Dyitórónómyi 28 - Bokyi Bible

Banjware ḿbé Byije etî

¹ Â ben ba/chi ńkyí Óburúkpâbí mú mu Osówo enen mu o-sét ng běn, ba-tî kángkáng byije emen ḿbyí me mu n-kyâ běn ne atyém enen kurún, nyǐ o/chi o-chi běn ba-kyú kiǐtí ba-shwôm oshê nang orá ké ejíí.

² Chi n̂g ńkyí Óburúkpâbí mú mu Osówo oda běn esét ne kángkáng banjware ḿbén ba/chi ba-já běn.

³ Óburúkpâbí o/chi o-jware eshê enen ne byifát enen.

⁴ Óburúkpâbí o/chi o-jware běn o-kye běn bwǎn chwóó ne byíkwôn chwóó ne bampong ne ebû chwóó.

⁵ Óburúkpâbí o/chi o-jware byíkwôn enen ne byiryíng ḿbyí badachi ké mbyí.

⁶ Óburúkpâbí o/chi o-jware nang ebóng chwǒm ńkyí bamu ba-chi i.

⁷ Óburúkpâbí o/chi o-kpógê banet-bushwôn enen â ba/kye běn bunwa. Ba-fím m kyicê kyibónge ba-kye běn bunwa, nké â ba-kú ba-chêe ng běn, ba-chêe ng ba-jâ byicê byimúmú.

⁸ Óburúkpâbí mú mu Osówo enen o/chi o-jware bǎmkpóngé enen, o-chi bankám enen ba-sú ne byiryíng. Nyǐ o/chi o-jware běn ké esí nyí nyǐ mu o-kyâ běn.

⁹ Â ben ba/chi ńkyí Óburúkpâbí mú mu Osówo enen mu o-sét ng běn, ba-tî kángkáng byije emen, nyǐ o/chi o-chi běn ba-firi banet emen wǎ eringe nyí nyǐ oo/ryí ocím.

¹⁰ Ne kángkáng banet ḿbé ké ejíí kâng ba/chi ba-ri ba/fu, Óburúkpâbí oo/cá běn o/fu, ben bakyú banet ḿbé emen nyǐ oyén, ne ba/chi ba-kû běn eshî.

¹¹ Óburúkpâbí o/chi o-kye běn bwǎn chwóó ne byitú chwóó ne byíkwôn chwóó ké esí nyí nyǐ o/ryí banchí enen ḿbé kpákpá ocím o/fu, nyǐ o-kyâ běn.

¹² Nyǐ o/chi o-fîm omu ké kiimbâng-kyikit emen ńkyí mu o-tî ng kámú kyíbóng o-twóm běn ké bachíchí-bankéré emen, o-jware kángkáng bǎmkpóngé enen, eringe nyí ben ba/chi ba-pwoo eshê chwóó byěm, nké ben baa*pwoo ne mbé*.

¹³ Óburúkpâbí mú mu Osówo enen o/chi o-chi běn ba-kyú bambwôp kashú-banet ké eshê kángkáng, *chí banryî esim*. Ben kángkáng nkéré ba-câ kashú, baa*róng* â ben ba/tî kángkáng byije emen ḿbyí mu n-kyâ běn ne atyém enen kurún.

¹⁴ Nké ben baa*man ba-bên kámbyí ké bukwóp nang burá* ba-fé nang esówo ekíri*.

Ńkyí kyidachi â ba/né echi ńkyí Óburúkpâbí o/sét

¹⁵ Nké â ben ba/né echi ńkyí Óburúkpâbí mú mu Osówo enen o/sét běn, ne ba*da/tî kángkáng byije emen ḿbyí me mu n-kyâ běn ne atyém enen kurún* kángkáng byibî-byěm ḿbyín byi/chi byi-chi běn.

¹⁶ Óburúkpâbí o/chi o-shú eshê enen ne byifát enen.

¹⁷ Óburúkpâbí o/chi o-shú byíkwôn enen ne byiryíng ḿbyí bamu ba-chi i ké mbyí.

¹⁸ Óburúkpâbí o/chi o-shú běn, o-kye běn boǒnyín-bwǎn ne boǒnyín-byíkwôn ne boǒnyín-bampong ne ebû.

¹⁹ Óburúkpâbí o/chi o-shú nang ebóng chwǒm ńkyí bamu ba-chi i.

²⁰ Â ben ba/chi kyibî ba-né Óburúkpâbí, nyǐ o/chi o-bâ běn ne bukyû ne atyém yógeyóge ne afaníkong ké kángkáng byěm ḿbyí bamu ba-chi i tete o-ju běn ashí kángkáng ochéé óchee.

