Dyitórónómyi 11 - Bokyi Bible

Eringe nyí Óburúkpâbí mu Kiǐtí

¹ Óburúkpâbí mú mu Osówo enen ojê běn, ba-tî kángkáng byije emen kángkáng nkéré.

² Zîim m̂ ńkyí ben baa/kwâa kurún kyi-kim ne Óburúkpâbí ké byěm ḿbyí oo/chi běn ba-ri. Kyi/mû ben bayén, *chí bwǎn enen* nké ba/ri byěm ḿbyín. Ben ba/ri eringe nyí nyǐ mu kiǐtí ne busa emen

³ ne byěm-akat emen. Ben ba/ri ńkyí nyǐ o/chi otu mú Éjip ne oshê emen omúmú.

⁴ Ben ba/ri ké nkéré mú Óburúkpâbí o/ju basúja ḿbé Éjip bamúmú, cibicibi ne bubyî-orá ebe ne bamútu ebe ḿbé bubyî-orá budatut, ké nkéré mú o/chi kámbé ba-jâ ké baya ḿbé Rêt, ńdyí mbé mbe ba-nwa ng ne ben ba-bâ ké kyikû.

⁵ Ben bamu ba-nyît ng ńkyí Óburúkpâbí o/chi ké dyishí enen ké kyikim-dyikán ne ben ba-ribi nyín.

⁶ Ben bamu ba-zîim m ńkyí nyǐ o/chi Datân ne Ábyíram ḿbé bwǎn-Élyap mú o/fím kyikû-banet ńkyí Rúben. Ké bushú enen kángkáng, esí e/bâa ocím e-myii kámbé, cibicibi ne byikû-banet ebe ne bampyep ebe ne kángkáng bǎmgbán ebe ne byitú ebe.

⁷ Ké ntûntû, ben nké bamu banet ḿbé ba/ri kángkáng biǐtí-byěm ḿbyín, ḿbyí Óburúkpâbí oo/chi.

Banjware ḿbé Esí nyí Óburúkpâbí o/ryí Ocím

⁸ Tî n̂g kángkáng byije ḿbyí me nn/kye běn kurún. Â ba/tî kámbyí kâng, ben ba/chi ba-man enyáng kace ńké Jódan ba-kyú ké esí nyí ben ba-kú ba-bâ enung ké nyǐ.

⁹ Ne ben ba/chi ba-rí chwóó ké esí ányi nyí edabát byiryíng, nyí Óburúkpâbí o/ryí ocím o/fu, nyǐ o-kyâ banchí enen ḿbé kpákpá ne bwǎn ebe.

¹⁰ Esí nyí ben ba-kú ba-bâ ekyú ké nyǐ e*fí wǎ esí nyí Éjip* ké kyikit ńkyí ben ba/mû ba-kyú u kpákpá* nyí â ba/kwón esang-byichí* ba-chi i bǎmkpóngé chwóó ḿbé badasím ewo nyí omu odasen ké kyifát*.

¹¹ Nké esí nyí ben ba-kú ba-bâ enung ké nyǐ nyi esí nyí eku ne ewo, esí nyí omu mu o-na ng ké nyǐ.

¹² Óburúkpâbí mú mu Osówo enen mu o-tún n esí ńnyín kanong, o-bám m kányí dyije dyimúmú.

¹³ Ké bubwô ámbu kâng, tî n̂g byije ḿbyí me nn/kye běn kurún. Óburúkpâbí mú mu Osówo enen ojê běn, ba-chi bǎmkpóngé ba-kye ǎ ne dyityém enen kángkáng.

¹⁴ Â ba/chi éné, nyǐ o/chi o-twóm omu ké esí ányi, ké ochíchí-nkéré mú badaryuu kámú, eringe nyí ben badajá byiryíng ne bato ne bakút-ólif

¹⁵ ne biǐbyâa ḿbyí byitú enen byidaryí. Ben ba/chi ba-já kángkáng byiryíng ḿbyí bamu ba-ryuu ng.

¹⁶ *Da n̂g ebángê ba-chi běn ba-mîng Óburúkpâbí* ba-kûfé esówo ekíri*.

