Dányel 5 - Bokyi Bible

Dyijî ńdyí Otu Besháza o/chi

¹ Dyicí dyibónge, wǎn-Otu Nébúkanéza mú odabángê Otu Besháza mú o/mû o/firi otu, o/kó égot-biǐtí-banet etánge ba-bâ kiǐtí-dyijî, ne ba/jwáp bato burwám.

² Ké nkéré mbé mbe ba-jwáp ng bato, Otu Besháza o/kye busa o/fu, babâ ne bammîk ne acáng nyí ba/chi ké gûl ne syílyíba ḿbyí bonchí emen o/kúng ké kiǐtí-kyise-kyifen-Osówo echi ké Jerúsélem. Otu o/twóm o/fu, babâ ne mbyí eringe nyǐ ne biǐtí-banet emen ne banyi emen ḿbé bakínkán ne ḿbé bwǎsíng badajwáp ké mbyí.

³ Ké abe ányi, ba/bê ne mbyí, ne mbé kángkáng ba-jwáp bato ké mbyí,

⁴ ne ba-kpee erím-bakye nyí ba/chi ké gûl ne syílyíba ne borôn ne áyon ne byichí ne aká.

⁵ Ké abe ányi, bubwô-onet bu-byí bu-kpet esáng byěm ké ekpe nyí kyibám-otu, nyí ba/kwa, ké kyicê ńkyí okwâ mú etyuryíkáng mu o-san n ké nyǐ o-shwôm. Ne otu o-ri bubwô ámbu ké mbu bu-sáng ng.

⁶ Kashú emen ka-bên, ne bushî bu-róng ǎ kanong kanong ḿbú bu/chi arông emen a-kpet banê esó.

⁷ Nyǐ o-nyán o/fu, onet okó banet-bambirirím ne bansô epé ba-bâ. Ké nkéré mbé ba/bê, otu o/raa ne mbé o/fu, nang yeě mú odaman ekó ńkyí ba/sáng něen o-sét mě kyikû emen, ba/chi ba-fé ǎ byídí-butu, o-fé kiǐré ké kyitông ńkyí ofê, ńkyí ba/chi ké gûl, ne o/chi o-kyú ké banet bachât ḿbé busa-butu emen.

⁸ Bankye bacê ḿbé otu ba-bâ, nké onet o*fí ké burwám ebe mú odaman ekó* o-sét nang otu eringe kyi/byí*.

⁹ Ké bafip emen, kashú emen ka-bwa ba-dâp ka-shwôm, ne biǐtí-banet emen ba*fí ba-nyît ng ńkyí badachi*.

¹⁰ Boné-otu o/jwo kyicoge ńkyí otu ne biǐtí-banet emen mbe ba-chi i, ne nyǐ kâng o-nung ké ócâm-dyijî. O-raa o/fu, kyi/bát átá-otu okpen ne banyá. Kamgbe, ofong o*da ǒ echîkédê* kashú ka-dâp ǒ*.

¹¹ Onyinchéng mu kô ké butu eyên mú busa ḿbú basun-[esówo] nyí enong mbu ǎ ké byiko. Ké nkéré bonchí eyên o/mû otu, onyinchéng mún o/tông bubong ne byinyídíng wǎ ḿbyí esówo. Ne ńchân o/chi ǎ otu mú bansô epé ne bambirirím.

¹² Nyǐ mu ne busa ḿbú bu/shwôm byiko, ne mu ne bubong ké barê esét eringe ba/byí, ne ké byěm ḿbyí byidalángê, ne ké byěm-akat esét eringe byi/byí. Ké bubwô ámbu, twóm ba-kó onyinchéng mún mú bada ǎ ekó Dányel, mú ńchân o/fé ǎ dyizîn ńdyí Betesháza, ne nyǐ o/chi o-sét eringe ńkyín kángkáng kyi/byí.

Dányel o/sét Kyikû-Byěm ḿbyí ba/sáng

¹³ Ba/bê ne Dányel ké bushú ḿbú otu ké abe ányi, ne otu o-raa ne nyǐ o/fu, wo a-chi i Dányel mú onet-Jûs mú ba/kúng ǎ wǎ ósóng, mú bonchí ejí o/kúng ǎ ké Júda o-bâ ne nyǐ?

¹⁴ Me nn/jwo ba/fu, busa ḿbú basun-[esówo] nyí enong mbu ǒ ké byiko, ne ba/fu, wo amu ne mpwô ne byinyídíng ne bubong.

¹⁵ Ba/mû ba/bê ne bankye bacê ne banet-bambirirím ba/fu, bakó byěm ḿbyí ba/sáng něen ba-sét mě kyikû emen, nké mbé ba*da/man enyît kyikû emen*.