²¹ O/chi o-twóm běn byirwóm ké bunye ké bunye tete onet nang obónge ké burwám enen oo*waa to* ké esí nyí ba-kú ba-bâ ekyú ké nyǐ*.

²² Óburúkpâbí o/chi o-twóm běn erwôm nyí mbyép-byiko ne kyibî-biimumudúng. O/chi o-twóm kyibî-burwom ne kiǐsínsóng-bufú kyi-ju byíkwôn enen. Busông ḿbún bu-waa ng ne ben tete ba-kpú.

²³ Omu oo*ba/chi o-na* ne esí enen e-kû ng eshwane wǎ kiǐré.

²⁴ Ńkyí o/mû o/chi o-twóm omu, Óburúkpâbí o/chi o-twóm kyibî-afú ńkyí kyidatugi édúkǎndú tete ba-kpú ashí amúmú.

²⁵ Óburúkpâbí o/chi o-chi banet-bushwôn enen ba-kpógê běn. Ba-fím m kyicê kyibónge ba-kye běn bunwa, nké ba-chêe ng kámbé ba-jâ byicê byimúmú, ne bushî bu/chi bu-róng kángkáng banet ḿbé ké ejíí ké nkéré baa/ri ńkyí nkyi kyi-chi i běn.

²⁶ Ké nkéré mú baa/kpú, bunurung ne enyam byi/chi byi-ba-ryí byikwóm-enyam-byiko enen, ne onet o*fí mú o/chi o-ró kámbyí*.

²⁷ Óburúkpâbí o/chi o-twóm běn byifyí wǎ eringe nyí o/twóm banet ḿbé Éjip. O/chi o-chi enyam-byiko enen e-puu byibáp. Biǐnsǎa byi/chi byi-chi běn, byi-kû běn eyú, nké bukye bu*fí ḿbú budachi kámbyí byi-man*.

²⁸ Óburúkpâbí o/chi o-chi běn ba-kpet efún. O/chi o-twóp běn achi esêe ne atyém yógeyóge.

²⁹ Ba/chi ba-kûcen ne esû ba-fwôo ng abwô wǎ bansêe achi, ne baa*ba/chi ba-nyît kyicê ńkyí bamu ba-jâ*. Nang ba-chi ebóng, kii*byí běn dyishí*. Ba-cít ng běn kángkáng nkéré ba-jii běn byěm, ne onet oo*ba/chi o-chi mú oda běn echwáp*.

³⁰ Ben ba/chi ba-ryí búkyî ne wǎn-onyinyi, nké onet okíri nké odarí ne nyǐ. Ben ba/chi ba-bi kyise, nké baa*ba/chi ba-kyú ké nkyí*. Ben ba/chi ba-kwón kyifát-byichí, nké baa*ba/chi ba-ryí byirim emen*.

³¹ Ba-fee ng mpong enen ba-ri ké achi, nké baa*ba/chi ba-ryí enyam emen nang ebónge*. Ba-tut ng boonyam-atû enen ba-dim ne mbú, bamu ányi ba-tún n achi, nké baa*ba/chi ba-bwa esim ne mbú ba-ba-kye běn*. Ba-kúng ng etám-ebû enen ba-kye banet-bushwôn enen, nké onet oo*ba/chi o-chi mú oda běn echwáp*.

³² Ba/chi ba-kúng bwǎn enen ba-kye bacinbánet wǎ básóng, bamu ányi ba-tún n achi. Kángkáng dyicí, ba-tún n achi dyikáá ba/fu, bwǎn enen ba/chi ba-fyi.

³³ Oshê mú kyíjí o/chi o-kúng kángkáng byíkwôn ḿbyí ba/chi bǎmkpóngé ba-sóng běn ne ba-kwón, ben bayén baa*koo chwǒm kyikíri* kyi-cibi ne ocît mú bada běn ecít kángkáng nkéré* ne kyibî-dyitî ńkyí bada běn etî*.

³⁴ Afaníkong enen eri a/chi a-chi běn ba-kpet efún.

³⁵ Óburúkpâbí o/chi o-cít byiká enen ne bantimelô-byibáp ḿbyí byida běn ekûnwa. Byifyí byi/chi byi-byí běn kyi-fím ké dyishí byi-tîm ké byiká.

³⁶ Óburúkpâbí o/chi o-kúng běn ne otu enen o-jâ ne ben ké oshê mú o*fí mú enen* mú nang ben nang banchí enen ḿbé kpákpá ba*da/kyú ne nang kabónge*. Ké oshê ámu, ben ba/chi ba-fé erím-bakye nyí ba/sím ké byichí ne aká.

