Dányel 3 - Bokyi Bible

Otu Nébúkanéza o/kye Busa o/fu, nang yeě ofé Orím-Bukye

¹ Otu Nébúkanéza o/kye busa o/fu, bamee orím-bukye ké gûl wǎ onet. Ba/chi kámú bamyíta bujam esim káchâtkányi ké bunyâam, ne o/mû o/chi o-byí bamyíta bachât ké baryên. Ne o/fu, batî kámú ké otyém-kiidadedade-kyikit ńkyí Dúra ké kyikim-esí ńkyí Bábyílon.

² Otu o-kye busa kâng o/fu, kángkáng banet-bǎmkpóngé-okákárá emen wǎ bwǎn-batu ne batu-ashí ḿbé byikim-esí ne banet ḿbé ba/nye batu-ashí ḿbé byikim-esí abwô ké esim ne banrôo akpuga ne bampan banet bampan ne kángkáng banet-bǎmkpóngé-okákárá ḿbé áku, ḿbé byikim-esí, baman ba-ca njware mú orím-bukye mú ba/mee, mú Otu Nébúkanéza oo/tî.

³ Ké nkéré banet-ashí-bǎmkpóngé-okákárá baa/cibi ké njware, ba-bwom ké bushú-orím-bukye ámu,

⁴ onet-nje o-sét ne ejá kyíbóng kyíbóng o/fu, banet ḿbé ejíí kángkáng ké eshê ne byire,

⁵ ben ba/chi ba-jwo bantán ne ane ké kyikû nyí mbe ba-kim m ne byěm ḿbyí badakó óbo ne láya ne zíta ne hâp, ne byitógé ḿbyí áku byi/chi byi-nung ké kafâ. Â ane a-kpet ng a-bâ, tíngê ê kyísí ba-fé orím-bukye mú Otu Nébúkanéza oo/mee o-tî.

⁶ Nang yeě nké o*da/tíngê kyísí o-fé kámú* ba/chi ba-twóp ǎ ké abe ké abe ké ókâp-okwâ mú mu o-mang ng.

⁷ Ké bubwô ámbu, banet ḿbé ejíí emúmú ké eshê ne byire ba/tíngê kyísí ba-fé orím-bukye ámu, ńdyí ba-jwo ng ane nyí ké byitógé ámbyi ba-bâ.

Ba/fu, Bacín-Dányel Ashí Achât ba*fí ba-chi i ńkyí ba/fu, bachi*

⁸ Ké nkéré ámu kâng nké banet-Bábyílon bakíri ba/já mpât mú badakyé banet-Jûs byiraa.

⁹ Mbé ba/raa ne Otu Nébúkanéza ba/fu, kyi/bát otu okpen o-wu.

¹⁰ Wo a/kye busa, ǎ átá-otu, a/fu, â ane a-kpet ng a-bâ, nang yeě otíngê kyísí o-fé orím-bukye mú ba/mee ké gûl.

¹¹ Ne a/fu to, nang yeě mú o*da/tíngê kyísí o-fé kámú* ba-twóp ng ǎ ké ókâp-okwâ mú mu o-mang ng.

¹² Banet-Jûs bakíri ḿbé wo a/tî kámbé wǎ banet-ashí-kyikim-esí ńkyí Bábyílon, ḿbé mbe ba-bángê e Shádárak ne Méshak ne Abédenego, mbé ba*fí ba-chi i eringe wo a/sét*. Mbé ba*fí ba-fâ orím-bukye eyên* ba-tíngê nang kyísí ké bushú emen*.

¹³ Ké nkéré o/jwo kánkyí, ka/bírî ǎ kanong kanong, ne o-kye busa o/fu, babâ ne banyinchéng ámbe ashí achât ba-bwom ké bushú emen.

¹⁴ Nyǐ o/raa ne mbé o/fu, Shádárak ne Méshak ne Abédenego, nkyi ntûntû dí ńkyí ba/fu, ben bamu ba-né ng orím-bukye ejí efé? ne ben to bamu ba-né ng etíngê kyísí ké bushú emen?

¹⁵ Kántîk kâng, â ben ba-jwo ng ane nyí ké biintán ne byěm ḿbyí badakó óbo ne láya ne zíta ne hâp ne kángkáng byitógé ḿbyí áku ba-bâ, tíngê ê kyísí ba-fé orím-bukye ámu. Â ben ba*da/chi éné* ba/chi ba-twóp běn ké abe ké ókâp-okwâ mú mu o-mang ng. Ben bamu ba-kabe ng ba/fu, Osówo mu kô mú oda běn eman enyii dí.

¹⁶ Shádárak ne Méshak ne Abédenego ba-faa ba/fu, átá-otu, be bii*kan byi/fu, byi-nyii ng byiko eten be bayén*. [

¹⁷ Â Osówo mú be byimu byi-bángê e ǎ byitwóm o-man n bě enyii ké ókâp-okwâ mú mu o-mang ng ne ké abwô eyên, éné o/chi o-nyii bě.]