¹⁷ Â ba/chi éné, Óburúkpâbí o/chi o-sa kafâ ne ben. Nyǐ o/chi o-kám omu, ne esí enen e/chi e-jwóm nyí byiryíng bii*kpen to*. Kaa*bwom to ne ba-kpú ányi* nang ké nkyi esí nyí enong* nyí nyǐ mu o-kyâ běn*.

¹⁸ Zîim m̂ byije ḿbyín, ba-fé kámbyí ké dyityém. Bwá n̂g kámbyí ké abîng-bubwô enen ne ké bambwô enen eringe nyí badakûzîim kámbyí.

¹⁹ Tángê ê bwǎn enen kámbyí. Raa n̂g kyi-kim ne mbyí ké byise enen ne ké nkéré baa/byí kyíjí ne ké nkéré ba-kú ba-jáng ng ne ké nkéré ba-kú ba-chi i bǎmkpóngé.

²⁰ Sáng n̂g kámbyí ké ecím-afyi ne ké afyi-oshê enen.

²¹ Â ba/chi éné kâng, ben ne bwǎn enen ba/chi ba-rí chwóó ké esí nyí Óburúkpâbí mú mu Osówo enen o/ryí ocím o/fu, nyǐ o-kyâ banchí enen ḿbé kpákpá. Ben ba-kyú u ké esí ányi ne banyá.

²² Tî n̂g ké dyityém enen kángkáng byije ḿbyí me nn/kye běn. Óburúkpâbí mú mu Osówo enen ojê běn, ba-chi kángkáng byěm ḿbyí mu o-sét ng běn, ba-fé dyityém ne nyǐ.

²³ Nyǐ kâng o/chi o-ró kángkáng eshê ányi â ba-kú ba-cen n ba-câ, ne ben ba/chi ba-kyú ké esí nyí e/já eshê nyí nyi ne kiǐtí-busa e-shwôm běn.

²⁴ Kángkáng ecing nyí ben ba/chi ba-cím byiká ké nyǐ e/chi e-firi nyí enen. Esí enen e/chi e-nere e-fím ké kyikim-dyikán ké busyísen, e-ribi ké eku nyí Lebánon, ké kyicê ńkyí bushûyû. E-fím ké kace ńké Yuférétyis, ké kyicê ńkyí óbyísû odabyí, e-ribi ké baya ḿbé Medeterényan, ké kyicê ńkyí óbyísû odaríbî o-jâ.

²⁵ Nang ba-ca nyá ké esí ányi, Óburúkpâbí mú mu Osówo enen o/chi o-chi banet ba-shî běn, wǎ eringe nyí nyǐ oo/ryí ocím, ne onet o*fí mú o/chi o-man běn eku*.

²⁶ Kurún, me nn/tî běn byěm byifee ḿbyí badafîm kyibónge, ojware ne kyishû.

²⁷ Ba-koo ng ojware â ben ba/tî byije ḿbyí Óburúkpâbí mú mu Osówo enen, ḿbyí me mu n-kyâ běn kurún.

²⁸ Nké ba-koo ng kyishû â ben ba/né etî byije ḿbyín ba-bírî ba-kpet esówo ekíri efé, nyí ben ba*da/fé ne nang kabónge*.

²⁹ Ké nkéré Óburúkpâbí oo/bê ne ben ké esí nyí bamu ba-wâa ng edakyú, ba-man ba-bwom ké kaku ńké Gerízim ba-sét ojware mún, ba-bwom to ké kaku ńké Ébel ba-sét kyishû ńkyín.

³⁰ Eku ńnyín efee nyi ké kyicê-kace ńké Jódan ńkyí esû edaríbî e-jâ, ké kyikim-esí ńkyí banet ḿbé Kínan, ḿbé mbe ba-kyú u ké bakô-kace ńké Jódan. Nyǐ nyi ké kyicê ńkyí esû edaríbî e-jâ, ne e*da/tíbî ne byichí-ociring ḿbyí Móre* fáráng ne oshê mú Gyígal.

³¹ Ben ba-kú ba-bâ enyáng kace ńké Jódan, ba-kyú ké esí nyí Óburúkpâbí mú mu Osówo enen mu o-kyâ běn. Ké nkéré mú baa/koo kányí, ba-kyú ké nyǐ,

³² tî n̂g ké dyityém ba/fu, ben ba-tî ng kángkáng byije ḿbyí me mu n-kyâ běn kurún.