Dányel 6 - Bokyi Bible

Ba/twóp Dányel ké Kafâ-Dyibóng-Ekpang

¹ Otu Daráyas o-tî dyityém o/fu, nyǐ o-fîm m bajam-banet nyâchât ba-kyú batu-ashí-byikim-esí ḿbé badaníbî oshê emen.

² Nyǐ o/nye o-cá Dányel ne banet bakíri ashí afee o/fu, bakûtún batu-ashí ámbe eringe nyí badatún oshê kanong.

³ Ka*da/rí* Dányel o-tông o/fu, nyǐ o-man n echi bǎmkpóngé o-shwôm bábe-banet emen nang batu-ashí. Ké nǎ, Dányel o/mû o-tông ng dyityém ńdyí dyinong, otu o/bángê o/fu, nyǐ o-tî ng ǎ otu-dyishí mú oshê omúmú.

⁴ Ne banet-ashí ḿbé áku ne bábe-banet emen ḿbé mbe ba-tún n banet-ashí ba-kan ba/fu, mbé ba-kyé ng bukwóp ḿbú mbé badafu Dányel o*fí o-man n etún oshê*. Nké mbé ba*da/man eri* ké nǎ, o/chi kángkáng byěm kerededet, ne o*da/chi chwǒm ńkyí kii*nwa* o-sét nang kyisédéng*.

⁵ Mbé ba-raa ne barî ba/fu, be bii*ba/chi byi-man ebât Dányel chwǒm nang kyibónge* éné chwǒm ánkyi kyi/kim ne ékwâbashi emen.

⁶ Ne mbé kâng ba-dim ba-da-ri otu, ba-raa ba/fu, kyi/bát átá-otu okpen ne banyá.

⁷ Be ashí amúmú mú byimu batu-ashí ne banet-ashí ne banet ḿbé ba/nye banet-ashí abwô ké esim ne banet-bǎmkpóngé bakíri bii/bángê byi/fu, wo akye kyije a-ri a/fu, ba/tî kánkyí kanong kanong. Kye kyije a/fu, onet nang obónge o*dachi o-bí Osówo nang obónge nang onet okíri chwǒm* ké ací bujam esim diǐkpú* kyi-cibi ne wo oyén* ǎ átá-otu*. Nang yeě mú o/bên kyije ńkyín, batwóp ǎ ké dyibíng ńdyí ba/fé ekpang chwóó.

⁸ Ké bubwô ámbu, wo kye kyije ńkyí banet-Médya ne ḿbé Pésha, ńkyí kii*nwa eyángê* a-fé bubwô kyísí, ne ba/chi ba-chi nang yeě o-tî kánkyí.

⁹ Ne Otu Daráyas o-fé bubwô kyísí ké kyije ánkyi.

¹⁰ Ké nkéré Dányel o/ri o/fu, baa/fé bubwô kyísí ké kyije ńkyín, nyǐ o/dim dyijê. Bawíndu ba/mû ké nfût-kyise emen mú kyíbóng-enyóng, ḿbé ba/bírî kashú ḿbú Jerúsélem. Nyǐ o/tím arông kyísí ányi wǎ eringe nyǐ mu o-chi i kángkáng nkéré ké bawíndu ḿbé mbe fúú, o-fé nshwam kampén kachât ké dyicí o-kye Osówo.

¹¹ Ké nkéré banet-bushwôn-Dányel ba/ri ǎ mu o-fâ nshwam o-kyâ Osówo,

¹² mbé kángkáng ba/dim ba-kâm otu ba-da-bât Dányel byiraa. Mbé ba/raa ba/fu, átá-otu, wo a/fé bubwô kyísí ké kyije ńkyí wo a/kye a/fu, nang yeě mú o/bí Osówo nang orá nang onet nang orá chwǒm kyi-cibi ne wo oyén, ké ací bujam esim diǐkpú, ba-twóp ng ǎ ké dyibíng ńdyí ba/fé ekpang chwóó. Otu o-faa o/fu, âa, kyije ńkyí badaman ba-tî, kyije ńkyí banet ḿbé Médya ne ḿbé Pésha ńkyí kii*nwa eyángê*.

¹³ Ne mbé ba-raa ne otu kâng ba/fu, Dányel mú mu ké burwám-banet ḿbé ba/kúng kámbé wǎ básóng ké Júda o*fí o-kyâ ǒ wo ofê* o-chi nang eringe nyí kyije eyên kyi/sét*. Nyǐ mu o-fâ nshwam kángkáng nkéré kampén kachât ké dyicí.

