Dyitórónómyi 16 - Bokyi Bible

Dyijî-Kyifen ńkyí Shwôm

¹ Kye n̂g Óburúkpâbí mú mu Osówo enen ofê ké dyijî-kyifen ńkyí Shwôm echi ké otukáku mú Ábip. Kyi/mû ké buchú bubónge ḿbú otukáku ámu nké nyǐ o/nyii běn ké abwô nyí Éjip.

² Ca n̂g ké kyikit ánkyi kyibónge ńkyí badafé Óburúkpâbí ba-da-ju nang ebû nang mpong enen ba-rám byiryíng-dyijî-kyifen ńkyí Shwôm, ké ofê mú Óburúkpâbí mú mu Osówo enen.

³ Â ba-kú ba-ryí i byiryíng ḿbyín, *da n̂g eryí berêt mú ba/fé bukye ḿbú budachi kámú o-mut*. Ké ací káchâtkányi, ryí n̂g berêt mú ba*da/fé bukye ḿbú odamut* wǎ eringe nyí ba/ryí ké nkéré ba/mû ba-dim m ké Éjip ochéé óchee. Ryí n̂g berêt mún. Ba/chi ba-kûkó kámú berêt-busông eri, eringe nyí ké kángkáng nkéré mú ben ba/chi ba-kyú okpó, ba/chi ba-kûzîim dyicí ńdyí ben ba/byí ba-mîng Éjip, oshê mú ben ba/ri busông.

⁴ Ké ací káchâtkányi, onet nang obónge o*dachi o-kyú ne bukye ḿbú badafé ké berêt o-mut* ké kyise emen*. Kyitú to ńkyí badaju ké dyikurúku ńdyí mbwôp kashú-dyicí ba-man ba-ryí kánkyí ké buchú ámbu.

^5-6 Ju n̂g kyitú ńkyí dyijî-kyifen ńkyí Shwôm ké kyikit-ofê ekye ánkyi kyibónge, *chí ké kyikit kyikíri* ké esí nyí Óburúkpâbí mú mu Osówo enen o/chi o-kye běn*. Ju n̂g kányí ké nkéré mú óbyísû o-kú o-ríbî ng, ké ochíchí-nkéré ámu mú ben ba/dim ké Éjip.

⁷ Rám m̂ enyam ányi, ba-ryí kányí ké kyikit ánkyi kyibónge ńkyí bamu ba-fâ Óburúkpâbí, ba-bwa esim dyijê ké orî-dyicófóróng.

⁸ Ké bannyinyěng-ací nyâchât, ba-man ba-ryí berêt mú ba*da/fé bukye ḿbú odamut*. Ké ací káchâtkányi, cibi n̂g kyikit kyibónge ba-fé Óburúkpâbí mú mu Osówo enen. *Da n̂g echi ba-chi bǎmkpóngé ké dyicí ándyi*.

Dyijî-Kyifen ńkyí Byiryíng efuu

⁹ Pan n̂ byipyán káchâtkányi kyi-fím ké nkéré mú badakpet esang-byichí ebóng,

¹⁰ ba-chi dyijî-kyifen ńkyí byiryíng efuu ké ofê mú Óburúkpâbí mú mu Osówo enen. Ba-bâ ǎ ne eyáré nyí edafím ké atyém enen, nyí e/kwárê ne ojware mú nyǐ oo/kye běn ne ba-já byiryíng ámbyi.

¹¹ Jêe n̂g ké bushú ḿbú Óburúkpâbí, cibicibi ne bwǎn enen ne bǎmgbán enen ne bǎmgbán-nchi kyifen-Osówo ne bacinbánet ne bwǎn-byibén ne banyǐnkú ḿbé mbe ba-kyú u ké eshê enen. Chi n̂g ńkyín ké kyikit ánkyi kyibónge ńkyí badafé Óburúkpâbí.

¹² Tî n̂g ké dyityém enen ba/fu, ben ba-tî ng byije ḿbyín. *Da n̂g echi ba-ráp ba/fu, ben ba/mû básóng ké Éjip*.

Dyijî-Kyifen ńkyí Boompyep ebi

¹³ Né nkéré mú baa/kim kángkáng esang-byichí enen, ba-nwárê kángkáng byirim-byichí enen, chi n̂g dyijî-kyifen ńkyí boompyep ebi ké ací káchâtkányi.

¹⁴ Chi n̂g kánkyí ne bwǎn enen ne bǎmgbán enen ne bǎmgbán-nchi kyifen-Osówo ne bacinbánet ne bwǎn-byibén ne banyǐnkú ḿbé mbe ba-kyú u ké eshê enen.

¹⁵ Kye n̂g Óburúkpâbí mú mu Osówo enen ofê ké dyijî-kyifen ńkyín echi ké ací káchâtkányi ké kyikit-ofê ekye ánkyi kyibónge. Kyú n̂g ké bunyîn-dyityém, ké nǎ, Óburúkpâbí oo/jware byíkwôn enen ne bǎmkpóngé enen.

¹⁶ Kángkáng banyinchéng ḿbé ké oshê enen ba-man ba-bâ ba-ba-kye Óburúkpâbí ofê kampén kachât ké dyije, ké kyikit-ofê ekye ánkyi kyibónge, ké dyijî-kyifen ńkyí Shwôm ne ńkyí byiryíng efuu ne ńkyí boompyep ebi. Onyinchéng nang orá obâ ne eyáré

¹⁷ nyí nyǐ odaman ekye, nyí e-kwárê ne ojware mú Óburúkpâbí mú mu Osówo enen oo/kye ǎ.

Eringe nyí badakûpan Bampan

¹⁸ Fîm m̂ bampan bampan ne banet-ashí bakíri ba-tî ké oshê nang orá mú Óburúkpâbí mú mu Osówo enen mu o-kyâ běn. Banet ḿbén nké badakûpan banet bampan ḿbé baa*ryí acît*.

¹⁹ Mbé ba*dachi ba-ryí acît* ba-bwom nang ne onet obónge ké esim* ké bampan ebe ḿbé badakét*. Ba*dachi ba-koo ngu* ké nǎ, eyáré ekoo e-sé ng nang banet ḿbé mbe ne bubong ne dyityém ńdyí dyinong achi, e-chi kámbé ba-két kyibî-mpan.

²⁰ Bwom m̂ dángdáng ba-kûsét ntûntû kángkáng nkéré, eringe nyí ben badakyú ké esí nyí Óburúkpâbí mú mu Osówo enen mu o-kyâ běn, ne ba/chi ba-chîkyú ányi ba-ca kashú.

²¹ Ké nkéré mú ba-kú ba-chi i kyikit-kyifen echi ba-tî Óburúkpâbí mú mu Osówo enen, *da n̂g echi ba-tî kiinchéng-bukye ńkyí badakó Ashéra* mú osówo-onyinyi ké bukô-kyikit ánkyi*.

²² Ne *da n̂g ebi aká-ociring ba-kûsháng kányí wǎ erím-bakye*. Mbyí mbyi byi-sa ng Óburúkpâbí kafâ.