¹⁶ Me n/jwo ba/fu, wo a-man n eri kyikû-byěm ḿbyí ba/rôo, ne a-man n esét kyikû ńkyí byěm-akat. Â wo a-man n ekó byěm ḿbyí ba/sáng něen, a-sét mě kyikû emen, ba/chi ba-fé ǒ byídí-butu, a-fé kiǐré ké kyitông ńkyí ofê, ńkyí ba/chi ké gûl, ne wo a/chi a-kyú ké banet bachât ḿbé busa ḿbú butu ejí.

¹⁷ Dányel o-faa o/fu, tî eyáré ányi e-firi nyí eyên wo oyén, kakíri a-kúng kányí a-kye onet okíri. Me n/chi n-kó ńkyí ba/sáng n-sét ǒ, ǎ átá-otu, ne kyikû emen to.

¹⁸ Osówo mú o/rêe o-shwôm o/chi ńchân kiǐtí-otu, ne o/kye ǎ ofê ne busa.

¹⁹ Nyǐ o/mû kiǐtí kanong kanong ńkyí banet ḿbé eshê kángkáng ne byire kángkáng ba/mû ba-shî ng ǎ, ne ba/mû ba-tím m banê. Â nyǐ o/mû o-ryuu ng o/fu, nyǐ oju onet, nyǐ o-ju. Â nyǐ o/mû o-ryuu ng o/fu, nyǐ otî onet okpó, nyǐ o-tî. Nyǐ o/kye onet ofê mú nyǐ o/mû o-ryuu ng o/fu, nyǐ o-fâ ǎ, ne o/cábê onet mú nyǐ o/mû o-ryuu ng o/fu, nyǐ o-cábê ng.

²⁰ Nké ké bubwô ḿbú nyǐ o/kpet byiko etông ne dyityém erêe ne dyityém ebên, ba/fîm ǎ ké kakyúng-butu emen, ne kyikit-ofê emen kyi-tánê ǎ.

²¹ Ba/ró ǎ ké burwám-banet, ne dyityém emen dyi-firi wǎ ńdyí enyam. Nyǐ o/kyú ne enyam-dyikán ne o/ryí biǐbyâa wǎ mpong, ne o/rí kyíjí gbúúl, chwǒm ńkyí kyida ǎ eku kyibû kyi/mû kyi*fí ǎ*. Ké nkuli kyikû, nyǐ o/bángê o/fu, kángkáng batu mbe ké abwô nyí Osówo mú o/rêe o-shwôm, ne o-man n ekúng kámbé o-kye nang yeě mú o/nyîn ǎ.

²² Nké wo mú wǎn emen a*da/tî byiko eyên kyísí* nang ké wo amu a-nyît ng ńkyín kángkáng*.

²³ Wo a/chi byěm ḿbyí byi*da/nyîn Óburúkpâbí mú kyíbóng* ne wo a/bê ne bammîk ne acáng nyí ba/kúng ké kiǐtí-kyise-kyifen echi emen. Wo ne biǐtí-banet eyên ne banyi eyên ḿbé bakínkán ne ḿbé bwǎsíng ba/jwáp bato ké mbyí, ne ba/kpee erím-bakye nyí ba/chi ké gûl ne syílyíba ne borôn ne áyon ne byichí ne aká, nyí nyi erím-bakye nyí ee*man eri* e-jwo nang ojwo* ne ee*nyît nang chwǒm*. Nké wo a*da/kye Osówo ofê mú odasét o/fu, nang wo akpú* nang wo akpen* mú kángkáng byěm ḿbyí amu a-chi i mbyi ké bubwô emen.

²⁴ Nkyí nké kyi/chi ne Osówo o-twóm bubwô o/fu, busáng byiraa ḿbyín.

²⁵ Nyín něen ńkyí ba/mû ba/sáng, ba/fu, ocím-byěm ne ocím-byěm ne burô-byěm ne bukyii-byěm.

²⁶ Ne nkyí kyi/byí něen kyi/fu, ocím-byěm, ányi kyi/byí, Osówo oo/pan ocím-ací nyí butu eyên, ne oo/chi kámbú boo*kyú to*.

²⁷ Burô-byěm, ányi kyi/byí, baa/kan ǒ ké érúmá ba-ri ba/fu, wo amu fúú a-shwôm.

²⁸ Bukyii-byěm, ányi kyi/byí kyi/fu, butu eyên baa/kyii kámbú ba-kye banet ḿbé Médya ne ḿbé Pésha.

²⁹ Ké abe ányi, Otu Besháza o-kye busa o/fu, bafé Dányel ágbádá-butu, ne bafé ǎ kiǐré ké kyitông ńkyí ofê ekye, ńkyí ba/chi ké gûl. Ne o-chi ǎ o-firi ké banet bachât ḿbé busa-butu emen.

³⁰ Ké buchú ámbu, ba/ju Otu Besháza mú otu mú Bábyílon.

³¹ Ne Otu Daráyas mú o/fím Médya, mú o/mû oo/rí bajam-aje bachât esim-aje afee o-bam busa ḿbú butu o-koo.