Dányel 2 - Bokyi Bible

Burê ḿbú Otu Nébúkanéza o/ri

¹ Otu Nébúkanéza o/ri burê ké nnyinyěng-dyije ńdyí nyǐ o/ryí butu. Burê ámbu bu/kye ǎ afaníkong kanong kanong nyí kyi/chi ǎ o*da/chîman erê*.

² Ké bubwô ámbu, nyǐ o/twóm ba-kó bansô epé emen ne banet-bambirirím emen kángkáng o/fu, babâ ba-ba-sét ǎ eringe nyí burê ámbu bu/byí. Ké nkéré mbé ba/bê, ba-ba-bwom otu ké bushú,

³ otu o/sét kámbé o/fu, ofong mu o-két ng mě ké burê ḿbú n/ri. Me mu n-ryuu ng n/fu, nnyît kyikû emen.

⁴ Mbé ba-faa ǎ ké ejá-Aramîk ba/fu, kyi/bát otu okpen o-wu. Sét bě burê eyên, ne be byi/chi byi-sét eringe bu/byí.

⁵ Otu o-sét kámbé o/fu, me mm/bángê ké dyityém ejí n/fu, ben ba-man ba-sét mě burê ámbu ne eringe kyikû emen kyi/byí. Â ben baa*man esét* me n/chi n-jâa běn ké byirî ké byirî n-chi byise enen byi-bírî biǐbwô-byise.

⁶ Nké â ba/man mě esét burê ámbu ne eringe nyí bu/byí, me n/chi n-kye běn eyáré ne ofê mú o/rêe o-shwôm. Kántîk kâng, sét n̂g mě burê ámbu ne kyikû emen.

⁷ Mbé ba-chîfaa otu ba/fu, â a/sét bě, ǎ átá-otu, eringe nyí burê ámbu bu/mû, be byi/chi byi-sét ǒ kyikû emen.

⁸ Ké nkéré otu o/jwo, nyǐ o/faa o/fu, wǎ eringe nyí n/kabe. Ben bamu ba-kan n eringe badachîjá nkéré, ké nǎ, ben ba/ri ba/fu, me mm/bángê ké dyityém ejí

⁹ n/fu, n-kyâ běn kángkáng dyizong-busông bubónge â ba*da mě esét burê ámbu*. Ben baa/bángê ne barî ba/fu, ben ba-chî ng mě esét byisédéng ba-ca kashú, ké nǎ, ben bamu ba-kabe ng ba/fu, byěm byi/chi byi-yángê ké nkéré mú mu o-bâ ké kashú. Sét n̂g mě burê ámbu, ne me n/chi n-nyît n/fu, ben ba-man n mě esét kyikû emen.

¹⁰ Bankye bacê ba-faa ba/fu, onet o*fí ké ejíí emúmú mú oda ǒ eman esét* ǎ átá-otu* ńkyí wo amu a-ryuu ng a/fu, a-nyît ng*. Otu o*fí nang obónge* nang mú o/rêe o-shwôm* nang mú mu ne busa o-shwôm* mú oo/bí bansô epé emen ne banet-bambirirím emen kángkáng dyizong-chwǒm ándyi*.

¹¹ Ńkyí wo amu a-bí ng nkyi kyi-sóng ng kyi-shwôm ńkyí onet oo*man echi kánkyí* kyi-cibi ne erím-bakye* nyí e*fí e-kyú u ne banet*.

¹² Ké nkéré otu o/jwo ńkyín, kafâ ka/bírî ǎ kanong kanong, ne o-kye busa o/fu, baju kángkáng bankye bacê ḿbé emen ké Bábyílon.

¹³ Ké bubwô ámbu, ba/kye busa ámbu ba/fu, baju kámbé kángkáng cibicibi ne Dányel ne bacín emen.

Osówo o/tông Dányel Kyikû ńkyí Burê ámbu

¹⁴ Dányel kâng o-dim o-kâm Áryak mú onet-dyishí-banet ḿbé mbe ba-bám m otu, mú ba/kye ǎ busa o/fu, oju banet ámbe. Dányel ne ejá nyí enong enong

¹⁵ o-bí Áryak chwǒm ńkyí kyi/chi ne otu o-kye dyizong-kyibî-busa ámbu. Áryak o-sét Dányel kâng ńkyí kyi/chi.

¹⁶ Dányel o-dim ochéé óchee o-da-koo busa o/fu, bachî ǎ ekye nkéré eringe nyí nyǐ odaman esét otu kyikû-burê ámbu.

¹⁷ Dányel kâng o-dim dyijê o-da-sét Hanánya ne Myíshal ne Azaryâ ḿbé mbe bacín emen ńkyí kyi/chi.

¹⁸ Nyǐ o-sét kámbé o/fu, mbé bafé nshwam ba-kye Osówo mú kyíbóng o-ri kámbé bafip. Ba-bí ǎ to o-sét kámbé kyikû-akat ányi eringe nyí baa*ju kámbé ne bankye bacê ḿbé áku ḿbé Bábyílon ké kyikû*.

¹⁹ Ké buchú ámbu bubónge kâng, Osówo o/sét Dányel kyikû-akat ányi ké burê, ne nyǐ o/kpee Osówo mú kyíbóng o/fu,

²⁰ Osówo mu ne bubong ne busa. Kye n̂g ǎ akpee ne banyá ne banyá.

