Dyitórónómyi 12 - Bokyi Bible

Kyikit Kyibónge ńkyí badakûfé Óburúkpâbí

¹ Nyín byije ḿbyí ben badatî ké kángkáng bankéré ḿbé ben badakyú ké esí nyí Óburúkpâbí mú mu Osówo mú banchí enen ḿbé kpákpá mu o-kyâ běn. Fwôo n̂g atông ba-jwo kámbyí.

² Ké esí nyí ben bamu ba-koo ng, bên n̂ kángkáng byikit ḿbyí banet ámbe mbe ba-fâ esówo ebe, ké kángkáng bubóng-eku ne ké byikû-byichí ḿbyí byi/tôong byikpó.

³ Bên n̂ byikit ebe ḿbyí mbe ba-chi i byifen, ba-sé aká-ociring ebe rugirugi. Shí n̂g biinchéng-bukye ḿbyí osówo-onyinyi ebe mú badakó Ashéra, ba-kpet erím-bakye ebe ba-bên eringe nyí baa*ba/chi ba-chîfé kányí ké byikit ámbyi*.

⁴ *Da n̂g echi ba-kûfé Óburúkpâbí mú mu Osówo enen* ké bukwóp ḿbú banet ḿbén mbe ba-fâ esówo ebe*.

⁵ Ké byikim-esí ḿbyí byikû-banet enen, Óburúkpâbí o/chi o-cá kyikit kyibónge ńkyí banet badakûbê ké bushú emen ba-ba-kye ǎ ofê.

⁶ Ké kyikit ánkyi nké ben ba/chi ba-kûchi byifen enen ḿbyí badashí oshǐng, ne byifen byikíri ne eyáré nyí badakúng kyikit kyibónge ké byikit diǐkpú ba-kye Óburúkpâbí ne eyáré ekíri nyí ben ba/ryí Óburúkpâbí ocím ne eyáré enen nyí dyityém ne bambwôp kashú-bwǎn-bampong ne ebû enen.

⁷ Ányi ké bushú ḿbú Óburúkpâbí mú mu Osówo enen, mú oo/jware běn nké ben ne byikû-banet enen ba/chi ba-ryí byiryíng, ba-jwo bunyîn ḿbú byěm ḿbyí byinong ḿbyí ben baa/chi bǎmkpóngé ba-já.

⁸ Ké nkéré mú nkéré ámu oo/fyi, ben baa*man ba-chi wǎ eringe nyí bamu ba-chi i*. Tete kyi-ribi kántîk, ben ashí kángkáng bamu ba-fâ Óburúkpâbí eringe nyí kyi/nyîn běn,

⁹ ké nǎ, ben ba*da/nung ne* ké esí nyí Óburúkpâbí mú mu Osówo enen mu o-kyâ běn* ké kyikit ńkyí ben ba/chi ba-kyú ké bunyîn-dyityém.

¹⁰ Ké nkéré mú baa/nyáng kace ńké Jódan, Óburúkpâbí o/chi o-mîng běn ba-koo esí ányi ba-kyú ké nyǐ. Nyǐ o/chi o-ku běn ké busa ḿbú kángkáng banet-bushwôn enen, ne ben ba/chi ba-kyú ké bunyîn-dyityém.

¹¹ Óburúkpâbí o/chi o-cá kyikit kyibónge ńkyí ben bada ǎ ekûkye ofê, ne ké kyikit ánkyi nké ben ba/chi ba-bâ ne kángkáng byěm ḿbyí nn/sét běn ba-ba-kye ǎ, byifen enen ḿbyí badashí oshǐng ne byifen byikíri ne eyáré enen nyí badakyii ké byikit diǐkpú ne eyáré ekíri ne eyáré nyí dyityém, nyí ben baa/ryí Óburúkpâbí ocím.

¹² Kyú n̂g ké bunyîn-dyityém ányi, ké bushú emen, cibicibi ne bwǎn enen ne bǎmgbán enen ne bǎmgbán-banchi kyifen-Osówo ḿbé mbe ba-kyú u ké eshê enen. Zîim m̂ ba/fu, bǎmgbán-banchi kyifen-Osówo baa*ba/chi ba-kyú ne esí nyí ebe cát*.

¹³ Ben baa*man ba-chi byifen enen ké kyikit nang kyirá ńkyí kyi/nyîn běn*.

¹⁴ Ba-man ba-chi kámbyí ké kyikit ánkyi kyibónge ńkyí Óburúkpâbí o/chi o-cá ké kyikim-esí ńkyí kyikû-banet enen kyibónge. Ké kyikit ánkyi nké nke nké ben badachi byifen enen ḿbyí badashí oshǐng ne kángkáng byěm byikíri ḿbyí me nn/sét běn.

¹⁵ Nké ba-man n eju byitú enen ba-ryí ké kyikit nang kyirá ńkyí bamu ba-kyú u. Ba-man n eryí enyam nang erá nyí Óburúkpâbí mu o-kyâ běn. Ben ashí kángkáng, nang onet mú bada ǎ eciring ne mú baa*ciring ǎ* o-man n eryí kányí wǎ eringe nyí bamu ba-ryí i enyam-dyikán.

¹⁶ Nké baa*man ba-kúng baróng ebe ba-ryí wǎ byiryíng*. Ba-man ba-pwó kámbé kyísí wǎ omu.

