Dányel 9 - Bokyi Bible

Dányel o/fé Nshwam o-kye Osówo ké Bubwô-Banet Emen

¹ Otu Daráyas mú o/fím Médya, mú o/mû wǎn-Otu Zérekez o/kyú otu mú Bábyílon.

² Ké mbwôp kashú-dyije ńdyí butu emen, me m/mû n-kwâa ng ejá-Osówo nyí ba/sáng kyísí, ne m/mû n-kabe ng kyi-kim ne bajam-aje bachât esim diǐkpú nyí Jerúsélem o/chi o-kyú bênbên, wǎ eringe Óburúkpâbí oo/sét Jeryimáya mú mkpábé emen.

³ Ne me n/fé nshwam kanong kanong n-kye Osówo Óburúkpâbí ne n/tîm ǎ arông, n-cíp esong, n-fé byídí-dyikán eta, ne n/kyú ké atông.

⁴ Me n/fé nshwam n-kye Osówo Óburúkpâbí ejí n-sét byibî ḿbyí banet ejí. Me n/raa n/fu, Osówo Óburúkpâbí, wo amu kiǐtí ne be byimu byi-fâ ǒ. Wo amu a-tî ng ocím eyên mú a/ryí a-sem byiko eyên, ne amu a-tông ng banet ḿbé amu a-jê ng kámbé ne mbe ba-chi i ńkyí wo a/kye busa kyijé eyên ńkyí kii*man*.

⁵ Be bii/chi byibî ne bii/kyú byibî-banet ne bii/chi byěm ḿbyí bii*nwa*. Be bii/né ńkyí wo a/fu, be byichi, ne bii/bírî esim ké ńkyí wo a/tông bě a/fu, nkyi kanong.

⁶ Be byi*da/fwôo atông byi-jwo bamkpábé ḿbé badasét byiraa eyên* ḿbé mbe bǎmgbán eyên* ḿbé ba/raa ne batu eten ne banet-ashí eten ne banchí eten ḿbé kpákpá* ne oshê eten kángkáng*.

⁷ Óburúkpâbí, wo kángkáng nkéré amu a-chi i ńkyí nkyi kanong. Nké be kángkáng nkéré byimu byi-fâ byiko eten éshwân. Ńkyín kyi/kim ne be kángkáng mú byimu byi-kyú u ké Judyâ ne Jerúsélem ne kángkáng banet-Ézerel ḿbé wo a/pwó byiryibyiryi ké eshê nyí fáráng ne nyí tete, ké nǎ, mbé ba/mû ba*da/fé dyityém ne wo*.

⁸ Batu eten ne banet-ashí eten ne banchí eten ḿbé kpákpá baa/chi byěm-éshwân, ne ba/chi byibî ké bushú eyên, ǎ Óburúkpâbí.

⁹ Wo amu a-ri ng banet bafip ne amu a-pwoo ng banet nang ké bii/bírî bunwa ne wo.

¹⁰ Ô Osówo Óburúkpâbí eten, be byi*da/tî atông byi-jwo ǒ* ké nkéré mú wo a/sét bě a/fu, be byikyú dyikpen wǎ eringe byije eyên ḿbyí a/kye bamkpábé ḿbé badasét byiraa eyên ḿbé mbe bǎmgbán eyên a/fu, bakye bě* byi/sét*.

¹¹ Kángkáng banet-Ézerel ba/bên byije eyên ne ba/né ejwo ńkyí wo a/sét. Be byi/chi byibî ké bushú eyên, ne ké bubwô ámbu, wo a/bê bě ne byishû ḿbyí ba/sáng ké byije ḿbyí Músis mú o/mû ḿgbán eyên.

¹² Wo a/chi ńkyí a/fu, wo a-chi i bě ne banet-ashí eten. Wo a/kye Jerúsélem busông bu-jê bu-shwôm ḿbú oshê nang orá ké ejíí.

¹³ A/kye bě kángkáng busông ḿbú ba/sét ké byije ḿbyí Músis. Nké nang kántîk, ǎ Osówo Óburúkpâbí eten, be byi*da/kan ne byi/fu, byi-chi i kyi-nyîn ǒ ké byibî emîng* nang ké ntûntû eyên ecen*.

¹⁴ Ô Osówo Óburúkpâbí eten, wo a/mû a/kpá byiko ḿbyí ada bě ekye busông, ne wo a/kye bě, ké nǎ, kángkáng nkéré, wo amu a-chi i ńkyí nkyi kanong, ne be byi*da ǒ ejwo*.

¹⁵ Ô Osówo Óburúkpâbí eten, wo a/tông bě busa eyên ké banet eyên ḿbé wo a/fîm kámbé ba-byí ké Éjip, ne byi/tôong byi-zîim m busa eyên. Be bii/chi kyibî ne bii/chi ńkyí kii*nwa*.

¹⁶ Wo a/bwom bě ké esim ké nkéré mú o/shwôm ké esim. Ké bubwô ámbu, kafâ ka*da ǒ echîsa ne Jerúsélem*. O-chi i oshê eyên mú kaku-ociring eyên. Kángkáng banet ḿbé ké eshê nyí nyi fáráng nyi e-tún n Jerúsélem ne banet eyên fúú, ké bubwô-byibî eten ne byibî-byěm ḿbyí banchí eten ḿbé kpákpá ba/chi.

