Dyitórónómyi 10 - Bokyi Bible

Músis o/chîkoo Byije ámbyi

¹ Ne Óburúkpâbí o-raa kâng ne me o/fu, két biǐbáá-aká byifee wǎ ḿbyí mbwôp kashú, a-chi mkpukpu ké byichí mú adafé kámbyí. Bâ a-kâm mě kyíbóng-kaku,

² ne n/chi n-sáng ńkyí m/mû n/sáng ké biǐbáá-aká ḿbyí a/sé, ne a/chi a-yip kámbyí kâng a-fé ké mkpukpu ámu.

³ Ké bubwô ámbu, n/chi mkpukpu ké byichí-akákya, ne n-két biǐbáá-aká byifee wǎ ḿbyí kashú, n-kúng kámbyí n-yú kaku.

⁴ Ne Óburúkpâbí o-kúng kâng bachíchí-byiraa ḿbé nyǐ o/mû o/sáng ké kashú o-sáng ké biǐbáá-aká ámbyi, byije ámbyi diǐkpú ḿbyí nyǐ o/kye běn ké nkéré mú o/bwom ké kafâ-okwâ o-raa ne ben, ńdyí ba/cibi kyikit kyibónge ké kaku. Óburúkpâbí o/kye mě biǐbáá-aká ámbyi,

⁵ ne m-bírî esim n-shû kaku. Wǎ eringe nyí Óburúkpâbí o/sét mě, me n/kúng kámbyí n-fé ké mkpukpu ámu mú m/mû n/chi, ne byi/tôong ké kafâ-mkpukpu ámu kyi-fím ké nkéré ámu.

⁶ Banet ḿbé Ézerel ba-dim ké abíng-omu nyí a/já banet ḿbé Jákan ba-wâa Mósera. Ányi nké Éron o/kpú, ba-ryii ǎ, ne Elyǎza mú wǎn emen o-kúng kyikit emen wǎ nchi kyifen-Osówo.

⁷ Ba-dim ké kyikit ánkyi ba-wâa Gudu gúda. Ba-bwa ba-dim ányi ba-ca kashú ba-da-ribi ké Jotabáta, ké kyikit ńkyí nkyi ne buce chwóó.

⁸ Ké [kaku ńké Sána] nké Óburúkpâbí o/fîm banet ḿbé kyikû-banet ńkyí Lyíva o/fu, bakûtún mkpukpu-byěm emen ámu, ba-kûchi bǎmkpóngé ba-kyâ ǎ wǎ banchi kyifen emen, ba-kûkúng dyizîn emen ba-jware ng banet. Bǎmkpóngé ḿbén nké mbé ba/tôong ba-chi i.

⁹ Nkyí nké kyikû ńkyí Lyíva ba*da/chîkoo esí wǎ eringe nyí byikû ḿbyí áku ba/koo*. Ńkyí mbé ba/koo, ányi ofê mú mbé badakyú banchi kyifen ḿbé Óburúkpâbí, wǎ eringe nyí Óburúkpâbí mú mu Osówo enen o/ryí ocím.

¹⁰ Me n/rí ké kaku ánke bajam-ací bafee wǎ eringe nyí n/rí ké mbwôp kashú. Óburúkpâbí o/chî mě ejwo, ne o-bángê o/fu, nyǐ oo*ju běn*.

¹¹ Ne o-sét mě kâng o/fu, me ntông běn bukwóp eringe nyí ben badakoo esí nyí nyǐ o/mû o/ryí banchí enen ḿbé kpákpá ocím.

Ńkyí Osówo mu o-ryuu ng

¹² Kántîk, ǎ banet-Ézerel, fwôo n̂g atông ba-jwo kángkáng byěm ḿbyí Óburúkpâbí mú mu Osówo enen mu o-ryuu ng o/fu, ben bachi. Kû n̂g efé Óburúkpâbí ba-chi ńkyí mu o-sét ng běn. Ojê běn, ba-chi bǎmkpóngé ba-kye ǎ ne atyém enen kángkáng,

¹³ ne tî n̂g kángkáng byije emen. Me mu n-kyâ běn kámbyí kurún ké ochwâp mú enen.

¹⁴ Nang bubóng ḿbú mbu kyíbóng nyáám bu/já Óburúkpâbí. Esí to e/já ǎ ne kángkáng byěm ḿbyí mbyi ké nyǐ.

¹⁵ Nké kyijé ńkyí Óburúkpâbí o/mû ne nkyí ne banchí enen ḿbé kpákpá kyi/mû kyi/jê kyi-shwôm, ńkyí nyǐ o/mîng banet ḿbé áku kángkáng o-cá běn ben, ne ben ba/tôong banet emen ḿbé nyǐ o/cá.

¹⁶ Ké bubwô ámbu kâng, kyi-fím kurún kyi-ca kashú, kû n̂g echi ńkyí Óburúkpâbí mu o-sét ng běn, ba-mîng ashí eshwane.

¹⁷ Óburúkpâbí mú mu Osówo enen mu kiǐtí o-shwôm kángkáng esówo ne kángkáng asa. Nyǐ mu kiǐtí, ne o/rêe, ne mu mú bada ǎ eshî. Nyǐ oo*ryí acît* ne oo*koo ngu*.

¹⁸ Nyǐ mu o-ri ng o/fu, ba/tî bwǎn-kyibén ne banyǐnkú kanong. Bacinbánet ḿbé mbe ba-kyú u ne banet eten mbe ba-jê ng ǎ, ne mu o-kyâ kámbé byiryíng ne byídí.

¹⁹ Ké bubwô ámbu kâng, tông n̂g kyijé ne bacinbánet ámbe, ké nǎ, nkéré obónge, ben ba/mû bacinbánet ké Éjip.

²⁰ Chi n̂g ńkyí Óburúkpâbí mú mu Osówo enen mu o-sét ng běn, ba-kû ǎ efé nyǐ nké nke. Fé n̂g dyityém ne nyǐ, ba-kûryí ocím ké dyizîn emen nké nke.

²¹ Kye n̂g ǎ akpee. Nyǐ nké mu Osówo enen, ne ben baa/kúng achi enen ba-ri biǐtí ne biinkaa byiko-byěm ḿbyí oo/chi ké dyishí enen.

²² Ké nkéré mú banchí enen ḿbé kpákpá ba/dim ba-jâ Éjip, mbé ba/mû bajam-banet bachât esim diǐkpú nké nke. Nké kántîk, Óburúkpâbí mú mu Osówo enen oo/chi běn ba-jê wǎ ékpére nyí nyi kyíbóng.