¹⁷ Chwǒm nang kyirá nké ben ba/chi kyifen ba-kye Óburúkpâbí baa*man ba-ryí kánkyí ké byikit ḿbyí bamu ba-kyú u* nang eyáré-esang-byichí enen nyí badakyii ké byikit diǐkpú* nang bato enen* nang bakút-ólif enen* nang bambwôp kashú-bwǎn-bampong ne ebû enen* nang eyáré nyí ba/ryí Óburúkpâbí ocím* nang eyáré enen nyí eda běn efím ké dyityém* nang eyáré ekíri*.

¹⁸ Ben ne bwǎn enen cibicibi ne bǎmgbán enen ne bǎmgbán-banchi kyifen-Osówo ḿbé mbe ba-kyú u ké eshê enen ba-man ba-ryí byiryíng-byifen ḿbyín ké bushú ḿbú Óburúkpâbí mú mu Osówo enen nké nke, ké kyikit-ofê ekye ánkyi kyibónge, ńkyí Óburúkpâbí mú mu Osówo enen odacá. Ányi nké ben ba/chi ba-kyú ké bunyîn-dyityém ké kángkáng byěm ḿbyí ben baa/chi.

¹⁹ Tî n̂g ké dyityém to ba/fu, ben baa*ba/chi ba-né bǎmgbán-banchi kyifen-Osówo* ké kángkáng bankéré ḿbé ben ba/chi ba-kyú ké esí enen ányi*.

²⁰ Ké nkéré mú Óburúkpâbí mú mu Osówo enen oo/chi esí enen e-nere wǎ eringe nyí nyǐ oo/ryí ocím, ben ba-man n eryí enyam-byitú enen ké kyikit nang kyirá ńkyí kyi/nyîn běn.

²¹ Â kyikit ánkyi kyibónge ńkyí ofê ekye kyi/jang etíbî, nang nkéré orá kâng nké kyi/nyîn běn, ba-man n eju mpong nang ebû erá nyí Óburúkpâbí oo/kye běn, ne ba-man n eryí enyam ányi ké byise enen wǎ eringe nyí me nn/sét běn.

²² Nang yeě, nang onet mú bada ǎ eciring nang mú baa*ciring ǎ* o-man n eryí enyam ányi, wǎ eringe nyí odaryí enyam-dyikán.

²³ Nké *da n̂g eryí enyam nyí baróng ba/tôong kányí ké byiko* ké nǎ, dyikpen ndyi ké baróng, ne ben baa*man ba-ryí dyikpen cibicibi ne enyam*.

²⁴ *Da n̂g eryí baróng wǎ byiryíng*. Kúng n̂g kámbé ba-pwó kyísí wǎ omu.

²⁵ Â ben ba/tî kyije ńkyín, kyi/chi kyi-nyîn Óburúkpâbí, ne kángkáng byěm byi/chi byi-ca běn ne bwǎn enen kanong.

²⁶ Kúng n̂g byifen enen ne eyáré enen nyí baa/ryí Óburúkpâbí ocím ba-ca ne mbyí ké kyikit-ofê ekye ánkyi kyibónge.

²⁷ Chi n̂g byifen ḿbyí badashí oshǐng ányi ké kyikit-kyifen echi ńkyí Óburúkpâbí. Chi n̂g to byifen ámbyi ḿbyí badaryí enyam emen ba-pwó baróng ké kyikit-kyifen echi.

²⁸ Tî n̂g kángkáng byěm ḿbyí me nn/sét běn ne atyém enen, ne kángkáng byěm byi/chi byi-ca běn kanong ne bwǎn enen ne banyá, ké nǎ, ben ba/chi ba-kûchi ńkyí nkyi kanong ne ńkyí kyidanyîn Óburúkpâbí mú mu Osówo enen.

Ekó ekuri kyi-kim ne Bakye esháng

²⁹ Óburúkpâbí mú mu Osówo enen o/chi o-bên eshê ké nkéré mú ba-kú ba-koo ng esí ebe, ne ben ba/chi ba-koo kányí ba-kyú ké nyǐ.

³⁰ Ké nkéré mú Óburúkpâbí oo/bên eshê ányi, tî n̂g ké dyityém ba/fu, ben baa*man ba-kúng akwóp nyí mbé mbe ba-fâ esówo ebe* ké nǎ, ńkyí ánkyi kyi/chi kyi-kyú běn wǎ kaǎtám. *Da n̂g ekan ba/fu, ben ba-nyît ng eringe nyí mbé mbe ba-fâ esówo ebe* eringe nyí ben to badakûfé Osówo ké bukwóp ámbu*.

³¹ *Da n̂g echi ba-fé Óburúkpâbí mú mu Osówo enen ké bukwóp ḿbú mbé mbe ba-fâ esówo ebe* ké nǎ, ké bukwóp ḿbú mbé mbe ba-fâ esówo ebe, mbé mbe ba-chi i kángkáng banunut-byěm ḿbyí mbyi byi-sa ng Óburúkpâbí kafâ. Mbe ba-kúng ng nang bwǎn ebe ba-chi i byifen ké kafâ-okwâ ké byikit-byifen ebe echi.

³² Chi n̂g kángkáng byěm ḿbyí me nn/sét běn. *Da n̂g efé chwǒm kyikíri ké kafâ* ba-fîm nang chwǒm kyikíri ké mbyí*.