¹⁷ Ô Osówo, jwo nshwam ejí ne arông nyí mu n-tîm m ǒ. Bwât kiǐtí-kyise-kyifen eyên echi ńkyí baa/bên. Bwât kánkyí eringe nyí nang yeě odanyît o/fu, wo a-chi i Osówo.

¹⁸ Ô Osówo, fwôo atông a-jwo bě. Tún bě achi a-ri afaníkong nyí be byimu ké nyǐ ne busông ḿbú oshê mú mu o-bángê e dyizîn eyên. Be byimu byi-fâ nshwam byi-kyâ ǒ, ké nǎ, wo amu a-ri ng banet bafip, *chí ké bubwô ḿbú be bii/chi ńkyí nkyi kanong*.

¹⁹ Óburúkpâbí, jwo bě. A-pwoo bě. Fwôo atông a-jwo bě a-chi chwǒm. *Dabên nkéré* eringe nyí nang yeě odanyît o/fu, wo amu Osówo. Oshê mún ne banet ḿbén ba/já ǒ wo.

Géberel o/sét kyikû-Byěm ḿbyí byi/chi byi-chi

²⁰ Me n/fé nshwam n-ca kashú, n-sét ng byibî ejí ne ḿbyí banet ejí ḿbé Ézerel, n-tîm m Osówo Óburúkpâbí ejí arông n/fu, obwât kiǐtí-kyise-kyifen emen echi ńkyí ociring o-bi.

²¹ Ké nkéré mu n-fâ nshwam, Géberel mú orím mú onong, mú me n/ri ké burê ḿbú mbwôp kashú, o/byí ké abyibabang o-bâ ké kyikit ńkyí m/mû. Kyi/mû nkéré mú badachi kyifen-dyikurúku.

²² Nyǐ o/sét o/fu, Dányel, me mm/bê nyín eringe nda ǒ echwáp a-nyît kyikû-byěm ḿbyí ba/sét ba/fu, byi/chi byi-chi.

²³ Osówo o/faa ǒ ojá ké nkéré mú wo a/kpet ǎ arông etîm. Wo amu a-jê ng ǎ, ne ké bubwô ámbu, me mm/bê ǒ esét eringe nyí nkyi. Tî atông kántîk a-jwo ké mu n-sét ng kyikû-burê ámbu.

²⁴ Nkéré mú Osówo oo/tî o/fu, nyǐ o-chi i banet eyên ne oshê eyên mú o/já ǎ ba-fem ké byibî ne ké byibî-byěm mu bajam-aje bachât esim-aje diǐkpú ké kampén káchâtkányi. Ba/chi ba-pwoo byibî ne ba/chi ba-bâ ne kanong echi ńké ne banyá, eringe nyí burê ne ńkyí ba/sét ba/fu, kyi/chi kyi-chi byidachi ntûntû, ne ba/chi ba-bwât ba-chîjware [kiǐtí-kyise-kyifen-Osówo echi ńkyí ociring.]

²⁵ Tî ńkyín ké dyityém a-nyît a/fu, kyi-fím ké nkéré mú ba/chi ba-kye busa ba/fu, babwât Jerúsélem ba-bi, tete mú otu-dyishí mú Osówo o/cá o-bâ, aje káchâtkányi ké kampén káchâtkányi a/chi a-shwôm. Ba/chi ba-bwât Jerúsélem ba-bi ne byiká-oshê ne ekpe nyí shwanshwan ba-wâng kámú ne o/chi o-waa ké bajam-aje bachât esim-aje afee ké kampén káchâtkányi. Nké nkéré mún o/chi o-kyú nkéré mú afaníkong.

²⁶ Ne ké nkuli kyikû-nkéré ámu, ba/chi ba-ju otu-dyishí mú Osówo o/cá, [chwǒm o*da/chi*.] Bannwa byití ḿbé kiǐtí-otu ba/chi ba-bên oshê ne kiǐtí-kyise-kyifen-Osówo echi. Nkuli kyikû emen o/chi o-bâ wǎ kiǐsúsú-kace, ne o/chi o-bâ ne byití ne banet eju ḿbyí Osówo oo/tî o/fu, byichi.

²⁷ Kiǐtí-otu ánkyi o/chi o-ryí ocím mú shwaneshwane ne banet chwóó ké aje káchâtkányi. Ne ké nkéré jangjang kafee-nkéré ámu oo/fyi, nyǐ o/chi o-chi ba-mîng byifen echi ne eyáré ekye. Ba/chi ba-tî kiinchi bushî-chwǒm-ociring ké kyikit-kiǐtí-kyise-kyifen-Osówo echi ńkyí kyi/nyâam kyi-shwôm, ne kyi/chi kyi-waa ányi tete onet mú o/tî kánkyí ányi o-ri nkuli kyikû mú Osówo oo/chi o-tî ǎ.