Dányel 4 - Bokyi Bible

Nnyinyěng-Burê ḿbú Otu Nébúkanéza o/ri

¹ Otu Nébúkanéza o/twóm kyitwóm ba-sét kángkáng eshê ne byire ḿbyí ké ejíí o/fu, n/ta běn kyiraa.

² Fwôo n̂g atông ba-jwo kiǐshwô ejí kyi-kim ne byěm-akat ne biǐtí-akat ḿbyí Osówo mú o/rêe o-shwôm oo/tông mě.

³ Biǐtí-akat ḿbyí nyǐ mu o-chi i mbyi ne busa kanong kanong. Osówo o/chi o-kyú Otu ne banyá.

⁴ Me m/mû n-kyú u kanong kanong ké kyibám-butu ejí ne bunyîn-dyityém.

⁵ Nké me n/ri burê ḿbú mbu bu-chi i bushî, ne n/ri biinchi bushî-byěm ké nkéré mu n-rê ng.

⁶ Me n/kye busa n/fu, kángkáng bankye bacê ejí ké Bábyílon babâ eringe mbé bada mě esét kyikû ńkyí burê ámbu.

⁷ Ne ba/bê kâng ne kángkáng bansô epé ne banet-bambirirím. Me n/sét kámbé burê ejí, nké mbé ba*da mě eman esét kyikû emen*.

⁸ Ne Dányel kâng o-bâ. Ba-kó ng ǎ to Betesháza ké ofê mú dyizîn-osówo ejí. Busa ḿbú basun-[esówo] nyí enong mbu ǎ ké byiko. Ké bubwô ámbu, me n/sét ǎ ńkyí me n/ri ké burê. Me n/raa ne nyǐ n/fu,

⁹ Betesháza mú onet-dyishí-bansô epé ejí, me mu n-nyît ng n/fu, busa ḿbú basun-[esówo] nyí enong mbu ǒ ké byiko, ne wo amu a-nyît ng kángkáng byěm-akat. Nyín něen burê ḿbú n/ri. Sét mě kyikû emen.

¹⁰ Ké nkéré me mu n-rê ng, me n/ri kiimbâng-dyisín-kyichí ké otyém mú ké ejíí.

¹¹ Nkyi kyi-kán n kyi-rêe ng oréng kyi-câ kashú káshu tete kyi-ribi ké bubóng, ne nang yeě ké ejíí o-man n eri kánkyí.

¹² Eshǎan emen e/mû e-nwa ng bunong, ne kyi/mû ne byirim chwóó ḿbyí byidakwárê ejíí emúmú. Enyam e/mû e-jáng ng ké busi emen, ne bunurung bu/chi aju ké byire emen. Dyizong-onet nang dyirá ne enyam nang erá byi/ryí byirim-byichí ámbyi.

¹³ Ké nkéré mu n-kabe ng kyi-kim ne burê ḿbún, me n/ri orím mú onong ké o/fím kyíbóng mu o-bâ kyísí éné wǎ onet mú mu o-bám m byikit.

¹⁴ Nyǐ o/raa ne ejá kyíbóng kyíbóng o/fu, twom dyisín-kyichí ánkyi a-twóp kyísí a-nyere byire emen a-pwó. Wárê eshǎan emen a-pwó, a-pwó byirim emen byiryibyiryi. Ró enyam nyí nyi ké kyikû emen ne bunurung ḿbú mbu ké byire emen.

¹⁵ Nké mîng kyikû ńkyí ba/két kyi-waa ké ecing ne bamgbokobá ḿbé ba/chi ké áyon ne borôn ké nkyí kerékeré. Mîng kánkyí ányi ké dyikán ne biǐbyâa. Kántîk, mîng kyibû kyi-na kyikû-kyichí ńkyín ńkyí kyi/bwom wǎ onyinchéng, ne mîng kánkyí kyi-kûkyú ne enyam ne biǐbyâa.

