Dyitórónómyi 1 - Bokyi Bible

Nkuli Kyikû-Byěm ḿbyí Músis o/sáng

¹ Nwet mún o/sét kyi-kim ne byiraa ḿbyí Músis o/raa ne banet-Ézerel ké nkéré ba/mû ké kyikim-dyikán, ké kyicê-kace-Jódan ńkyí óbyísû odabyí. Mbé ba/mû ké owo mú kace ńké Jódan, fáráng ne Sûp, ké otyém ne otyém mú oshê mú Páran ne eshê nyí Tófel ne Lában ne Házerot ne Dyizáhap.

² Kyi-kúng ng ací diǐkpú ne din ne onet o-fím ké kaku ńké Sána o-cen o-ribi Kádyishi-Bánya, ké kiǐfáng ńkyí esí-eku éku nyí Édom.

³ Ké mbwôp kashú-dyicí mú etukáku diǐkpú ne din ké bajam-aje bafee mú mbé ba/dim ké Éjip, Músis o/sét banet-Ézerel kángkáng byěm ḿbyí Óburúkpâbí o/mû o/sét ǎ o/fu, osét kámbé.

⁴ Ńkyín kyi/mû ké nkéré mú [Óburúkpâbí] oo/kpógê Otu Síhon mú banet ḿbé Ámórit, mú o/mû otu mú oshê mú Héshibon, ne Otu Ôok mú Báshan, mú o/mû otu mú eshê nyí Ashítarat ne Édara.

⁵ Kyi/mû ké nkéré mú banet-Ézerel ba/mû ké kyicê-kace-Jódan ńkyí óbyísû odabyí, ké kyikim-esí ńkyí Mówep, nké Músis o/kpet esét kámbé byije ḿbyí Osówo. Músis o/sét kámbé o/fu,

⁶ ké nkéré mú be byi/mû ké kaku ńké Sána, Óburúkpâbí mú mu Osówo eten o/sét bě o/fu, ben baa/jang erí chwóó ké kaku ńkén.

⁷ Bú n̂g boompyep enen ba-dim ba-wâa kashú. Ca n̂g ké esí-eku éku nyí Ámórit ne ké kángkáng byikit ḿbyí mbyi ányi fáráng, ba-ca ké owo mú kace ńké Jódan ne ké esí nyí eku éku ne byikit ḿbyí ndege ńdege ne ké kyikim-esí ńkyí busyísen ne ké bukô-baya ḿbé Medeterényan. Ca n̂g ké esí nyí Kínan, ba-ca kashú ba-shwôm eku nyí Lebánon tete ba-ribi ké kiǐtí-kace ńké Yuférétyis.

⁸ Kángkáng byikit ḿbyín nké mbyi esí nyí me Óburúkpâbí n/ryí ocím n/fu, n-kyâ Ébarahâm ne Ázik ne Jekôp ḿbé banchí enen ḿbé kpákpá, ne bwǎn ebe. Ca n̂g ba-da-kyú ké nyǐ.

Músis o/fîm Banet ḿbé badakûpan Banet Bampan

⁹ Músis o/sét banet-Ézerel o/fu, ké nkéré mú be byi/mû byi/tôong ké kaku ńké Sána, me n/sét běn n/fu, bǎmkpóngé ḿbé nda běn ekyú onet-dyishí ba/jê mě ba-shwôm. Me mm*man echi kámbé kǎnchí*.

¹⁰ Óburúkpâbí mú mu Osówo enen oo/chi běn ba-jê wǎ ékpére nyí nyi kyíbóng.

¹¹ Kyi/bát Óburúkpâbí mú mu Osówo mú banchí enen ḿbé kpákpá ochi běn ba-jê égot-kampén kampén ba-shwôm eringe nyí bamu, o-chi běn ba-já byěm wǎ eringe nyí o/ryí ocím.

¹² Nké kyi-cen n nǎ kâng ne me n-já busa me kǎnchí ḿbú nda běn ekûpan bujê-bampan.

¹³ Cá n̂g banet ḿbé mbe ne bubong ne byinyídíng ne ḿbé baa/kán, ké kyikû-banet nang kyirá ḿbé n/chi n-tî kámbé ba-kû běn etún.

¹⁴ Ben ba/bángê ba/fu, chwǒm ńkyín nkyi kanong ńkyí byidachi.