¹⁸ Nké nang oo*nyii bě* ǎ átá-otu* nyît a/fu, be bii*ba/chi byi-fé orím-bukye eyên* ne bii*tíngê kyísí ké bushú emen*.

Ba/két Mpan ba/fu, baju Bacín-Dányel Ashí Achât

¹⁹ Efong e-wâp kâng Otu Nébúkanéza, bushú emen bu-yángê ǎ ké kafâ esa ne Shádárak ne Méshaka ne Abédenego. Ne nyǐ o-kye busa kâng o/fu, bachi okwâ o-mang o-sóng kampén bujam o-shwôm eringe o/mû.

²⁰ Ne nyǐ o-nyán banyinchéng ḿbé mbe ne busa ba-shwôm ké basúja emen o/fu, babwá banyinchéng ámbe ashí achât ba-twóp ké ókâp-okwâ ámu.

²¹ Ne ba-bwá kámbé kâng ne bankyû ne ágbádá ne etam ḿbyí ba/nap byiko kerededet, ba-twóp kámbé ké kafâ.

²² Ké nǎ, otu oo/kye busa o/fu, bachi okwâ o-mang chwóó, bumang-okwâ ámbu bu/shí banet-mbâm ḿbé ba/kúng banyinchéng ámbe ba-fé ké mǔ.

²³ Banyinchéng ḿbén ashí achât, Shádárak ne Méshak ne Abédenego bwábwá, ba-róng ké otyém-bumang-okwâ.

²⁴ Ké abe ányi, Otu Nébúkanéza o-bûu ne ocím ké dyishí fúú. O-bí banet-ashí-bǎmkpóngé-okákárá emen o/fu, be byi*da/bwá banyinchéng ámbe ashí achât byi-twóp ké ókâp-okwâ ámu*? Mbé ba-faa ba/fu, átá-otu, nkyi ntûntû. Be byi/bwá.

²⁵ Nyǐ o-bí o/fu, ebóng kyi/chi kâng ńkyí me mu n-ri ng banyinchéng ashí anyii ké mbe ba-cen n ba-wáp ng ké kafâ-okwâ. Ba*da/bwá kámbé erí* ne mbé ba*fí ba-tông ng ekap nyí okwâ o/shí kámbé*. Onyinchéng mú ké banet banyii mu o-rángê e wǎ [orím mú Osówo.]

Ba/zú Banyinchéng ámbe Ashí Achât Abwô

²⁶ Otu Nébúkanéza o-dim kâng o-da-bwom ké dyifyi ńdyí ókâp-okwâ ámu, o-wonge o-kó Shádárak ne Méshak ne Abédenego o/fu, bǎmgbán-Osówo mú o/rêe o-shwôm, bâ n̂g kyíjí. Mbé ba/byí ké abe ányi kyíjí.

²⁷ Kángkáng bwǎn-batu ne batu-ashí ḿbé byikim-esí ne banet ḿbé ba/nye batu-ashí ḿbé byikim-esí abwô ké esim ne banet-ashí-bǎmkpóngé-okákárá bakíri ḿbé otu ba/zû kyikit kyibónge ba/fu, mbé ba-ri ng ḿbé banyinchéng ámbe ashí achât, ḿbé okwâ o*da/némê kámbé*. Eji ne byídí ebe byi*da/shí* ne mbé ba/mû ba*fí ba-nung ng nang arúkwâ*.

²⁸ Otu o-raa o/fu, kye n̂g Osówo mú Shádárak ne Méshak ne Abédenego akpee. Nyǐ o/twóm orím emen mú onong o-ba-nyii banyinchéng ḿbén ḿbé mbe ba-bángê e ǎ byitwóm, ne ba/tî dyityém ne nyǐ. Mbé ba/né echi ńkyí me n/kye busa, ne ba/bángê akpen ebe busông ekye â nkyi ńkyí mbé badatíngê kyísí ba-fé osówo okíri kyi-cibi ne mú ebe.

²⁹ Ne me mu n-kyâ busa kántîk n/fu, nang yeě ké oshê nang orá ne nang kyire kyirá mú o/chîraa byiraa-ecábé ne Osówo mú Shádárak ne Méshak ne Abédenego, ba-jâa ng onet ámu ké byirî ké byirî, ne ba-chi i kyise emen kyi-firi biǐbwô-byise. Osówo okíri o*fí mú odanyii eringe ńnyín*.

³⁰ Ne otu o-kye Shádárak ne Méshak ne Abédenego kyikit-bǎmkpóngé ńkyí kyi/rêe kyi-shwôm, ké kyikim-esí ńkyí Bábyílon.