye ebe nyí ba/sím ké byichí ne aká ne syílyíba ne gûl.

¹⁸ Tî n̂g ké dyityém ba/fu, onet nang obónge, nang onyinchéng nang onyinyi nang kyikû-banet, mú o/bwom nyín kurún, o*dachi o-mîng Óburúkpâbí mú mu Osówo enen* o-fé esówo nyí eshê ekíri*. Ńkyín kyi/chi kyi-kyú wǎ oriri-kyichí mú odatím o-kán, o-bírî kyichí ńkyí kyidaruu, ńkyí onet odaryí o-kpú.

¹⁹ Tî n̂g ké dyityém ba/fu, onet o*fí nyín kurún* mú mu o-jwo ng biǐtí-byije ḿbyín* o-bwa o-nîm byiko emen o/fu, kyi/chi kyi-ca kanong ne nyǐ* nang nyǐ o/shwane dyishí o-ca bukwóp ḿbú bu/nyîn ǎ*. Ńkyí ánkyi kyi-ju ng běn ashí amúmú, nang banet ḿbé banong nang ḿbé mbe ba-chi i byibî.

²⁰ Óburúkpâbí oo*ba/chi o-pwoo dyizong-onet ándyi*. Nké kiǐtí-kafâ esa ńké Óburúkpâbí ka/chi ka-mang onet ámu ké byiko ne kángkáng byishû ḿbyí ba/sáng ké nwet mún byi/chi byi-róng ǎ ké byiko tete Óburúkpâbí o-ju ǎ.

²¹ Óburúkpâbí o/chi o-kúng ǎ o-tông ǎ ekap nyí odatông kángkáng byikû-banet ḿbyí Ézerel, ne o/chi o-bâ ǎ ne busông ké byiko ḿbú bu/tyeem ne kángkáng byishû ḿbyí ba/sáng ké ocím eryí mú ba/sáng ké nwet mú byěm ḿbyí Óburúkpâbí o/tángê.

²² Ké bankéré ḿbé mbe ba-bâ ké kashú, bwǎn enen ne bacinbánet ḿbé ba/fím tíbítíbí ba/chi ba-ri byěm-busông ne afaníkong nyí Óburúkpâbí oo/bê ne nyǐ ké esí enen.

²³ Byifát byi/chi byi-waa kafâ dyikáá byi-firi ne bano ne aká nyí adamang okwâ. Baa*ba/chi ba-kwón chwǒm* ne nang biǐbyâa bii*byí to ké mbyí*. Esí enen e/chi e-kyú wǎ eshê nyí Sódom ne Gomóra ne Ádima ne Zébom, nyí Óburúkpâbí o/bên ké nkéré mú kafâ ka/jang ǎ esa.

²⁴ Ne ejíí emúmú e/chi e-bí kâng e/fu, ebóng Óburúkpâbí o/chi ńkyín ké esí ebe. Ebóng kyi/chi ne kafâ ka-jang ǎ esa.

²⁵ Ne ejá nyí badafaa e/chi e-kyú něen, nkyi ké nǎ, banet ḿbé Óburúkpâbí ba/bên ocím mú mbé ba/mû ba/ryí ne nyǐ mú mu Osówo mú banchí ebe ḿbé kpákpá, ké nkéré mú o/fîm kámbé ba-byí ké Éjip.

²⁶ Mbé ba/fé esówo ekíri nyí mbé ba/mû ba*da/fé ne* esówo nyí Óburúkpâbí o/sét kámbé o/fu, ba*dafé*.

²⁷ Ké bubwô ámbu kâng, kafâ ka/sa Óburúkpâbí ne banet emen ne o-kúng kángkáng byishû ḿbyí ba/sáng ké nwet mún o-bâ ne mbyí ké esí ebe.

²⁸ Kafâ ka/sa Óburúkpâbí kanong kanong ne ké kiǐtí-kafâ esa emen ánke, nyǐ o/ró kámbé ké esí ebe, o-pwó kámbé ké esí nyí e*da/já kámbé*. Ne ké esí ányi nké mbe kurún.

²⁹ Byěm byikíri mbyi kô, ḿbyí Óburúkpâbí mú mu Osówo eten oo/tî ké kadip. Nké nyǐ oo/byí ne byije emen kyíjí, ne be ne bwǎn eten byi-man byi-tî kámbyí ne banyá.