Dányel 7 - Bokyi Bible

Burê ḿbú Dányel o/ri kyi-kim ne Biǐnyám Byinyii

¹ Ké mbwôp kashú-dyije ńdyí Otu Besháza o/mû otu mú Bábyílon, me Dányel n/ri burê, ne n/ri chwǒm-akat ké buchú ámbu. Me n/sáng burê ámbu kyísí, ne ńkyí n/sáng kyi-kim

² ne ńkyí n/ri ké buchú ámbu nkyi něen, afú a/mû a-tugi ng byicê byimúmú ne a/mû a-díp ng baya ḿbé baryên.

³ Biǐnyám byinyii ḿbyí byiryên byi-byí ké kafâ-baya ámbe. Nang kyirá kyi/mû dyizong buko.

⁴ Ńkyí mbwôp kashú kyi/mû éné wǎ ekpang nyí nyi ne eríp etangetang ké dyishí ne kyíchwan. Nké nkyí kyi/mû ne abyibabang wǎ kiinkwa. Ké nkéré m/mû n-tún n, ba/zú abyibabang emen. Ba/bêem kiǐnyám ánkyi kyíbóng ne ba/chi kánkyí kyi-bwom wǎ onet. Ne ba-kye kánkyí kâng dyityém ńdyí onet.

⁵ Nnyinyěng-kiǐnyám kyi/mû wǎ enyam nyí badakó bê, ké kyi/bwom cip ké byiká emen ḿbyí ké esim. Nkyí kyi/mû kyi/níbî efan echât ké asháng, ne ejá e/raa ne nkyí e/fu, kûryí enyam eringe nyí kyi/nyîn ǒ.

⁶ Ké nkéré mu n-tún n, kiǐnyám kyikíri kyi/byí. Nkyí kyi/mû wǎ ekpang eyén, nké abyibabang-bunurung anyii a/mû kánkyí ké esim ne kyi/mû ne ashí anyii, ne ba/mû ba/kye kánkyí busa.

⁷ Ké nkéré mu n-tún n, nnyinyěng-kiǐnyám ké byinyii kyi-byí. Kyi/mû ne busa ne kyi/mû kyi/bên, ne kyi/mû kyi-chi i bushî. Nkyí kyi/mû kyi-shiryi ng byěm ḿbyí kyi/ju ne biimbâng-asháng-áyon emen, kyi-cím kámbyí to ké byiká. Nkyí kyi/yángê ne biǐnyám ḿbyí áku, ké nǎ, nkyí nkyi ne etwóm diǐkpú.

⁸ Ké nkéré mu n-tún n etwóm ányi, me n/ri ké otwóm mú kaǎníng mu o-byí i ké burwám-etwóm nyí áku. Otwóm ámu o-páp etwóm echât nyí e/mû ányi kpákpá. Otwóm mún o/mû ne achi nyí onet ne ocím mú mu o-raa ng ne byiko etông.

Burê kyi-kim ne Nyǐ mú mu o-kpen n ne Banyá

⁹ Ba/mû ba-tî ng bukyúng-butu ké byikit ebe ké nkéré mu n-tún n. Nyǐ mú mu o-kpen n ne banyá o/kyú ké kakyúng-butu kabónge. Byídí emen byi/mû kpárádádát wǎ abíp, ne eji emen e/mû wǎ enyam nyí kpárádádát. Kakyúng-butu emen ńké nke twóóm ké biǐkât-mútu ḿbyí mbyi wǎ okwâ ka/mû ka-mang ng okwâ

¹⁰ ne kace ńké nke ka-mang ng okwâ ka/mû ka-byí i ké nké. Égot-banet e/mû chwóó nyí e/mû e-bángê e ǎ byitwóm, ne bajam-égot-banet ba/bwom ǎ ké bushú. Esuk e/kpet ekyú, ne ba/bâa banwet.

¹¹ Ké nkéré mu n-tún n, me m/mû n/chîjwo ké otwóm ámu mu o-raa ng ne byiko etông. Ńdyí mu n-tún n, n/ri ké baa/ju kiǐnyám ńkyí nryî esim ba-twóp kánkyí ké bumang-okwâ ba-shí.

¹² Ba/koo busa ḿbú biǐnyám ḿbyí áku, nké ba/mîng kámbyí byi-kpen byi-ca kashú ké kyikim-nkéré.

¹³ Ké nkéré mu n-ri ng burê ḿbún ne buchú, me n/ri chwǒm ńkyí nkyi éné wǎ onet. Ófíbí o/mû o/wâng ǎ, ne nyǐ o/mû mu o-king ng o-fárâng ng mě, ne o-dim kâng o-kâm nyǐ mú mu o-kpen n ne banyá, ba-kám ǎ ba-tông ǎ.

