Dyitórónómyi 23 - Bokyi Bible

Banet ḿbé baa*kyú ké Burwám-Banet ḿbé Óburúkpâbí*

¹ Nang yeě mú ba/pê ǎ nang mú baa/két ǎ butî o*dachi o-kyú ké burwám-banet ḿbé Óburúkpâbí*.

² Nang yeě mú ba/fwon ǎ dyikpe nang bwǎn bakíri ḿbé onet ámu odafwon, ne banyá ne banyá, ba*dachi ba-kyú ké burwám-banet ḿbé Óburúkpâbí*.

³ Nang yeě nké mu onet-Ámon nang o/fím Mówep nang wǎn ebe nang orá, ne banyá ne banyá, o*dachi o-kyú ké burwám-banet ḿbé Óburúkpâbí*.

⁴ Mbé ba/né běn byiryíng ne omu ekye ké nkéré mú ben ba/mû ké bucen ḿbú ba/mîng Éjip, ne mbé ba/yámê Bálim mú wǎn-Bwô, mú o/fím oshê mú Péto ké Mesopotémya ba/fu, oshú běn.

⁵ Nké Óburúkpâbí mú mu Osówo enen o*da/fwôo atông o-jwo Bálim*. O/bwa o-bírî kyishû ánkyi kyi-firi ojware, ké nǎ, ben bamu ba-jê ng ǎ.

⁶ Ké kángkáng nkéré mú ben ba/chi ba-kyú wǎ oshê, *da n̂g echi ba-chi nang chwǒm kyibónge* ńkyí badachwáp eshê ńnyín* ba-chi nang kámbé ba-fang*.

⁷ *Da n̂g echi ba-ciring banet ḿbé Édom*. Mbé ba-chi i bwǎn-bané enen. Ne *da n̂g echi ba-ciring banet ḿbé Éjip* ké nǎ, ben ba/mû ba/kyú ké esí ebe.

⁸ Kyi-fím ké byikim-banet byichât byi-jâ kyíbóng, bwǎn ebe ba-man n ekyú ké burwám-banet ḿbé Óburúkpâbí.

Boompyep-Byití etî Kanong

⁹ Ké nkéré mú ben baa/dim byití, ba-bi boompyep-byití enen, *da n̂g echi ba-chi chwǒm ńkyí kyidabên byiko enen*.

¹⁰ Â onyinchéng o/firi onet mú bada ǎ eciring, ké nǎ, o/bên burê kyísí ne buchú, onet ámu obyí ké kafâ-boompyep-byití o-da-kyú kyíjí.

¹¹ Â kyi-kú kyi-fyi ng dyikurúku, okôo omu, ne â óbyísû o/ríbî, o-man n ebwa esim ké boompyep.

¹² Tî n̂g kyikit cát ńkyí kyi/fárâng ne boompyep-byití, ńkyí badaman ece ba-da-nyii abîng, ba-saa basa.

¹³ Kúng n̂g ochí wǎ kyicê-byěm ńkyí badayip, eringe nyí â bamu ba-ryuu ng abîng enyii, badaman esím kyikit ba-cít kányí.

¹⁴ *Da n̂g ebên boompyep-byití enen* ké nǎ, Óburúkpâbí mú mu Osówo enen mu ne ben ké kyikit enen ánkyi, eringe nyí oda běn eku, o-chi běn ba-kpógê banet-bushwôn enen. *Da n̂g echi ba-chi chwǒm nang kyibónge ńkyí kyidanut* ńkyí kyi/chi kyi-chi Óburúkpâbí o-bírî běn esim*.

Byije Byikíri

¹⁵ Â ósóng o/chêe ké abwô nyí bonchí emen o-bâ o-kâm běn o/fu, ben baku ǎ, *da n̂g ǎ eró o-bwa esim*.

¹⁶ Ósóng ámu o-man n ekyú ké oshê enen nang orá mú o/nyîn ǎ, ne baa*man ba-tî ǎ ké bukwóp ḿbú boo*nwa*.

¹⁷ Onet-Ézerel nang orá, nang onyinchéng nang onyinyi o*dachi o-kyú onet-akpara ké kyise-kyifen echi*.

¹⁸ Akpuga to nyí badakoo ké dyizong-bukwóp ḿbún ba*dachi ba-bâ ne nyǐ ké kyise-Óburúkpâbí mú mu Osówo enen* ba-ba-kye ké ocím mú onet ámu o/mû o/ryí*. Banryî akpara ké kyise-kyifen echi ba-sa ng Óburúkpâbí kafâ.

¹⁹ Â ba/pwoo orî-onet-Ézerel akpuga nang byiryíng nang chwǒm kyikíri, *da n̂g echi ba-fé ǎ chwǒm ńkyí odanye kyíbóng*.

²⁰ Ba-man n efé chwǒm ńkyí badanye kyíbóng â ba/pwoo ocinónet, nké *chí ké ńkyí badapwoo orî-onet-Ézerel*. Tî n̂g kyije ńkyín, ne Óburúkpâbí mú mu Osówo enen o/chi o-jware kángkáng byěm ḿbyí bamu ba-chi i ké esí nyí ben ba/chi ba-kyú ké nyǐ.

²¹ Â ba/ryí Óburúkpâbí mú mu Osówo enen ocím ba-sem ǎ, *da n̂g echi ba-mîng echi ńkyí ben ba/ryí ocím*. Óburúkpâbí o/chi o-níbî běn ké ocím enen mú ba/ryí, ké nǎ, kyi-kyú u kyibî â ba/da/tî kámú*.

²² Kii*chi kyibî* â ba*da/ryí Óburúkpâbí ocím mú bada ǎ esem*

²³ nké â ba/tigi ne dyityém enen ba-ryí ǎ ocím, nyît n̂g ba/fu, ben ba-tî ng kámú.

²⁴ Â bamu ba-cen n ké kiǐfáng ńkyí kyi/shwôm ké kafâ-kyifát-byirim-byichí ńkyí onet okíri, ba-man n eryí byirim-byichí nang nǎ ḿbyí bamu ba-ryuu ng. Nké baa*man ba-bóng kyirim nang kyibónge ba-fé ké kyiféng ba-jâ ne nkyí*.

²⁵ Â ba/cen ké kiǐfáng ńkyí kyi/shwôm ké kyifát-esang-byichí ńkyí onet okíri, ba-man n eryí ocím-esang-byichí nang nǎ mú badaman ebóng ké abwô enen, nké baa*man ba-kúng kashwám ba-két osang-kyichí nang obónge*.