Dyitórónómyi 24 - Bokyi Bible

Dyibé eman ne Dyibé ebwa Esim

¹ Â onet o/bé onyi, ka-bwon o/fu, nyǐ oo*bé ǎ to* ké nǎ, onyinyi ámu [o/chi kiinunut-chwǒm ńkyí kyi*fí kyi-nyîn n ǎ*.] Ké bubwô ámbu, o-sáng ashí-banwet-dyibé eman o-kye ǎ, o-ró mú onyinyi ámu ké kyise emen.

² Nké â onyinyi ámu o/bé onyinchéng okíri kâng,

³ onyinchéng ámu to o-sét o/fu, nyǐ oo*chi ǎ to* ne ké bubwô ámbu, o-sáng to ashí-banwet-dyibé eman o-kye ǎ, o-ró ǎ ké kyise emen. Nang o*da ǎ eró* nké otyép emen ámu o/kpú.

⁴ Nang ké bukwóp burá, otyép emen mú mbwôp kashú oo*man to o-chî ǎ ebé*. O-man o-kúng ǎ wǎ onyinyi mú oo/bên. Â o/chî ǎ ebé, kyi-nut ng Óburúkpâbí. Ben baa*man ba-chi dyizong-kiǐtí-kyibî ánkyi* ké esí nyí Óburúkpâbí mú mu Osówo enen mu o-kyâ běn*.

Byije Byikíri

⁵ Â onet o/bé onyi abeabe, ba*dachi ba-kúng ǎ o-da-nung súja* o-chi nang bǎmkpóngé-oshê bakíri*. Bamîng ǎ o-jáng ké bǎmkpóngé-oshê echi nang bará ké dyije dyibónge, eringe nyí odaman ekyú ké kyise emen [o-chi onyi emen o-kyú ké bunyîn-dyityém.]

⁶ Â ba/pwoo onet chwǒm, *da n̂g echi ba-koo ǎ buká emen ḿbú odakwa esang-byichí wǎ chwǒm-butông esí*. Ńkyín kyi-chi i kyikû-banet emen baa*kyú to ne bukwóp ḿbú badachi byiryíng ḿbyí badaryí ba-kpen*.

⁷ Nang yeě nké o/jii orî-onet-Ézerel, o-chi ǎ o-firi ósóng emen nang o-shee ǎ wǎ ósóng, ba-man ba-ju onet ámu. Ké bukwóp ḿbún nké ba/chi ba-fîm kyibî ánkyi ké oshê enen.

⁸ Â onet mu o-rwôm m kyibî-orwôm, onet ámu o-man o-chi kángkáng byěm ḿbyí banchi kyifen-Osówo ḿbé kyikû ńkyí Lyíva bada ǎ esét. Koo n̂g bacê ḿbé me nn/kye kámbé.

⁹ Zîim m̂ ńkyí Óburúkpâbí mú mu Osówo enen o/chi Myíryam ké nkéré mú ba/fím ké Éjip bamu ba-bâ.

¹⁰ Â ba/pwoo onet chwǒm, *da n̂g echi ba-ca ké kyise emen ba-da-koo nkyû mú o/chi o-kye běn ké butông esí*.

¹¹ Bwom m̂ kyíjí, oyén o-ba-kye ǒ kámú.

¹² Â onet ámu mu onet-kyikpu, *da n̂g echi ba-tî nkyû ámu dyicí dyi-cé*.

¹³ Bwa esim ne mú a-da-kye ǎ kángkáng dyikurúku, eringe nyí odafé kámú o-rí sáre. Nyǐ kâng o/chi o-kó ǒ asǎma, ne kyi/chi kyi-nyîn Óburúkpâbí mú mu Osówo eyên ne wo.

¹⁴ *Da n̂g ecít ḿgbán enen mú mu kyikpu* mú chwǒm kyi*fí ǎ* nang mu ónen-onet-Ézerel, nang ocinónet mú mu o-kyú u ké eshê enen.

¹⁵ Kye n̂g ǎ akpuga-bǎmkpóngé emen kángkáng dyicí ne esû e-ríbî. Nyǐ mu o-ryuu ng akpuga ányi, ne oo/tî dyityém ńdyí odakoo kányí. Â ba*da ǎ ekye* nyǐ o/chi o-tii běn bukyû ké byiko o-sét Óburúkpâbí, ne ben ba/chi ba-róng ké kyibî.

¹⁶ *Da n̂g echi ba-ju banchí ne bané-bwǎn* ké byibî ḿbyí bwǎn ebe ba/chi* ne *da n̂g eju bwǎn* ké byibî ḿbyí banchí ne bané ebe ba/chi*. Onet nang orá baju ǎ ké kyibî ńkyí nyǐ oyén o/chi.

¹⁷ *Da n̂g echi ba-ryí bacinbánet ne bwǎn-byibén acît* ké byěm ḿbyí byi/já kámbé* ne *da n̂g ekoo onyǐnkú kyídí* wǎ chwǒm-butông esí ké chwǒm ńkyí o/pwoo ne wo*.

¹⁸ Zîim m̂ ba/fu, ben ba/mû básóng ké Éjip, ne Óburúkpâbí mú mu Osówo enen nké o/nyii běn. Nkyí nké kyi/chi ne nn/kye běn kyije ńkyín.

¹⁹ Â ben ba/fuu byíkwôn enen ba-ráp kyicê-esang-byichí nyí baa/bóng, *da n̂g echi ba-bwa esim ba-da-yip kányí*. Mîng n̂g kányí e-já bacinbánet ne bwǎn-byibén ne banyǐnkú, eringe nyí Óburúkpâbí mú mu Osówo enen o/chi o-jware běn ké kángkáng byěm ḿbyí bamu ba-chi i.

²⁰ Ké nkéré mú baa/bóng byirim-ólif enen kabónge, *da n̂g echi ba-bwa esim ba-da-bóng ḿbyí byi/waa*. Ḿbyí ámbyi byi/já bacinbánet ne bwǎn-byibén ne banyǐnkú.

²¹ Ké nkéré mú baa/bóng byirim-byichí ḿbyí badachi bato enen kabónge, *da n̂g echi ba-chîbwa ké byichí ámbyi kafee*. Byirim-byichí ḿbyí byi/waa byi/já bacinbánet ne bwǎn-byibén ne banyǐnkú.

²² *Da n̂g echi ba-ráp ba/fu, ben ba/mû básóng ké Éjip*. Nkyí nké kyi/chi ne nn/kye běn kyije ńkyín.