³⁷ Ké eshê nyí Óburúkpâbí o/chi o-pwó běn byiryibyiryi, byiko byi/chi byi-kaa banet ké ńkyí kii/chi běn. Ba/chi ba-jwó běn, ba-fát běn kiikuku.

³⁸ Ben ba/chi ba-kwón esang-byichí chwóó, nké nyí badabóng ee*jê* ké nǎ, agurubí a/chi a-ryí byíkwôn enen.

³⁹ Ben ba/chi ba-kwón kyifát-byichí, ba-tún kánkyí kanong, nké ben baa*ba/chi ba-bóng byirim emen* ba-jwáp nang bato ḿbé badachi ké mbyí* ké nǎ, boonyam bu/chi bu-ryí asín-byichí ányi.

⁴⁰ Byichí-ólif byi/chi byi-byí byi-kán ké kángkáng esí enen, nké ben baa*ba/chi ba-já nang onyin-bakút-ólif* ké nǎ, byirim emen byi/chi byi-róng kyísí kpók.

⁴¹ Ben ba/chi ba-fwon bwǎn, nké baa*ba/chi ba-ri kámbé* ké nǎ, ba/chi ba-kám kámbé ké byití ba-dim ne mbé.

⁴² Boonyam bu/chi bu-ryí kángkáng byíkwôn enen.

⁴³ Bacinbánet ḿbé mbe ba-kyú u ké esí enen ba/chi ba-kûjá busa ba-ca kashú, busa ḿbú enen bu-bwa ng esim ésim.

⁴⁴ Mbé ba/chi ba-já akpuga nyí bada běn epwoo, nké ben baa*ba/chi ba-já nyí badapwoo kámbé*. Ké nkuli kyikû, mbé ba/chi ba-firi batu enen.

⁴⁵ Kángkáng byěm-busông ḿbyín byi/chi byi-bâ běn ké byiko, ne byi/chi byi-waa ne ben tete ba-kpú, ké nǎ, ben ba*da/chi ńkyí Óburúkpâbí mú mu Osówo enen mu o-sét ng běn* ba-tî kángkáng byije emen ḿbyí o/kye běn*.

⁴⁶ Byěm-busông ámbyi byi/chi byi-kyú ekap nyí e/chi e-waa běn ké byiko ne banyá, nyí mpan mú Osówo o/pan běn ne bwǎn enen.

⁴⁷ Óburúkpâbí o/jware běn ké kángkáng akwóp, nké ba*da ǎ ekye ofê ne bunyîn-dyityém*.

⁴⁸ Ké bubwô ámbu kâng, ben ba/chi ba-kyú bǎmgbán ḿbé banet-bushwôn ḿbé Óburúkpâbí o/chi o-twóm ba-ba-nwa ne ben. Esong e/chi e-nwa běn, omu o-jê běn, ba-firi osíndyíbang, kángkáng byěm byi-kaa běn. [Óburúkpâbí] o/chi o-kye běn kyibî-busông tete ba-kpú.

⁴⁹ Óburúkpâbí o/chi o-bâ ne oshê mú o/fím tíbítíbí, mú baa*jwo ejá nyí mbe ba-raa ng* o-ba-nwa ne ben. Mbé ba/chi ba-róng ba-ba-kám běn wǎ kakô.

⁵⁰ Mbé ba/chi ba-bên atyém, ne baa*ba/chi ba-ri onet nang obónge bafip* nang wǎsíng* nang okínkán*.

⁵¹ Mbé ba/chi ba-ryí byitú ne byíkwôn enen, ne esong e/chi e-nwa běn tete ba-kpú. Baa*ba/chi ba-mîng běn ne nang esang-byichí* nang bato* nang bakút-ólif* nang bampong* nang ebû* ne ben ba/chi ba-kpú.

⁵² Mbé ba/chi ba-kye bunwa ké oshê nang orá mú mu ké esí nyí Óburúkpâbí mú mu Osówo enen mu o-kyâ běn, ne biinshinshwan-biǐnyáám-ekpe ḿbyí byi/wâng eshê enen, ḿbyí ben ba/fé dyityém ké mbyí, byi/chi byi-myii.

⁵³ Ké nkéré banet-bushwôn enen ba-kú ba-wâng ng běn ké eshê enen, byiryíng byi/chi byi-kaa běn ḿbyí ben ba/chi ba-ryí nang bwǎn ḿbé Óburúkpâbí mú mu Osówo enen oo/kye běn.