¹⁴ Ba/kye ǎ busa ne ofê ne butu eringe nyí banet ḿbé eshê kángkáng ne kángkáng byire bada ǎ ebángê byitwóm. Busa emen bu-waa ng ne banyá, ne butu emen boo*man ne banyá*.

Ba/sét Kyikû-Byěm-Akat ḿbyí Dányel o/ri

¹⁵ Byěm-akat ḿbyí n/ri byi/chi mě bushî, ne dyityém ejí dyi/waa mě yógeyóge kanong kanong.

¹⁶ Me n/dim n-kâm onet obónge ké burwám-banet ḿbé ba/bwom ányi, m-bí ǎ n/fu, osét mě kyikû emen kángkáng. Ne nyǐ kâng o-sét mě kyikû.

¹⁷ Nyǐ o/sét o/fu, biimbâng-biǐnyám ḿbyín byinyii, ányi batu banyii ḿbé ba/chi ba-já busa-butu ké ejíí.

¹⁸ Banet ḿbé Osówo mú mu kyíbóng kyíbóng ba/chi ba-koo busa-butu, ne ba/chi ba-kyú ne mbú ne banyá.

¹⁹ Me kâng m/mû n-ryuu ng n/fu, n-nyît ng ntûntû kyi-kim ne nryî esim-kiǐnyám ké biǐnyám byinyii, ńkyí kyi/mû kyi/yángê ne ḿbyí áku, ne kyi/mû kyi-chi i bushî kanong kanong ńkyí kyi/mû kyi-shiryi ng byěm ḿbyí kyi/ju ne biinfwa-borôn emen, kyi-jwóm kámbyí ne asháng-áyon emen ne kyi-cím kámbyí to ké byiká.

²⁰ Ne m/mû n-ryuu ng n/fu, n-nyît ng ntûntû kyi-kim ne etwóm ányi diǐkpú ké dyishí ńdyí kiǐnyám ánkyi ne otwóm mú o/bwa o-byí ké nkéré nyí áku ee/byí ne o-chi etwóm echât e-zûu e-róng. Otwóm ámu o/mû ne ocím ne o/mû o-raa ng byiraa ne byiko etông. O/mû o-chi i bushî o-shwôm nyí áku.

²¹ Ké nkéré mu n-tún n, otwóm ámu o/nwa byití ne banet ḿbé Osówo o-kpógê kámbé.

²² Ne nyǐ kâng mú mu o-kpen n ne banyá o/bê [o-ba-két mpan o-nwa banet] ḿbé Osówo mú mu kyíbóng kyíbóng. Nkéré oo/fyi mú banet ḿbé Osówo badakoo busa-butu.

²³ Kyikû ńkyí ba/sét mě kyi/mû něen ba/fu, nryî esim-kiǐnyám ké biǐnyám byinyii, ányi kyi/byí, nnyinyěng-butu ké batu banyii ḿbú bu/chi bu-já busa ké ejíí ne bu/chi bu-yángê ne batu ḿbé áku kángkáng. Butu ámbu bu/chi bu-shiryi ejíí emúmú bu-cím kányí ké byiká.

²⁴ Etwóm ányi diǐkpú, ányi kyi/byí, batu diǐkpú ḿbé ba/chi ba-níbî butu ámbu. Ne otu okíri kâng o/chi o-já busa-butu. Nyǐ o/chi o-yángê kanong kanong ne batu ḿbé kpákpá, ne o/chi o-kpógê batu bachât.

²⁵ Nyǐ o/chi o-raa byiraa o-bât Osówo mú mu kyíbóng kyíbóng, o-cít banet-Osówo. Nyǐ o/chi o-kan eringe nyí nyǐ o/chi o-yángê byije ḿbyí ékwâbashi ebe ne ací nyí badafé Osówo, ne banet-Osówo ba/chi ba-kyú ké bubwô emen ké aje achât ne kyicê.

²⁶ Ne esuk kâng nyí kyíbóng e/chi e-kyú ké mpan e-koo busa emen e-ju ǎ kángkáng.

²⁷ Ba/chi ba-kúng busa ne ofê ḿbyí kángkáng batu ḿbé ké ejíí ba-kye banet-Osówo mú mu kyíbóng kyíbóng. Busa ḿbú butu ebe boo*man to ne banyá* ne kángkáng batu ḿbé ké ejíí ba/chi ba-bángê kámbé byitwóm, ba-chi ńkyí mbé ba/sét.

²⁸ Nyín nké nkyi nkuli kyikû mú kyikû-byěm ḿbyín esét. Bushî bu/róng mě kanong kanong ḿbú bu/chi kashú ejí ka-firi dábe, ne n-fé kángkáng byěm ḿbyín ké dyityém ejí.