Dyitórónómyi 13 - Bokyi Bible

¹ Mkpábé, nang onet mú odasét byikû-barê eri, o-man n eryí ocím mú nyǐ odachi chwǒm-akat

² eringe nyí nyǐ oda běn echi ba-kyú bǎmgbán-esówo nyí ben ba/mû ba*da/fé ne nang kabónge*. Nang ńkyí nyǐ o/ryí ocím kyi/chi,

³ *da n̂g ebángê ne nyǐ*. Óburúkpâbí mú mu Osówo enen mu o-kúng ng onet ámu eringe nyí nyǐ oda běn ekan o-ri, â Óburúkpâbí mu o-jê ng běn ne atyém enen kángkáng.

⁴ Cen n̂ ne Óburúkpâbí ké kyikû, ba-shî ǎ. Chi n̂g ńkyí nyǐ mu o-sét ng běn, ba-tî byije emen. Fé n̂g ǎ, ba-tî dyityém enen ne nyǐ.

⁵ Nké ju n̂g nsêt byikû-barê eri nang mkpábé orá mú mu o-sét ng běn o/fu, ben babírî bunwa ne Óburúkpâbí mú o/nyii běn ké Éjip, ké kyikit ńkyí ben ba/mû básóng. Dyizong-onet ándyi dii*nwa* ne mu o-kan n o/fu, nyǐ o-chi i běn ba-mîng dyikpen ńdyí Óburúkpâbí oo/sét běn o/fu, ben bakyú. Ba-man ba-ju onet ámu eringe nyí ben badafîm kyibî ánkyi ké oshê enen.

⁶ Nang wǎn-boné eyên nang wǎn eyên nang onyi eyên mú mu o-jê ng ǒ nang ocín-dyityém eyên o-man n ejii o-fé běn busa o/fu, ben bafé esówo ekíri nyí ben ne banchí enen ḿbé kpákpá ba/mû ba*da/fé ne*.

⁷ Onet obónge ké burwám ebe o-man n běn efé busa o/fu, ben bafé esówo nyí banet ḿbé mbe ba-kyú u fáráng ne ben nang ḿbé ba*fí ba-kyú u fáráng ne ben*.

⁸ Nké *da n̂g emîng onet ámu o-tírîng běn*. Nang atông átong, *da n̂g efwôo ba-jwo ǎ*. *Da n̂g echi ba-ri onet ámu bafip* ne *da n̂g echi ba-ku ǎ ké afaníkong*.

⁹ Ju n̂g ǎ. Kyú mbwôp kashú-onet mú oda ǎ etím buká, banet ḿbé áku kángkáng ba-tím ǎ to.

¹⁰ Tím m̂ ǎ aká ba-ju. Nyǐ o/kan o/fu, nyǐ o-chi i běn ba-mîng Óburúkpâbí mú mu Osówo enen, mú o/nyii běn ké abwô nyí Éjip, ké kyikit ńkyí ba/mû básóng.

¹¹ Â ba/chi éné kâng, kángkáng banet ḿbé Ézerel ba/chi ba-jwo ńkyí kyi/chi. Bushî bu/chi bu-róng kámbé, ne onet nang obónge oo*ba/chi o-chîkan o/fu, nyǐ o-chi i dyizong-kyibî-chwǒm ánkyi*.

¹² Ké nkéré mú ba-kú ba-kyú u ké eshê nyí Óburúkpâbí mú mu Osówo enen mu o-kyâ běn, ba-man n ejwo ba/fu,

¹³ banet-oshê enen ḿbé ba*da/byí chwǒm* baa/nîm banet-oshê ebe ba-fé esówo nyí ben ba/mû ba*da/fé ne*.

¹⁴ Â ba/jwo dyizong-chwǒm ándyi, kyé n̂g kyikû kyi-kim ne nkyí kanong kanong, ne â ba/nyît ba/fu, nkyi ntûntû ba/fu, kiinunut-chwǒm ńkyín kyi/chi,

¹⁵ ju n̂g kángkáng banet-oshê ámu ne kángkáng byitú ebe. Bên n̂ oshê ámu kángkáng.

¹⁶ Bâ n̂g ne kángkáng byěm ḿbyí banet-oshê ámu ba/mû ne mbyí kyikit kyibónge, ba-ba-zû kámbyí ké otyém-oshê. Ba-shí kâng oshê ámu ne kángkáng byěm ḿbyí mbyi ké mǔ wǎ kyifen echi ba-kye Óburúkpâbí mú mu Osówo enen. Oshê ámu owaa biǐbwô-oshê ne banyá, ne ba*dachi ba-bwât kámú ba-bi*.

¹⁷ *Da n̂g echi ba-kúng chwǒm nang kyibónge ńkyí ba/fu, babên wǎ chwǒm-ociring* ba-tî kyi-firi ńkyí enen* ne Óburúkpâbí kâng o/chi o-mîng kyibî-kafâ emen esa o-ri běn bafip. Nyǐ o/chi o-ri běn bafip, o-chi běn ba-jê chwóó wǎ eringe nyí o/ryí banchí enen ḿbé kpákpá ocím,

¹⁸ â ben ba/tî kángkáng byije emen ḿbyí me nn/kye běn kurún, ba-chi ńkyí nyǐ mu o-ryuu ng.