Dyitórónómyi 19 - Bokyi Bible

Eshê nyí badachêe ba-jâ

¹ Ké nkéré mú Óburúkpâbí mú mu Osówo enen oo/ju banet ḿbé mu o-kúng ng esí ebe o-kye běn, ne ké nkéré mú ben baa/koo eshê ebe ne byise ebe ba-kyú ké mbyí,

^2-3 kyii n̂g kyikim-esí ánkyi ké byikit byichât, kyikim nang kyirá kyikyú ne oshê mú oo*sóng eribi ké mǔ*. Onet kâng mú o/ju onet o-man n echêe o-jâ ké oshê nang orá ké eshê ányi echât, o-fem kyitông emen.

⁴ Â onet o/ju onet mú o*fí onet-bushwôn emen* ké ofene, o-man n echêe o-jâ ké oshê nang orá ké eshê ńnyín echât, o-fem.

⁵ Mîng n-kan něen n/fu, â banet ashí afee ba/dim ké kyizinge ekwón edasá, ne â onet obónge mu o-twom m kyikwón, dyikye dyi-zûu ké ofên dyi-ju onet mú áku, nyǐ o-man n echêe o-jâ ké oshê nang orá ké eshê ńnyín echât, o-fem.

⁶ Â oshê mu obónge nké nke, bucen ḿbú adacen a-ribi ké mǔ bu-man n etíbî bu-shwôm, ne wǎn-boné-onet mú ba/ju ǎ, mú mu o-ryuu ng o/fu, nyǐ o-só ng ewa, o-man n ǎ ekám, ne ké busa-dyityém ámbu o-ju onet mú o*da/chi kyibî*. Ké nǎ, kyi/mû ké ofene nké o/ju onet mú o/mû o*fí onet-bushwôn emen*.

⁷ Ńkyín nké kyi/chi ne n-sét běn n/fu, cá n̂g eshê echât ba-tî cát.

⁸ Ké nkéré mú Óburúkpâbí mú mu Osówo enen oo/nere kyikim-esí enen, wǎ eringe nyí nyǐ o/sét banchí enen ḿbé kpákpá o/fu, nyǐ o-chi i, o-kye běn kángkáng esí nyí nyǐ o/ryí ocím,

⁹ ben ba-man ba-chîcá kâng eshê ekíri echât. Nyǐ o/chi o-kye běn esí ńnyín â ben ba/chi kángkáng byěm ḿbyí me mu n-sét ng běn kurún, ne â Óburúkpâbí mú mu Osówo enen mu o-jê ng běn, ba-kyú u to akpen enen wǎ nyí nyǐ o/tángê běn.

¹⁰ Chi n̂g ńkyín eringe nyí banet ḿbé ba*da/chi kyibî* baa*kpú* ne eringe nyí ben baa*chi kyibî ńkyí badaju kámbé ké esí nyí Óburúkpâbí mu o-kyâ běn*.

¹¹ Nké â onet kâng o/tigi ne dyityém emen o-kpet onet-bushwôn emen o-ju, o-chêe o-jâ ké oshê nang orá ké eshê ńnyín echât.

¹² Â dyizong-chwǒm ńdyín dyi/chi, banet-ashí ḿbé oshê emen ba/chi ba-twóm ba/fu, obâ, ba-kúng ǎ ba-kye wǎn-boné-onet mú o/ju ǎ, mú odasó ewa nyí ba/ju wǎn-boné emen, eringe nyí oda ǎ eju.

¹³ *Da n̂g echi ba-ri ǎ bafip*. Fîm m̂ nju banet mún o-byí ké Ézerel, eringe nyí kángkáng byěm byida běn ece kanong.

Bati ḿbé Kpákpá

¹⁴ *Da n̂g echi ba-yángê bati ḿbé barî-banet enen* ḿbé ba/mû ba/ját ké nkéré mú oo/shwôm ké esim chwóó* ké esí nyí Óburúkpâbí mú mu Osówo enen mu o-kyâ běn*.

Kyi-kim ne Bantûesé

¹⁵ Ntûesé obónge o*da/kwárê* mú badakét mpan o-bên onet*. Bantûesé ba-man ba-kyú nang bafee ḿbé badasét ba/fu, onet o/chi kyibî.

¹⁶ Â onet obónge o/kan o/fu, nyǐ o-chi i onet mú áku kyibî, o-sét kyisédéng o/fu, o/chi kyibî,

¹⁷ mbé ashí afee ba/chi ba-ca ké kyikit ánkyi kyibónge ńkyí mbe ba-fâ Óburúkpâbí, banchi kyifen-Osówo ne bankêt bampan ḿbé mbe ba-chi i bǎmkpóngé ké nkéré ámu ba-pan kámbé mpan.

¹⁸ Bankêt bampan ba/chi ba-kyé kyikû ké kyiraa ánkyi kanong kanong, ne â onet ámu o/bât orî-onet-Ézerel kyiraa ánkyi kyibádáng,

¹⁹ onet mú o/bât ǎ éné o/chi o-koo busông ḿbú onet mú ba/bât ǎ kyiraa ánkyi o/mû o/chi o-ri. Â ba/chi éné, ba/chi ba-fîm kyibî ánkyi ké oshê enen.

²⁰ Nang yeě nang yeě kâng o/chi o-jwo ńkyí kyi/chi, bushî bu-róng kámbé, ne onet oo*chi to dyizong-kyibî ánkyi*.

²¹ Ké azong-byiraa ányi, *da n̂g eri onet bafip*. Busông ḿbú ba/chi ba-kye onet ámu bu/chi bu-kyú něen, â o/ju onet, nyǐ to okpú, â o/sé onet dyichi, basé ǎ to, â o/zú onet busháng, bazú ǎ to, â o/két onet bubwô, bakét ǎ to, ne â o/két onet kyiká, bakét ǎ to.