¹⁶ Ké aje káchâtkányi, nyǐ oo*ba/chi o-kyú ne dyityém ńdyí onet*. Nké o/chi o-kyú ne dyityém ńdyí enyam.

¹⁷ Nyín něen ńkyí barím ḿbé banong ḿbé mbe ba-bám m byikit kángkáng nkéré ba/sét. Ké bubwô ámbu kâng, mîng kángkáng banet ké kángkáng byikit ba-nyît ba/fu, Osówo mú o/rêe o-shwôm mu ne busa ḿbú batu ké bubwô emen, ne nyǐ o-man n ekúng kámbé o-kye nang yeě mú kyi/nyîn ǎ, nang onet mú mu kyísí kyísí o-shwôm.

¹⁸ Otu Nébúkanéza o-raa o/fu, nyín burê ḿbú n/ri něen. Kántîk, ǎ Betesháza, sét mě kyikû emen. Onet-bacê ejí nang obónge o*fí mú mu o-man m mě esét*. Nké wo a-man n mě esét, ké nǎ, busa ḿbú basun-[esówo] nyí enong mbu ǒ ké byiko.

Dányel o/sét Kyikû-Burê ámbu

¹⁹ Ké nkéré Dányel o/jwo ńkyín, byiko ḿbyí byi/kaa ǎ byi/chi ǎ o*da/man efaa ojá*. Otu o-raa ne nyǐ o/fu, *damîng burê ne kyikû emen byi-kaa ǒ byiko*. Dányel o-faa o/fu, átá-otu, kyi/mû kyi/chi kyi-nyîn mě, â burê ḿbún ne eringe bu/byí bu/mû bu/kim ne banet-bushwôn eyên, *chí ne wo oyén*.

²⁰ Dyisín-kyichí ńkyí kyi/nárê éné kanong kanong kyi-ribi ké bubóng, nang yeě ké ejíí o-man n eri kánkyí.

²¹ Eshǎan emen e/mû e-nwa ng bunong, ne kyi/mû ne byirim chwóó ḿbyí byidakwárê ejíí emúmú. Enyam e/mû e-jáng ng ké kyikû emen, ne bunurung bu/chi aju ebe ké byire emen.

²² Átá-otu, wo a-chi i kyichí ánkyi ńkyí kyi/nárê ne kyi-shwane e. Wo aa/firi kiǐtí kanong kanong ńkyí wo aa/ribi ké bubóng ne busa eyên boo/paam bu-ribi ejíí emúmú.

²³ Ké nkéré wo a/mû a-tún n, orím mú onong o/fím kyíbóng o-bâ kyísí, ne o-raa o/fu, twom dyisín-kyichí ánkyi a-twóp kyísí a-ju kándyí, nké mîng kyikû ńkyí ba/két kyi-waa ké ecing. Bwá kánkyí ne bamgbokobá ḿbé ba/chi ké áyon ne borôn. Mîng kánkyí ányi ké dyikán ne biǐbyâa. Mîng kyibû kyi-na kyikû-kyichí ńkyín ńkyí kyi/bwom wǎ onyinchéng, ne mîng ǎ o-kûkyú ányi ne enyam ké aje káchâtkányi.

²⁴ Kyikû-burê ḿbún kâng nkyi něen, ǎ átá-otu, ne nyín něen ńkyí Osówo mú o/rêe o-shwôm oo/sét o/fu, kyi/chi kyi-chi ǒ.

²⁵ Ba/chi ba-ró ǒ ké burwám-banet ne a/chi a-kûkyú ne enyam-dyikán. Wo a/chi a-kûryí biǐbyâa wǎ mpong ké aje káchâtkányi, ne a-kû ng erí kyíjí gbúúl, kyibû kyi-kû ǒ ena. Ne wo a/chi a-bángê kâng a/fu, kángkáng batu-banet mbe ké bubwô ḿbú Osówo mú o/rêe o-shwôm, ne nyǐ o-man n ekúng kámbé o-kye onet mú o/nyîn ǎ.