¹⁵ Ne ké bubwô ámbu, me n/kúng bakínkán-banet-ashí ḿbé mbe ne bubong, ḿbé ben ba/cá ké byikû-banet enen, ne n-tî kámbé n/fu, bakû běn etún. Kyicê n/tî kámbé wǎ banet-ashí ḿbé égot-banet etánge, kyicê ḿbé bajam-banet batánge, bakíri ḿbé bajam-banet bafee esim diǐkpú, bakíri ḿbé banet ashí diǐkpú. N/tî to banet-ashí bakíri ké byikû-banet byimúmú.

¹⁶ Ké nkéré ámu, n/sét kámbé n/fu, kû n̂g ejwo bampan ḿbé banet enen mbe ba-bâ ne mbé. Pan n̂ mpan nang orá ké bukwóp ḿbú bunong, nang mpan ámu o/kim ne banet enen nké nke o, nang o/kim ne bacinbánet ḿbé mbe ba-kyú u ne ben o.

¹⁷ *Da n̂g eryí acît ké mpan nang orá mú badakét*. Pan n̂ nang yeě mpan eringe ebónge, nang o-bwa o-kyú ebóng dyizong-onet. *Da n̂g echi ba-shî onet nang obónge* ké nǎ, mpan mú bamu ba-két ng mu o-fím m ne Osówo. Mpan nang orá mú o/shwôm běn busa, bâ n̂g ne mǔ kyikit ejí m-pan kámú.

¹⁸ Ké nkéré ámu obónge, n/kye běn to bacê ké kángkáng byěm byikíri ḿbyí ben ba/mû ba/chi ba-chi.

Banet-Ézerel ba/fîm Banet-Boǒfêp-Esí ké Kádyishi-Bánya

¹⁹ Be byi/chi ńkyí Óburúkpâbí mú mu Osówo eten o/sét bě. Byi/dim ké kaku ńké Sána, byi-cen byi-shwôm kiimbâng ne kiinchi bushî-kyikim-dyikán ánkyi, ńkyí nkyi ké bukwóp ḿbú budajé esí-eku éku nyí banet-Ámórit. Ké nkéré mú byi/ribi Kádyishi-Bánya,

^20-21 me n/sét běn n/fu, baa/ribi kántîk ké esí-eku éku nyí banet-Ámórit, nyí Óburúkpâbí mú mu Osówo eten, Osówo mú banchí eten ḿbé kpákpá mu o-kyâ bě. Tún n̂ achi ba-ri, di kányí áku i. Ca n̂g ba-da-kyú ké nyǐ wǎ eringe nyí nyǐ o/kye busa. *Da n̂g echi ba-kyú ne atyém afee* ba-shî nang oshî*.

²² Nké ben ba/bê ba-kâm mě, ba-sét mě ba/fu, mîng byi-twóm banet ba-bwóp bě kashú, ba-da-kyé kyikû kyi-kim ne esí ányi, eringe nyí bada bě eman esét bukwóp ḿbú bu/nwa bu-shwôm ḿbú byidacen, ne azong-eshê nyí nyi ké kyikit ánkyi.

²³ Okabe ámu o/mû mú onong, ne n-cá kâng banet ké kyikû-banet ké kyikû-banet ashí diǐkpú ne afee.

²⁴ Mbé ba/dim ké esí-eku éku ányi tete ba-ribi ké owo mú Éshikol, ba-kyé kyikû kyi-kim ne mǔ kángkáng.

²⁵ Mbé ba/bwa esim ne byirim-byichí ḿbyí ba/ri áku ba-ba-kye bě, ba-sét bě ba/fu, esí nyí Óburúkpâbí mú mu Osówo eten mu o-kyâ bě nyi nyí edabát byiryíng kanong kanong.

²⁶ Nké ben ba/né ńkyí Óburúkpâbí mú mu Osówo enen o/sét běn, ba/fu, baa*nung ké esí ányi*.

²⁷ Ben ba/rime ne barî ké kyitông ba/fu, be byimu byi-sa ng Óburúkpâbí kafâ. O/fîm bě ké Éjip o/fu, nyǐ o-bâ ng bě eyip o-kye banet-Ámórit ḿbén eringe nyí bada bě eju.

²⁸ Ebóng ńkyí byidace ké esí ányi. Be byimu byi-shî ng. Banet ḿbé byi/twóm kámbé ba/sét bě ba/fu, banet ḿbé mbe ké esí ányi ba-shwane e ba-shwôm bě, ne ba/nárê to ba-shwôm bě, ne mbe ba-kyú u ké eshê nyí ekpe nyí e/wáp kányí e/nyâam wǎ e-ta ng bubóng. Ba/ri biǐnât-banet ké esí ányi.

²⁹ Nké me n/sét běn n/fu, *da n̂g echi ba-shî banet ámbe*.

