Dyitórónómyi 27 - Bokyi Bible

Byije ḿbyí ba/sáng ké Aká

¹ Ne Músis o-bwom kâng ne banet-ashí-Ézerel, o-sét banet-Ézerel o/fu, tî n̂g kángkáng byije ḿbyí me mu n-kyâ běn kurún.

² Ké dyicí ńdyí ben ba/chi ba-nyáng kace ńké Jódan ba-nung ké esí nyí Óburúkpâbí mú mu Osówo enen mu o-kyâ běn, cá n̂g aká nyí aryên ba-tî, ba-sabe kányí mpén,

³ ba-sáng byije ḿbyín kángkáng ké aká ányi. Ké nkéré mú baa/nung ké esí ányi nyí enong, nyí edabát byiryíng, nyí Óburúkpâbí mú mu Osówo mú banchí enen ḿbé kpákpá o/ryí běn ocím,

⁴ ne ba/firi ké kyicê-kace-Jódan ńkyí áku, yip n̂g aká ányi ba-bi ké kaku ńké Ébal, ba-sabe kányí mpén wǎ eringe nyí me mu n-sét ng běn kurún.

⁵ Kúng n̂g aká nyí ba*da/két ne ké kiǐré* ba-bi kyikit-kyifen-Osówo echi,

⁶ ké nǎ, kyikit-kyifen echi nang kyirá nké ben ba/bi ba-tî Óburúkpâbí, ba-man ba-bi kánkyí ké aká nyí ba*da/két ne kányí*. Ányi nké ba/chi ba-kûchi byifen ḿbyí badashí oshǐng,

⁷ ne ányi nké ben badachi kyifen ńkyí kyikwáré ne Óburúkpâbí, ba-ryí byiryíng-kyifen ánkyi ne barî, ba-kyú ké bunyîn-dyityém ké bushú ḿbú Óburúkpâbí mú mu Osówo enen.

⁸ Sáng n̂g kángkáng byije-Osówo kanong kanong ké aká ányi nyí ba/sabe mpén.

⁹ Ne Músis o-bwom kâng ne banchi kyifen-Osówo ḿbé kyikû ńkyí Lyíva o-sét banet-Ézerel o/fu, banet-Ézerel, fwôo n̂g atông ba-jwo mě. Kurún, ben ba/firi banet ḿbé Óburúkpâbí mú mu Osówo enen.

¹⁰ Ké bubwô ámbu, chi n̂g ńkyí oda běn esét, ba-tî kángkáng byije emen ḿbyí me mu n-kyâ běn kurún.

Byishû ḿbyí Byije ebên

¹¹ Ne Músis o-sét kâng banet-Ézerel o/fu,

¹² ké nkéré mú ben baa/nyáng kace ńké Jódan, byikû-banet ḿbyín byibwom kyíbóng-kaku ńké Gérízim, ké nkéré ba-kú ba-kó ng banjware ḿbé Óburúkpâbí odakye banet. Byikû ámbyi něen, Syímyon ne Lyíva ne Júda ne Ézaka ne Josêf ne Běnjámin.

¹³ Byikû-banet ḿbyín byibwom kyíbóng-kaku ńké Ébal ké nkéré ba-kú ba-kó ng byishû ḿbyí Óburúkpâbí odashú banet. Mbyí něen, Rúben ne Gât ne Ásha ne Zébélon ne Dǎn ne Nafatályi.

¹⁴ Bǎmgbán-banchi kyifen-Osówo ba/chi ba-raa byiraa ḿbyín ne ejá kyíbóng kyíbóng ba/fu,

¹⁵ Osówo oshú nang yeě mú o/sím orím-bukye ké buká nang ké kyichí nang ké kiǐré o-kûfé kámú ké kadip. Bakye esháng ba-nut ne Óburúkpâbí. Kángkáng banet ba/chi ba-faa ba/fu, kyi/bát kyikyú éné.

¹⁶ Osówo oshú nang yeě mú o/dángê bonchí nang boné. Kángkáng banet ba/chi ba-faa ba/fu, kyi/bát kyikyú éné.

¹⁷ Osówo oshú nang yeě mú o/yángê buti ḿbú orî-onet. Kángkáng banet ba/chi ba-faa ba/fu, kyi/bát kyikyú éné.

¹⁸ Osówo oshú nang yeě mú o/tông nsêe achi kiǐfáng ńkyí o*fí o-jâ*. Kángkáng banet ba/chi ba-faa ba/fu, kyi/bát kyikyú éné.

¹⁹ Osówo oshú nang yeě mú mu o-ryí i bacinbánet nang bwǎn-byibén nang banyǐnkú acît. Kángkáng banet ba/chi ba-faa ba/fu, kyi/bát kyikyú éné.

²⁰ Osówo oshú nang yeě mú o/cábê bonchí emen, o-rí ne onyi-bonchí emen nang orá. Kángkáng banet ba/chi ba-faa ba/fu, kyi/bát kyikyú éné.

²¹ Osówo oshú nang yeě mú o/rí ne enyam. Kángkáng banet ba/chi ba-faa ba/fu, kyi/bát kyikyú éné.

²² Osówo oshú nang yeě mú o/rí ne wǎn-boné emen mú onyinyi, nang ba/fím kyicê kyibónge. Kángkáng banet ba/chi ba-faa ba/fu, kyi/bát kyikyú éné.

²³ Osówo oshú nang yeě mú o/rí ne boné-onyi emen. Kángkáng banet ba/chi ba-faa ba/fu, kyi/bát kyikyú éné.

²⁴ Osówo oshú nang yeě mú o/ju onet ké kadip. Kángkáng banet ba/chi ba-faa ba/fu, kyi/bát kyikyú éné.

²⁵ Osówo oshú nang yeě mú o/koo akpuga o-ju onet mú o*da/chi chwǒm*. Kángkáng banet ba/chi ba-faa ba/fu, kyi/bát kyikyú éné.

²⁶ Osówo oshú nang yeě mú o*da/tî kángkáng byije emen*. Kángkáng banet ba/chi ba-faa ba/fu, kyi/bát kyikyú éné.