Dyitórónómyi 21 - Bokyi Bible

Kyi-kim ne Onet eju mú ba*da/ri Onet mú o/ju ǎ*

¹ Â ba/ri onet mú baa/ju ba-twóp ké kyifát, ké esí nyí Óburúkpâbí mú mu Osówo enen mu o-bâ běn ekye, ne ba*da/ri onet mú o/ju ǎ*

² banet-ashí-oshê ne bampan bampan enen ba/chi ba-ca ba-da-kan eringe nyí kyi/tíbî, kyi-fím ké kyikit ńkyí kyikwóm-onet ánkyi nkyi, kyi-ribi ké eshê nyí nyi ányi fáráng.

³ Banet-ashí-oshê ḿbé kyikwóm-onet ánkyi kyi/fárâng kámbé kyi-shwôm, ba/chi ba-cá kâng buma-kyisu-mpong ńkyí ba*da/kúng ne kánkyí kyi-chi bǎmkpóngé*.

⁴ Ba/chi ba-kúng kánkyí ba-ca ne nkyí ké kyikit ńkyí kyi/fárâng ne kace ńké kaa*núng* ne esí emen to ba*da/kpang ne kyifát* ba-bún kyitông-kyisu-mpong ánkyi.

⁵ Banchi kyifen-Osówo ḿbé kyikû ńkyí Lyíva ba/chi ba-ca to ké kyikit ánkyi, ké nǎ, mbé nké badakét mpan nang orá mú o/kim ne bunwa enwa. Óburúkpâbí mú mu Osówo enen oo/cá kámbé o/fu, bachi bǎmkpóngé ba-kye ǎ, ba-kye banet banjware ké dyizîn emen.

⁶ Kángkáng banet-ashí ḿbé oshê ámu mú kyikwóm-onet ánkyi kyi/fárâng kámú kyi-shwôm ba/chi ba-soo abwô ebe ba-pwó ké mpong ámu,

⁷ ba-raa ba/fu, *chí be nké byi/ju onet ámu* ne byi*fí byi-nyît ng onet mú o/ju ǎ*.

⁸ Óburúkpâbí, pwoo banet eyên ḿbé Ézerel, ḿbé wo a/nyii kámbé ké abwô nyí Éjip. Pwoo bě, *dachi a-níbî bě a/fu, be nké byi/ju onet mún* mú o*da/chi chwǒm*.

⁹ Ké bubwô ámbu kâng, â ba/chi ńkyí Óburúkpâbí mu o-ryuu ng, baa*ba/chi ba-níbî běn ba/fu, ben nké ba/ju onet ámu*.

Kyi-kim ne Banyinyi ḿbé badakám Kámbé ké Byití

¹⁰ Ké nkéré mú Óburúkpâbí mú mu Osówo enen oo/chi běn ba-kpógê byití, ba-kám banet ké byití,

¹¹ ba-man n eri onyinyi mú mu o-nwa ng bunong ké burwám-banet ámbe, mú mu o-jê ng běn, mú bamu ba-ryuu ng ba/fu, ba-bé ng.

¹² Kúng n̂g onyinyi ámu ba-jâ ne nyǐ ké kyise enen, [ba-pwát ǎ dyishí,] ba-két ǎ biinfwa,

¹³ ba-yángê ǎ byídí. O/chi o-kyú ké kyise enen o-ta dyikán ńdyí bonchí ne boné emen ké otukáku obónge. Â o/man dyikán eta, ba-man n ǎ ebé.

¹⁴ Â ka/bwon nké ba*fí to ba-ryuu ng ǎ* mîng n̂g ǎ o-firi ké byiko emen. Ké bubwô ḿbú ben ba/tírîng ǎ o-bángê ba-rí ne nyǐ, ben baa*man ǎ etî wǎ ósóng* ba-shee ǎ nang oshee*.

Kyi-kim ne Bukyû eryí ḿbú Ókpá-Wǎn-Onyinchéng

¹⁵ Â onet mu ne banyi bafee ne mbé ashí amúmú ba/fwon ǎ bwǎn-banyinchéng, nké mú mu ókpá-wǎn-onyinchéng o*fí wǎn mú mú onyi mú mu o-jê ng ǎ*.

¹⁶ Ké nkéré mú onyinchéng ámu o-kú o-bâ ekyii byěm o-kye bwǎn emen, o*dachi o-tông kyijé ne wǎn-onyinchéng mú onyi mú mu o-jê ng ǎ* o-kúng byěm ḿbyí byi/já ókpá-wǎn-onyinchéng o-kye ǎ*.

¹⁷ O/chi o-kyii byěm ámbyi, o-kúng byikit byifee o-kye ókpá-wǎn-onyinchéng emen, nang o*fí wǎn mú onyi mú mu o-jê ng ǎ*. Onyinchéng o-man o-kye ókpá-wǎn-onyinchéng emen ofê, o-kye ǎ byěm ḿbyí ba/tî ké byije ḿbyí oshê ba/fu, byijá ǎ.

Kyi-kim ne Wǎn-Onyinchéng mú oo*jwo ńkyí Bonchí ne Boné bada ǎ esét*

¹⁸ Â onet mu ne wǎn-onyinchéng mú mu o-shwane e dyishí, o-bírî ng bunwa, mú oo*jwo bonchí ne boné emen* nang ba-mín ǎ*.

¹⁹ Bonchí ne boné emen ba/chi ba-kúng ǎ ba-ca ne nyǐ ké bushú ḿbú banet-ashí-oshê mú wǎn ámu mu o-kyú u, ba-pan ǎ mpan.

²⁰ Ba/chi ba-sét banet-ashí-oshê ámbe ba/fu, wǎn eten mu o-shwane e dyishí, o-bírî ng bunwa ne be, ne o*fí o-chi i ńkyí byimu byi-sét ng ǎ*. Mu o-bên n akpuga ne o-chi i mbwôm bato.

²¹ Banet-oshê ámu kâng ba/chi ba-tím wǎn ámu aká ba-ju, ne ké bubwô ámbu, ben ba/chi ba-fîm kyibî ánkyi kyi-byí ké oshê. Nang yeě ké Ézerel o/chi o-jwo ńkyí kii/chi, bushî bu-róng ǎ.

Byije Byikíri

²² Â ba/ju onet ké kyibî ńkyí o/chi ba-kúng kyikwóm emen ba-kpong ké kyikwap,

²³ ba*dachi ba-mîng kánkyí kyi-rí dyicí ányi*. Ba-man ba-ryii kánkyí ké ochíchí-dyicí ándyi, ké nǎ, â kyikwóm-enyam-byiko-onet kyi/waa ké kyikwap kpoong, kyi-chi i Osówo o-shú esí ányi. Ryii n̂g kyikwóm-enyam-byiko ánkyi eringe nyí ben baa*ba/chi ba-bên esí nyí Óburúkpâbí mú mu Osówo enen mu o-kyâ běn*.