³⁰ Óburúkpâbí mú mu Osówo enen o/chi o-kyú běn onet-dyishí ne o/chi o-nwa bunwa o-kye běn wǎ eringe nyí ba/ri ǎ o-chi ké Éjip

³¹ ne ké kyikim-dyikán. Ben ba/ri eringe nyí o/kúng běn, chwǒm kyi*da běn echi* ké kyikim-nkéré kyimúmú tete ba-ribi ké kyikit ńkyín, wǎ eringe nyí bonchí odakúng wǎn emen.

³² Nké nang ké n/sét běn byěm ḿbyín, ben ba*da/man efé dyityém ne Óburúkpâbí*

³³ nang ké kángkáng nkéré o/mû o-câ běn kashú* o-kyé ng kyikit ńkyí badakyú o-tî běn*. O/ce běn kashú o-tông běn kiǐfáng ké bumang-okwâ ne buchú ne ké ófíbí ne esû.

Óburúkpâbí o/kye Banet-Ézerel Busông

³⁴ Óburúkpâbí o/jwo byiraa ḿbyí bamu ba-sét ng, kafâ ka-sa ǎ, ne o-sem byiko emen o/fu,

³⁵ onet o*fí nang obónge* ké burwám-byibî-banet ḿbén* mú o/chi o-nung ké esí nyí edabát byiryíng* nyí n/ryí banchí enen ḿbé kpákpá ocím n/fu, n-kyâ kámbé*.

³⁶ Kálep mú wǎn-Jéfúne nké nke o/chi o-nung ké nyǐ. Nyǐ kángkáng nkéré o/tî dyityém ne me, ne n/chi n-kye ǎ ne bwǎn emen esí nyí nyǐ oo/cen ké nyǐ.

³⁷ Ké bubwô enen, Óburúkpâbí o/sa to kafâ ne me, o-sét mě o/fu, nang wo, ǎ Músis, aa*ba/chi a-nung ké esí ányi*.

³⁸ Nké fé Jóshwa mú wǎn-Nûn, mú mu o-chwáp ng ǒ busa. Nyǐ o/chi o-ca banet-Ézerel kashú ba-koo esí ányi.

³⁹ Ne Óburúkpâbí o-raa kâng ne be ashí amúmú o/fu, bwǎn enen ḿbé ba*da/kán ne* ba-nyît kyibî ne kyinong* bwǎn ḿbé bamu ba-raa ng ba/fu, banet-bushwôn enen ba/chi ba-koo běn kámbé, nké ba/chi ba-nung ké esí ányi. Me n/chi n-kye kámbé esí ányi ba-kyú ké nyǐ.

⁴⁰ Nké kyi-kim ne ben, bírî n̂g ba-bwa esim ké kyikim-dyikán, ké kiǐfáng ńkyí kyidajé dyiga ńdyí Ákwaba.

⁴¹ Ben ba/faa ba/fu, Músis, be bii/chi kyibî ké bushú ḿbú Óburúkpâbí. Nké kántîk, be byi/chi byi-kye bunwa, wǎ eringe nyí Óburúkpâbí mú mu Osówo eten o/kye bě busa. Kyi-fím ányi, nang yeě ké burwám enen o/kpá byiko-bunwa ḿbú ba/kabe ba/fu, esí nyí eku éku ee*sóng ekoo*.

⁴² Nké Óburúkpâbí o/sét mě o/fu, kuri kámbé ekó, ba*dachi ba-kye bunwa* ké nǎ, me mm*ba/chi n-kyú ne mbé*. Banet-bushwôn ebe ba/chi ba-kpógê kámbé.

⁴³ Me n/sét běn ńkyí Óburúkpâbí o/sét, nké ben ba*da/jwo ojwǒng*. Ben ba/bwom bunwa ne nyǐ, ne ké byiko etông enen ba-dim ba-da-nung ké esí-eku éku.

⁴⁴ Ne banet-Ámórit ḿbé ba/mû ba-kyú u ányi kâng ba-byí bunwa ne ben wǎ bakwan. Ba/zóngê ne ben ké kyikû tete ba-ribi ké Hóma, ba-kpógê běn ányi ké esí-eku éku nyí Édom.

⁴⁵ Ne ben ba-tii kâng ba-kó Óburúkpâbí ba/fu, ochwáp běn, nké nyǐ o*da/fwôo atông o-jwo ńkyí ba/mû ba-sét ng ǎ*.

Byěm ḿbyí byi/chi ké Kyikim-Dyikán

⁴⁶ Ké bubwô ámbu kâng, ké nkéré mú bii/rí ké Kádyishi chwóó.