Dyitórónómyi 26 - Bokyi Bible

Byije ḿbyí Byiryíng efuu

¹ Ké nkéré mú ben baa/koo esí nyí Óburúkpâbí mú mu Osówo enen mu o-kyâ běn, ba-kyú ké nyǐ,

² nang yeě ké burwám enen o/chi o-kúng mbwôp kashú-kyíkwôn nang kyirá ńkyí odafuu o-fé ké kaakye, o-kúng kánkyí o-ca ne nkyí ké kyikit ánkyi kyibónge ńkyí badafé Óburúkpâbí.

³ Oca o-kâm nchi kyifen-Osówo mú mu o-chi i bǎmkpóngé ké nkéré ámu, o-sét ǎ o/fu, me mu n-sét ng Óburúkpâbí mú mu Osówo ejí n/fu, me nn/nung ké esí nyí o/ryí banchí eten ḿbé kpákpá ocím o/fu, nyǐ o-kyâ bě.

⁴ Nchi kyifen-Osówo ámu o/chi o-koo kaakye ánke ne wo o-tî kánké ké bushú-kyikit-kyifen echi ńkyí Óburúkpâbí mú mu Osówo eyên.

⁵ Wo kâng a/chi a-bwom ké bushú ḿbú Óburúkpâbí a-raa byiraa ḿbyín a/fu, bonchí ejí mú kpákpá o/mû onet-Áram mú o/mû o-yêe ng ké byikit, o/mû o*fí ne kyise* ne o/kúng kyikû-banet emen o-da-kyú ké Éjip. Ké nkéré mú ba/jé Éjip, mbé ba/mû ba*da/jê* nké mbé ba/bírî ba-firi kiimbâng-oshê ńkyí nkyi ne busa.

⁶ Banet ḿbé Éjip ba/tî bě kyibî-dyitî, ba-chi bě byi-chi bǎmkpóngé ké busa wǎ básóng.

⁷ Ne be byi-tii kâng byi-kó Óburúkpâbí mú mu Osówo mú banchí eten ḿbé kpákpá. Nyǐ o/jwo bě, o-ri busông eten ne bafip eten.

⁸ Ké kiǐtí-busa emen, nyǐ o/nyii bě ké abwô nyí Éjip. Nyǐ o/chi biǐtí-byěm-akat, o-chi byěm ḿbyí byidachi bushî byi-chi.

⁹ Nyǐ o/kúng bě o-bâ ne be nyín ne o-ba-kye bě esí ńnyín nyí enong, nyí edabát byiryíng.

¹⁰ Kántîk, ké bubwô ámbu, me m/bê Óburúkpâbí ekye mbwôp kashú-byiryíng ḿbyí n/fuu, ḿbyí nyǐ oo/kye mě. Kúng kâng kaakye ánke a-tî kyísí, ké bushú ḿbú Óburúkpâbí, a-kye ǎ ofê ányi.

¹¹ Kûryí kâng kángkáng byěm ḿbyí byinong, ḿbyí Óburúkpâbí mú mu Osówo eyên oo/kye ǒ ne kyikû-banet eyên, a-mîng to bǎmgbán-banchi kyifen-Osówo ne bacinbánet ḿbé mbe ba-kyú u ne ben ba-ryí kámbyí.

¹² Ké kángkáng aje achât, kye n̂g eyáré nyí byikit diǐkpú, nyí badakúng kyikit kyibónge ba-kye bǎmgbán-nchi kyifen-Osówo ne bacinbánet ne bwǎn-byibén ne banyǐnkú, eringe nyí mbé badajá ńkyí badaryí kyi-kwárê kámbé ké kyikim-oshê nang kyirá. Ké nkéré mú baa/chi ńkyín,

¹³ sét n̂g Óburúkpâbí ba/fu, eyáré-ociring nyí byikit diǐkpú e*da/waa nang ebónge* ké kyise ejí*. Me nn/kúng kányí n-kye bǎmgbán-nchi kyifen eyên ne bacinbánet ne bwǎn-byibén ne banyǐnkú, wǎ eringe nyí wo a/sét mě a/fu, me nchi. Me n*da/bên* n-ráp nang kyije nang kyibónge* kyi-kim ne eyáré nyí byikit diǐkpú*.

¹⁴ Me n*da/ryí onyin emen nang obónge* ké nkéré m/mû n-ta ng dyikán*. Me n*da/kúng onyin emen nang obónge m-byí ne mǔ kyíjí* ké nkéré mú me m/mû onet mú bada ǎ eciring* ne n*da/kúng ne onyin emen nang obónge* [n-kye bakúsí*.] Me nn/chi ńkyí wo a/sét mě, ǎ Óburúkpâbí. Me nn/chi kángkáng byěm ḿbyí wo a/sét kyi-kim ne eyáré nyí byikit diǐkpú.

¹⁵ Bwom ké kyikit-ociring eyên ńkyí kyíbóng a-tún achi kyísí, a-jware banet eyên ḿbé Ézerel. Jware to esí ńnyín nyí enong, nyí edabát byiryíng, nyí wo aa/kye bě wǎ eringe nyí a/ryí banchí eten ḿbé kpákpá ocím.

Banet ḿbé Óburúkpâbí Oyén

¹⁶ Kurún, Óburúkpâbí mú mu Osówo enen mu o-sét ng běn o/fu, ben batî byije emen kángkáng. Ké bubwô ámbu, tî n̂g kámbyí kanong kanong ne atyém enen kángkáng.

¹⁷ Kurún, ben baa/nyît Óburúkpâbí wǎ Osówo enen. Ben baa/ryí ocím ba/fu, ba-chi i ńkyí nyǐ oda běn esét, ba-tî kángkáng byije emen, ba-chi kángkáng byěm ḿbyí nyǐ mu o-sét ng běn.

¹⁸ Kurún, Óburúkpâbí oo/koo běn wǎ banet ḿbé emen nyǐ oyén, wǎ eringe nyí nyǐ o/ryí běn ocím, ne mu o-sét ng běn o/fu, ben batî kángkáng byije emen.

¹⁹ Nyǐ o/chi o-chi běn ba-kyú kiǐtí-oshê ba-shwôm oshê nang orá mú nyǐ oo/chi, ne [banet ba/chi ba-kye dyizîn emen akpee ne ofê.] Ben ba/chi ba-kyú banet ḿbé emen nyǐ oyén wǎ eringe nyí nyǐ o/ryí ocím.