Dyitórónómyi 25 - Bokyi Bible

¹ Â banet-Ézerel ashí afee ba/ce ké esuk mpan edapan, mpan o-nwa onet obónge, o-bên onet mú áku.

² Â ba/fu, bamín onet mú mpan o/bên ǎ, nkêt mpan o/chi o-chi onet ámu o-rí o-bírî bushú kyísí ne ba-mín ǎ. Ocím-buchí mú bada ǎ edíp o-bwom m ké dyizong-kyibî ńkyí o/chi.

³ Ba-man n ǎ emín bajam-buchí bafee, nké boo*man bu-shwôm éné*. Â bu/jê bu-shwôm éné, kyi-wuri ng ǎ éshwân ké bushú-banet.

⁴ *Da n̂g ebwá mpong ocím* â ba/tî kámú ké bǎmkpóngé ḿbé odacím esang-byichí*.

Ńkyí adachi Wǎn-Boné Eyên mú Onyinchéng, mú oo/kpú

⁵ Â bwǎn-bané ḿbé banyinchéng ashí afee mbe ba-kyú u kyikit kyibónge, ne obónge o-ba-kpú, o*da/fwon wǎn-onyinchéng* onyǐnkú emen oo*man o-bé onet ké kyikû kyikíri*. Wǎn-boné-okúsí nké oda ǎ ebé.

⁶ Mbwôp kashú-wǎn-onyinchéng mú badafwon o-já ng wǎn-boné mú o/kpú, eringe nyí kyikû ńkyí okúsí ámu kyidace kashú ké Ézerel.

⁷ Nké â wǎn-boné mú wǎn-boné emen o/kpú, o*fí o-ryuu ng o/fu, nyǐ o-bé ng ǎ* onyǐnkú ámu o-kâm m banet-ashí-oshê, o-sét kámbé o/fu, wǎn-boné-otyép ejí o/fu, nyǐ oo*chi eringe nyí ba/fu, ochi*. Mu o-né ng o/fu, nyǐ oo*fwon wǎn o-kye wǎn-boné emen* ké burwám-banet-Ézerel*.

⁸ Banet-ashí-oshê kâng ba/chi ba-kó ǎ, ba-raa ne nyǐ. Â o/chîné o/fu, nyǐ oo*bé ǎ*

⁹ onyǐnkú ámu odim o-kâm ǎ ké bushú ḿbú banet-ashí-oshê, o-pii ǎ kyiká-dyibe emen kyibónge, o-shú ǎ akorong ké bushú, o-raa o/fu, ńkyín nké kyidachi onyinchéng mú o/fu, nyǐ oo*kye wǎn-boné emen wǎn*.

¹⁰ Kyikû-banet emen ba/chi ba-kûnyît kánkyí wǎ kyikû-banet ńkyí onyinchéng mú ba/pii ǎ kyiká-dyibe.

Byije Byikíri

¹¹ Â banyinchéng ashí afee mbe ba-nwa ng bunwa, nké onyi mú onyinchéng obónge o/kan o/fu, nyǐ o-chwáp ng otyép emen, o-da-níbî onyinchéng mú áku ké akwop,

¹² ba-man ba-két onyinyi ámu bubwô, ba*dachi ba-ri ǎ bafip*.

^13-14 *Da n̂g echi ba-ryí banet bampún* â ba-kú ba-kan n byěm*.

¹⁵ Kúng n̂g érúmá nyí enong ne ba-kan byěm, eringe nyí ben badakyú ka-bwon ké esí nyí Óburúkpâbí mú mu Osówo enen mu o-kyâ běn.

¹⁶ Banet ḿbé badaryí banet bampún ba-nut ng Óburúkpâbí.

Óburúkpâbí o/kye Busa o/fu, baju Banet ḿbé Amálek

¹⁷ Zîim m̂ ńkyí banet ḿbé Amálek ba/chi běn ké nkéré mú ba/fím Éjip bamu ba-bâ.

¹⁸ Mbé ba*da/shî Osówo* ne ké bubwô ámbu, mbé ba/byí běn ké esim ba-kye běn bunwa ké nkéré mú baa/kyee asa a*fí běn to* ba-ju banet ḿbé ba/ryí esim.

¹⁹ Ké bubwô ámbu kâng, ké nkéré mú Óburúkpâbí mú mu Osówo enen oo/kye běn esí ányi, o-chi běn ba-fem ké abwô nyí kángkáng banet-bushwôn enen ḿbé ba/fárâng běn, tî n̂g ké dyityém ba/fu, ben ba-ju ng kángkáng banet ḿbé Amálek, eringe nyí onet nang obónge oo*zîim to kámbé*. *Da n̂g echi ba-ráp*.