²⁶ Barím ḿbé banong ba/kye busa ba/fu, bamîng kyikû-kyichí ńkyí ba/két kyi-waa ké ecing. Ńkyín kyi/byí kyi/fu, wo a/chi a-chîkyú otu ké nkéré wo aa/bángê a/fu, Osówo nké mu o-níbî ng ejíí emúmú.

²⁷ Ké bubwô ámbu kâng, ǎ átá-otu, jwo bacê ejí. [Mîng byibî echi. Kûchi byěm ḿbyí mbyi kanong, ne kûri banet-kyikpu bafip.] Ne wo a/chi a-já esang a-ca kashú.

²⁸ Ḿbyí kángkáng byi/chi Otu Nébúkanéza.

²⁹ Ké nkéré kyi/byí etukáku diǐkpú ne efee nké nke ńdyí nyǐ mu o-cen n o-bírî ng ké mbwôm mú kyibám-butu emen ké Bábyílon,

³⁰ nyǐ o/raa o/fu, kûri eringe nyí Bábyílon mu kiǐtí. Me m/bi kámú wǎ dyityém-oshê ejí n/fu, n-tông ng busa ne baryên ejí ne akpee ne butu ejí.

³¹ Ne nyǐ o-kûman ńkyí nyǐ mu o-raa ng, ejá e/fím kyíbóng e-raa e/fu, Otu Nébúkanéza, fwôo atông ké ńkyí mu n-sét ng. Baa/koo busa ḿbú butu eyên.

³² Ba/chi ba-ró ǒ ké burwám-banet ne a-kû ng ekyú ne enyam-dyikán a-kûryí biǐbyâa wǎ mpong ké aje káchâtkányi. Ne wo a/chi a-nyît kâng a/fu, kángkáng batu mbe ké abwô nyí Osówo mú o/rêe o-shwôm, ne nyǐ o-man n ekúng kámbé o-kye nang yeě mú kyi/nyîn ǎ.

³³ Byiraa ámbyi byi/chi ké ntûntû ké abeabe. Ba/ró Otu Nébúkanéza ké burwám-banet, ne o/ryí biǐbyâa wǎ mpong. Kyibû kyi-na ǎ ké byiko ne eji emen e-kán etangetang wǎ kyíchwan-otyítǎm, ne biinfwa emen byi-kán wǎ ḿbyí kanurung.

Otu Nébúkanéza o/kye Osówo Akpee

³⁴ Otu o/raa o/fu, ké nkéré aje ányi káchâtkányi aa/shwôm, me m/bírî achi kyíbóng n-tún bubóng, ne bubong ejí bu-bwa esim. Me m/kpee Osówo mú o/rêe o-shwôm ne n/kye ǎ nyǐ mú mu o-kpen n ne banyá ofê ne akpee. Nyǐ o-kyú u Otu ne banyá ne butu emen bu-waa ng kángkáng nkéré.

³⁵ Nyǐ mu o-tún n banet-ejíí wǎ ba*da/byí chwǒm*. Barím ḿbé banong kyíbóng ne banet-ejíí mbe ké bubwô emen. Onet o*fí mú odané okabe emen* o-bí nang ḿbím ké ńkyí nyǐ mu o-chi i*.

³⁶ Ké nkéré bubong ejí bu/bwa esim, ofê ejí ne butu ejí ne busa ḿbú butu ejí ba/bwa ne mbyí ba-kye mě. Banet-ashí-bǎmkpóngé ejí ne biǐtí-banet ba/koo mě kanong kanong, ne ba/bwa mě ne busa-butu ejí ḿbú bu/bwa bu-kyú ne ofê bu-shwôm nkéré mú ké esim.

³⁷ Ne kántîk, me Otu Nébúkanéza mu n-kyâ otu mú kyíbóng ofê ne akpee. Kángkáng byěm ḿbyí nyǐ mu o-chi i mbyi kanong ne byi/kwárê, ne o-man n ebwa nang ne yeě kyísí mú mu o-tông ng byiko.