Dyitórónómyi 18 - Bokyi Bible

Byěm ḿbyí byi/já Banchi Kyifen-Osówo

¹ Banchi kyifen-Osówo ḿbé kyikû ńkyí Lyíva ba*dachi ba-koo esí nang ebónge ké Ézerel*. Mbé bakûkpen ké eyáré ne byifen ḿbyí mbe ba-kyâ Óburúkpâbí.

² Mbé ba*dachi ba-kyú ne esí* wǎ eringe nyí byikû-banet ḿbyí áku mbe ne nyǐ*. Chwǒm ńkyí kyi/já kámbé ányi ofê mú mbé badakyú banchi kyifen ḿbé Óburúkpâbí wǎ eringe nyí Óburúkpâbí oo/ryí ocím.

³ Nang nkéré orá nké ba/chi kyifen ké mpong nang ké etám-ebû, ba-man ba-kye banchi kyifen-Osówo bubwô ne dyijâa ne kiǐfít.

⁴ Mbé nké badakoo bambwôp kashú-eyáré nyí esang-byichí ne bato ne bakút-ólif ne eríp-etám-ebû.

⁵ Ké kángkáng byikû-banet enen, Óburúkpâbí o/cá kyikû ńkyí Lyíva o/fu, bachi bǎmkpóngé ba-kye ǎ wǎ banchi kyifen emen kángkáng nkéré.

⁶ Onet-kyikû-Lyíva nang orá mú nkyi kyi-nyîn n ǎ, o-man n efím ké oshê nang orá ké Ézerel o-bâ ké kyikit ánkyi kyibónge ńkyí badafé Óburúkpâbí

⁷ ne o-man n echi bǎmkpóngé ányi wǎ nchi kyifen mú Osówo Óburúkpâbí emen, wǎ banet-Lyíva bakíri ḿbé mbe ba-chi i bǎmkpóngé ányi.

⁸ Nyǐ okoo to ocím-byiryíng eringe ebónge wǎ banchi kyifen-Osówo ḿbé áku, ne [o-man n etî nang ebóng chwǒm ńkyí kyikû-banet emen mbe ba-twóm m ǎ.]

Ekó ekuri kyi-kim ne Bakye esháng

⁹ Ké nkéré mú baa/bê ké esí nyí Óburúkpâbí mú mu Osówo enen mu o-kyâ běn, *da n̂g echi ba-kúng biinunut-édúú ḿbyí eshê nyí nyi ké esí ányi*.

¹⁰ *Da n̂g ekúng bwǎn enen ba-shí ké okwâ* ké byikit-byifen enen echi* ne *da n̂g ebángê banet enen ba-sô epé nang erá*

¹¹ ba-fé kiǐré-bukye nang kyirá*. *Da n̂g emîng kámbé ba-kûpem ne bakúsí*.

¹² Banet ḿbé mbe ba-chi i banunut-byěm ḿbyín ba-sa ng Óburúkpâbí kafâ, ne nkyí nké kyi/chi ne mu o-ró ng eshê ányi ba-byí ké esí ányi ké nkéré ba-kú ba-cen n ba-câ.

¹³ Fé n̂g dyityém ne Óburúkpâbí kanong kanong.

Óburúkpâbí o/ryí Ocím mú odatwóm Mkpábé mú odasét Byiraa Emen

¹⁴ Ne Músis o-raa kâng o/fu, ké esí nyí ben ba-kú ba-bâ ekyú, banet mbe ba-koo ng bacê ḿbé banet ḿbé mbe ba-sô ng epé. Nké Óburúkpâbí mú mu Osówo enen oo*bángê o/fu, ben bachi byěm ḿbyín*.

¹⁵ Nké nyǐ o/chi o-twóm běn [mkpábé mú odasét byiraa emen wǎ me, mú o/chi o-fím ké burwám-banet enen, ne ben ba-man ba-chi ńkyí nyǐ oda běn esét.]

¹⁶ Ké dyicí ńdyí ben ba/cibi kyikit kyibónge ké kaku ńké Sána, ben ba/tîm arông ba/fu, ben baa*jwo to ejá nyí Óburúkpâbí* nang kyibî-okwâ emen baa*ri to* ké nǎ, ben ba/mû ba-shî ng ba/fu, ba-kpú u.

¹⁷ Ne Óburúkpâbí o-raa kâng ne me o/fu, mbé baa/bí chwǒm ńkyí kyinong.

¹⁸ Me n/chi n-fîm onet ké burwám ebe n-twóm kámbé wǎ [mkpábé mú odasét byiraa ejí, wǎ wo. Me n/chi n-sét ǎ ńkyí odasét, ne nyǐ] o/chi o-sét banet-Ézerel kángkáng byěm ḿbyí me n/kye ǎ busa. [

¹⁹ Nyǐ o/chi o-raa ké dyizîn ejí, ne nang yeě mú o/né echi ńkyí o/sét, n-kyâ] onet ámu busông.

²⁰ Nké â mkpábé mú odasét byiraa ejí o/sét kyitwóm ké dyizîn ejí, ńkyí me n*da ǎ esét n/fu, osét* o-man o-kpú ké dyishí-chwǒm ánkyi. Éné to nké mkpábé nang orá mú mu o-sét ng byiraa ké dyizîn-esówo ekíri odakpú.

²¹ Kyi-man n běn ekyú ké dyityém yógeyóge ba/fu, be byi-cen n nǎ ne byi-nyît byi/fu, kyitwóm ńkyí mkpábé mú odasét byiraa-Osówo o/sét něen kyi*da/fím ne Óburúkpâbí*.

²² Â mkpábé mú odasét byiraa-Osówo o/raa ké dyizîn ńdyí Óburúkpâbí ne chwǒm ńkyí nyǐ o/sét kyi*da/chi* ba-nyît ng kâng ba/fu, kyitwóm ánkyi, *chí ńkyí Óburúkpâbí*. Mkpábé ámu oo/sét ké kakim ńké emen, ne ben baa*man ba-shî ǎ*.