Dyitórónómyi 17 - Bokyi Bible

¹ *Da n̂g echi ba-kúng mpong nang etám-ebû nyí nyi ne kyinêm ké byiko* ba-chi kyifen ba-kye Óburúkpâbí mú mu Osówo enen*. Ńkyín kyi-sa ng Óburúkpâbí kafâ.

² Â ben ba/jwo ba/fu, ké oshê enen obónge, onyinchéng nang onyinyi obónge oo/chi kyibî ké bushú ḿbú Óburúkpâbí, o-bên ocím emen mú o/ryí ne nyǐ,

³ ńkyí o/kye esówo ekíri nang óbyísû nang otukáku nang ékpére ofê, ńkyí kyi/bên kyije ńkyí Óburúkpâbí.

⁴ Â ba/jwo dyizong-chwǒm ándyi, kyé n̂g kâng kyikû kyi-kim ne nkyí kanong kanong. Â nkyi ntûntû ba/fu, kyibî-chwǒm ńkyín kii/chi ké Ézerel,

⁵ kúng n̂g onet ámu ké kafâ-oshê ba-byí ne nyǐ kyíjí, ba-tím ǎ aká ba-ju.

⁶ Nké *da n̂g ǎ eju* tete bantûesé nang bafee ba-sét ba/fu, mú mǔ o/chi kyibî ánkyi. Â ntûesé mu obónge, *da n̂g echi ba-ju ǎ*.

⁷ Bantûesé ámbe nké badatím bambwôp kashú-aká ne banet ḿbé kwán ba-kpet ǎ to aká etím. Â ba/chi éné, ba-fîm m kyibî ánkyi ké oshê enen.

⁸ Kyi-man n ekyú kyi/fu, kyiraa kyikíri kyi-sóng ng bankêt bampan-oshê mpan ekét, byiraa wǎ ḿbyí byěm eshwam ne onet enémê, nang kyirá to ńkyí kyidasóng enyît â onet o/tigi ne o-ju onet nang o*da/tigi*. Â dyizong-mpan ńdyín dyi/róng, ca n̂g ké kyikit ánkyi kyibónge ńkyí badafé Óburúkpâbí, ńkyí Óburúkpâbí mú mu Osówo enen o/cá,

⁹ ba-yip mpan enen ámu ba-sét banchi kyifen-Osówo ḿbé kyikû ńkyí Lyíva ne onet-dyishí-bankêt mpan mú nkéré ámu, ba-mîng kámbé ba-két mpan ámu.

¹⁰ Mbé ba/chi ba-két mpan ámu, ne ben ba-man ba-chi kerededet eringe nyí mbé badasét.

¹¹ Bángê ê ne mpan ebe mú badakét ba-koo kángkáng bacê ḿbé mbé badakye.

¹² Nang yeě nké o/né ké bukpô echi ńkyí nkêt mpan nang nchi kyifen ámu ḿbé mbe ba-chi i bǎmkpóngé ké nkéré ámu, baju onet ámu. Â ba/chi éné, ba/chi ba-fîm kyibî ńkyín kyi-byí ké Ézerel.

¹³ Nang yeě kâng o/chi o-jwo kyi-kim ne nkyí, bushî bu-róng ǎ, ne onet nang obónge oo*rêe to dyityém o/fu, nyǐ o-chi i dyizong-chwǒm ándyi*.

Bacê kyi-kim ne Otu

¹⁴ Ké nkéré mú baa/koo esí nyí Óburúkpâbí mú mu Osówo enen o/chi o-kye běn, ne baa/kyú ké nyǐ, ben ba/chi ba-kabe kâng ba/fu, ben bamu ba-ryuu ng ba-firi ne otu wǎ kángkáng eshê nyí áku, nyí e/fárâng běn.

¹⁵ Nyît n̂g ba/fu, onet mú ben ba/chi ba-cá ǎ o-firi běn otu, o-kyú u onet mú Óburúkpâbí oo/cá. O-man o-kyú onet mú mu ké burwám enen. *Da n̂g echi ocinónet o-firi otu enen*.

¹⁶ Otu ámu o*dachi o-kyú ne bubyî-orá chwóó ḿbú basúja emen* ne o*dachi o-twóm banet ba-ca ké Éjip [ba-da-ré bubyî-orá*] ké nǎ, Óburúkpâbí oo/sét o/fu, banet enen baa*man to ba-chîbwa esim ké Éjip*.

¹⁷ Otu ámu o*dachi o-kyú ne banyi chwóó* ké nǎ, ńkyín kyi-chi i ǎ oo*fé to Óburúkpâbí* ne o*dachi o-firi nfang-onet mú mu ne bagûl ne syílyíba*.

¹⁸ Ké nkéré mú baa/kúng ǎ butu, okyú ne nwet mú ba/sáng byije-Osówo ne byěm ḿbyí o/tángê, ḿbyí byi/fím ké ochíchí-mbwôp kashú-nwet mú banchi kyifen-Osówo ḿbé kyikû ńkyí Lyíva mbe ba-tî ng.

¹⁹ Otî nwet mún o-fárâng ǎ, o-kûkó kámú ké kángkáng dyikpen emen, eringe nyí odakûfé Óburúkpâbí, o-tî kángkáng byije ḿbyí ba/sáng ké mǔ ne dyityém emen.

²⁰ Ńkyín kyi/chi kyi-chi ǎ oo*kabe o/fu, nyǐ mu kiǐtí o-shwôm barî-banet-Ézerel emen* ne kyi-chi i ǎ to oo*bên byije ḿbyí Óburúkpâbí ké bukwóp nang bubónge*. Â o/chi éné kâng, o/chi o-kyú otu ké aje chwóó, ne bwǎn emen ba/chi ba-kyú batu ḿbé Ézerel ké byitông-banet chwóó.