Dyitórónómyi 20 - Bokyi Bible

Kyi-kim ne Byití

¹ Ké nkéré mú baa/dim byití edanwa ne banet-bushwôn enen, ba-ri bubyî-orá ne bamútu ḿbé bubyî-orá budatut ne basúja chwóó ḿbé ba/jê ba-shwôm ḿbé enen, *da n̂g echi ba-shî kámbé*. Óburúkpâbí mú mu Osówo enen, mú o/nyii běn ké abwô nyí Éjip o/chi o-kyú ne ben.

² Ne ba-kpet bunwa enwa, nchi kyifen-Osówo o/chi o-byí o-bwom, o-raa ne basúja o/fu,

³ banet-Ézerel, fwôo n̂g atông ba-jwo. Kurún ba-kú ba-dim m byití enwa. *Da n̂g echi ba-shî banet-bushwôn enen* ba-jwâa nang asa* ba-shî*.

⁴ Óburúkpâbí mú mu Osówo enen mu o-wâa ng ne ben ké kyikû, ne o/chi o-chi běn ba-kpógê.

⁵ Ne banet-ashí-basúja ba/chi ba-bí basúja ba/fu, onet mu nyín mú oo/bi kyise? mú o*da/jware ne kánkyí*? Â nkyi éné, onet ámu obwa esim dyijê. Â o*da/bwa* â ba/ju ǎ ké byití, onet okíri o/chi o-jware kánkyí.

⁶ Onet mu nyín mú oo/kpang kyifát-byirim-byichí? nké o*da/já ne nkéré mú odabóng byirim emen*? Â nkyi éné, onet ámu obwa esim dyijê. Â kyi*fí éné* â ba/ju ǎ ké byití, onet okíri o/chi o-jwáp bato emen.

⁷ Onet mu nyín mú o-kú o-bâ ebé dyibé dí. Â mu kô, obwa esim dyijê. Â kyi*fí éné* â ba/ju ǎ ké byití, onet okíri o/chi o-bé onyinyi ámu, mú nyǐ o/mû o/chi o-bé.

⁸ Ba-bí ng to kámbé ba/fu, onet mu nyín mú asa aa/jwâa ǎ? ne mu o-shî ng? Â mu kô, obwa esim dyijê. Â kyi*fí éné* o/chi o-jwâa banet ḿbé áku asa.

⁹ Ké nkéré mú banet-ashí-basúja baa/man bǎmpém ebe ne basúja, ba/chi ba-fîm banet-ashí ḿbé badakûtún basúja ké byikim ké byikim.

¹⁰ Â ben ba/dim oshê bunwa ekye, kye n̂g kpá banet-oshê ámu mpât mú mbé badajwâa asa ba-kye běn.

¹¹ Â mbé ba/bâa afyi-oshê ebe ba/fu, mbé baa*nwa bunwa* mbé kángkáng ba/chi ba-firi básóng enen, ba-kû ng běn echi bǎmkpóngé ḿbé sóngsóng.

¹² Nké â banet-oshê ámu ba/fu, mbé baa*jwâa asa ba-kye běn* ba-bángê ba/fu, mbé ba-nwa ng byití, basúja enen ba/chi ba-wâng kâng oshê ámu.

¹³ Â Óburúkpâbí mú mu Osówo enen o/bángê běn ba-koo oshê ámu, ju n̂g onyinchéng nang orá ké oshê ámu.

¹⁴ Ba-man n ekúng banyinyi ne bwǎsíng ne byitú ne kángkáng byěm byikíri ké oshê ámu ba-dim ne mbyí. Ba-man n ekúng nang ebóng chwǒm ńkyí kyi/mû kyi/já banet-bushwôn enen kyi-firi ńkyí enen. Óburúkpâbí nké oo/kye běn kámbyí.

¹⁵ Éné nké ben ba/chi ba-chi ne eshê nyí nyi tíbítíbí ne esí nyí ben ba/chi ba-kyú ké nyǐ.

¹⁶ Nké â ben ba/koo eshê nyí nyi ké esí nyí Óburúkpâbí mú mu Osówo enen mu o-kyâ běn, ju n̂g nang yeě nang yeě.

¹⁷ Ju n̂g kángkáng banet, banet ḿbé Hyítat ne ḿbé Ámórit ne ḿbé Kínan ne ḿbé Périzit ne ḿbé Hyíbit ne ḿbé Jébus, wǎ eringe Óburúkpâbí o/kye běn busa o/fu, bachi.

¹⁸ Ju n̂g kámbé eringe nyí mbé baa*chi běn ba-chi kyibî ké bushú ḿbú Óburúkpâbí* ké otánge mú ba/chi ba-tángê běn ba-chi kángkáng banunut-byěm ḿbyí mbé mbe ba-chi i ké ofê mú mbe ba-kyâ esówo ebe*.

¹⁹ Ké nkéré ba-kú ba-kan n ba/fu, ba-koo ng oshê, *da n̂g echi ba-twom byichí ebe ḿbyí byidazím byirim* nang bunwa ámbu bu-rí nǎ*. Ryí n̂g byirim emen, nké *da n̂g etwom byichí byiyén* ké nǎ, byichí bii*chi banet-bushwôn enen*.

²⁰ Ba-man n etwom byichí byikíri ba-kúng kámbyí ba-chi byikit ḿbyí badayú ba-koo oshê, tete ba-koo oshê ámu.