¹⁴ Ké nkéré otu o/jwo ńkyín, dyityém emen dyi*da ǎ enyîn* ne o-kan kángkáng akwóp eringe nyǐ odanyii Dányel. Nyǐ o/kan tete dyikurúku dyi-fyi.

¹⁵ Banyinchéng ámbe kâng ba-bwa ba-kâm otu, ba-raa ne nyǐ ba/fu, wo amu a-nyît ng, ǎ átá-otu, a/fu, wǎ eringe byije ḿbyí banet ḿbé Médya ne Pésha byi/sét, kyije ńkyí otu o/kye kyi*fí ńkyí kyidanwa eyángê*.

¹⁶ Ne otu kâng o-kye busa o/fu, bakám Dányel, ba-twóp ǎ ké kafâ-dyibíng ńdyí ba/fé ekpang. O-raa ne Dányel o/fu, kyi/bát Osówo eyên mú amu a-fâ kanong kanong onyii ǒ.

¹⁷ Ba/cít buká ké ocím-dyibíng ándyi, ne otu o/tî ekap nyí emen ne nyí biǐtí-banet emen ké buká ámbu, eringe nyí onet nang obónge oo*man enyii Dányel*.

¹⁸ Ne otu o-fyi kâng ké kyibám-butu emen o-waa achi fúú, byiryíng o*da/ryí* o-kyú nang ne chwǒm ńkyí kyida ǎ ekye bunyîn-dyityém*.

¹⁹ Ké dyicófóróng pirípirí, otu o/bûu o-dim ochéé óchee ḿbú dyibíng ándyi.

²⁰ Ké nkéré o/ribi áku, nyǐ o/kó ne ofong ekédê o/fu, Dányel mú ḿgbán-Osówo mú okpó. Osówo mú wo amu a-fâ kanong kanong o/man ǒ enyii ké abwô nyí ekpang dí.

²¹ Dányel o-faa o/fu, kyi/bát átá-otu okpen ne banyá.

²² Osówo o/twóm orím emen mú onong o/fu, oba-cít ecím nyí ekpang eringe ee*némê mě*. Nyǐ o/chi ńkyín, ké nǎ, nyǐ mu o-nyît ng o/fu, me n*da/chi chwǒm* ne ké nǎ, me n*da ǒ echi kyibî* ǎ átá-otu*.

²³ Otu o/mû ké bunyîn-dyityém kanong kanong, ne o-kye busa o/fu, bafîm Dányel ké dyibíng. Ké bubwô ámbu, ba/fîm ǎ, ne ba/ri ba/fu, ekpang e*da ǎ enémê nang ké kyikit* ké nǎ, nyǐ o/tî dyityém ké Osówo.

²⁴ Otu kâng o-kye busa o/fu, bakám kángkáng banyinchéng ámbe ḿbé ba/bât Dányel byiraa. Ne ba/twóp kámbé cibicibi ne banyi ebe ne bwǎn ebe ké dyibíng ándyi ńdyí ba/fé ekpang. Ne mbé ba-kûribi ké kyikû-dyibíng ándyi, ekpang ányi e/cim kámbé ké byiko e-sé kámbé byikúú kángkáng.

²⁵ Ne Otu Daráyas o-sáng o-sét banet ḿbé kángkáng eshê ne byire ḿbyí ké ejíí o/fu, n/ta běn kyiraa.

²⁶ Me mu n-kyâ busa n/fu, nang yeě ké oshê ejí kángkáng mú o/já mě okûshî, ne okûfé Osówo mú Dányel. Osówo ámu nké mu Osówo mú mu ne dyikpen, ne nyǐ o-kyú u Otu mú ne banyá. Baa*bên butu emen ne banyá* ne busa emen boo*man ne banyá*.

²⁷ Nyǐ mu o-nyángê e, ne mu o-nyii ng banet. Nyǐ mu o-chi i byěm-akat ne biǐtí-akat ké bubóng ne esí. Nyǐ o/nyii Dányel o*da/bángê ekpang e-ju ǎ*.

²⁸ Dányel o/já byěm kanong kanong ké nkéré-butu ḿbú Otu Daráyas ne ḿbú Otu Sárus mú Pésha.