^54-55 Nang onet mú mu kanong nǎ! nang mu kiǐtí nǎ! oo*ba/chi o-chîjá ńkyí odaryí* ńkyí kyi/chi kyi-chi ǎ o-ryí bwǎn ḿbé emen, ké nǎ, o*fí to ne byiryíng byikíri*. Nang wǎn-boné emen nang onyi emen mú oda ǎ ejê, nang bwǎn emen ḿbé ba/waa oo*ba/chi o-kye kámbé enyam-bwǎn emen*.

^56-57 Nang onyinyi mú mu kanong nǎ! nang mu kiǐtí nǎ! mú o/já esang nyí bada ǎ eyip o-dim nang ebóng kyikit ńkyí mu o-wâa ng, o/chi o-chi dyizong-édúú ándyi dyibónge. Ké nkéré mú banet-bushwôn ámbe ba-kú ba-kyâ oshê emen bunwa, byiryíng byi/chi byi-kaa ǎ! ḿbyí o/chi o-ryí wǎn emen mú odafwon abeabe cibicibi ne kiǐbî, ké kajii. Oo*ba/chi o-kye nang otyép emen mú mu o-jê ng ǎ* nang wǎn emen onyin*.

⁵⁸ Â ben ba/da/tî kángkáng byěm ḿbyí Osówo o/tángê běn* ké dyityém* ḿbyí ba/sáng ké nwet mún* ne â ba*da/fé kiǐtí ne kiinchi bushî-dyizîn ńdyí Óburúkpâbí mú mu Osówo enen*

⁵⁹ nyǐ o/chi o-twóm běn ne bwǎn enen byirwóm ḿbyí byi*fí ne bukye* ne byibî-erwôm byikíri ḿbyí bii*nwa eku*.

⁶⁰ O/chi o-chî běn etwóp azong-byirî-byirwóm ámbyi, ḿbyí ba/mû ba/rwôm ké Éjip, ne baa*ba/chi ba-nyange*.

⁶¹ Nyǐ o/chi o-twóm to kángkáng azong-byirwóm nyí ba*da/sáng ké nwet mún mú byije-Osówo* ne ba/chi ba-kpú.

⁶² Nang ba-bwa ba-jê jangjang wǎ ékpére nyí nyi kyíbóng, boǒnyín-banet ké burwám enen nké budafem, ké nǎ, ben ba*da/chi ńkyí Óburúkpâbí mú mu Osówo enen o/sét běn*.

⁶³ Wǎ eringe nyí kyi/nyîn Óburúkpâbí ne o-chi běn ba-já byěm, o-chi běn ba-jê chwóó, éné to nké kyi/chi kyi-nyîn ǎ o-ju běn, o-chi běn ba-róng. Ba/chi ba-fîm běn ké esí nyí ba-kú ba-bâ ekyú ké nyǐ.

⁶⁴ Óburúkpâbí o/chi o-pwó běn byiryibyiryi ké kángkáng eshê ekíri, kyi-fím ké bukô-ejíí bubónge kyi-ribi ké ḿbú áku. Ké eshê ányi nké ben ba/chi ba/fé erím-bakye nyí ba/sím ké byichí ne aká, nyí nang ben nang banchí enen ḿbé kpákpá ba/mû ba*da/fé ne*.

⁶⁵ Baa*ba/chi ba-ri bunyîn-dyityém ké kyikit nang kyibónge* kyikit kyi*fí ńkyí badafu kyi/já běn*. Óburúkpâbí o/chi o-cít atyém enen ne káryúryú ne asa ejwâa ne dyityém ezú ké byěm.

⁶⁶ Dyikpen enen kángkáng nkéré dyi-kyú u ké bukwóp ḿbú bukyû. Bushî bu-róng ng běn buchú ne esû, ne ba-kû ng eshî bukyû kángkáng nkéré.

⁶⁷ Nang ebóng chwǒm nké ba/ri, atyém enen a-firi ng ne bushî. Kángkáng dyicófóróng, ba-kû ng eryuu ba/fu, dyikurúku dyifyi. Kángkáng dyikurúku, ba-kû ng eryuu ba/fu, dyicófóróng dyicé.

⁶⁸ Óburúkpâbí o/chi o-twóm běn ba-bwa esim ké Éjip, ké bǎnsukyíkang, nang ké [nyǐ] o/mû oo/sét o/fu, ben baa*ba/chi ba-chîce áku*. Áku nké ben ba/chi ba-kan byiko enen eyip ba-shee banet-bushwôn enen wǎ básóng, nké onet o*fí mú odaryuu o/fu, nyǐ o-ré ng běn*.