²¹ Nkéré mu ké bubwô emen. Nyǐ o-kúng ng batu ne o-fîm m batu. Nyǐ nké mu o-kyâ byinyídíng ne bubong.

²² Nyǐ mu o-tông ng wááng byěm ḿbyí ké kafâ ké kafâ ne ké kadip. Nyǐ mu o-nyît ng ńkyí ba/rôo ké kyifip, ne kiinwángé kyi/wâng ǎ nyǐ oyén.

²³ Osówo mú banchí ejí ḿbé kpákpá, me mu n-kyâ ǒ akpee ne ofê. Wo aa/kye mě bubong ne busa. Wo aa/faa nshwam ejí ne aa/tông bě ńkyí byidasét otu.

Dányel o/sét Otu Burê ámbu ne Kyikû Emen

²⁴ Dányel o-dim kâng o-kâm Áryak. O-sét ǎ o/fu, *daju kámbé*. Kúng mě byi-dim kyikit-otu, ne me n/chi n-sét ǎ kyikû-burê emen.

²⁵ Ké abe ányi, Áryak o/kúng Dányel o-ca ne nyǐ ké bushú-Otu Nébúkanéza, o-sét otu o/fu, me nn/ri onet-Jûs obónge mú ké burwám-banet-Jûs ḿbé ba/kúng kámbé wǎ básóng, mú oda ǒ eman esét, ǎ átá-otu, kyikû-burê eyên.

²⁶ Otu o-raa ne Dányel, o/fu, wo a-man n mě esét burê ḿbú n/ri ne kyikû emen dí.

²⁷ Dányel o-faa o/fu, átá-otu, onet o*fí* nang onet-bambirirím* nang nsô epé* o*fí mú oda ǒ eman esét ńkyí ánkyi*.

²⁸ Nké Osówo mu kyíbóng mú mu o-tông ng byěm-akat wááng, nyǐ oo/sét átá-otu ńkyí kyi/chi kyi-chi ké nkéré mú mu o-bâ ké kashú. Kántîk, me n/chi n-sét ǒ burê ámbu ḿbú a/ri ké nkéré amu a-rê ng.

²⁹ Ké nkéré a/mû a-rê ng, ǎ átá-otu, wo a/ri burê kyi-kim ne nkéré mú mu o-bâ ké kashú, ne Osówo mú mu o-tông ng byěm-akat wááng o/tông ǒ ńkyí kyi/chi kyi-chi.

³⁰ Kántîk, Osówo o/tông mě akat ńnyín wááng *chí wǎ me mu ne bubong n-shwôm nang yeě* nké eringe nyí wo, ǎ átá-otu, adakwâa kyikû-burê eyên a-nyît ekabe nyí e/bê e-kâm ǒ.

³¹ Ké burê eyên, ǎ átá-otu, wo a/ri kiǐnât-chwǒm wǎ onet ńkyí ba/mee oméng ké kyi/bwom ǒ ké bushú. Nkyí kyi/mû kyi-san n ragerage ne kyi/mû kyi-chi i bushî etún.

³² Ba/chi dyishí emen ké gûl mú onong onong ne kakim ne abwô emen ba/chi ké syílyíba, ne ba/chi osín ne byikpút ké borôn.

³³ Ba/chi byiká emen ké biǐré, ne ba/chi abe-byiká emen kyicê ké biǐré kyicê ké bumee.

³⁴ Ké nkéré amu a-tún n kánkyí, kiimbâng-buká kyi/zûu kyíbóng-kiǐmbém, onet o*fí mú o/ta kámbú* bu-róng ké abe-byiká-biǐré ne bumee-chwǒm ánkyi ńkyí ba/mee wǎ onet kyi-sé kámbyí.

³⁵ Ké abe ányi, biǐré ne bumee ne borôn ne syílyíba ne gûl byi-sêe byi-firi wǎ édúkǎndú nyí nyi ké kyikit ńkyí mbe ba-cím m esang-byichí ne burwom. Afú a/yip kámbyí kángkáng nang onyin o*da/waa*. Nké buká ámbu bu/kán bu-firi kaku ńké ka/cít ejíí emúmú.

³⁶ Éné nké burê ámbu bu/mû. Kántîk, ǎ átá-otu, me n/chi n-sét ǒ kyikû emen.

³⁷ Átá-otu, wo amu otu mú o/rêe o-shwôm kángkáng batu. Osówo mú kyíbóng oo/kúng ǒ butu, ne oo/kye ǒ busa ne ofê ne oo/chi ǒ a-firi kiǐtí.

³⁸ Nyǐ oo/kúng ǒ butu ḿbú kángkáng byěm ḿbyí ké ejíí ne onet-dyishí mú kángkáng enyam ne bunurung. Ké burê ḿbú a/ri, wo a-chi i dyishí ńdyí ba/chi ké gûl.

³⁹ Ké nkéré wo a*fí to* batu ba-chî ng ekyú. Batu ámbe baa*kyú biǐtí wǎ ḿbú eyên*. Ne â ḿbé ányi ba/shwôm, nnyinyěng o-ribi mú ba/chi ké borôn, mú o/chi o-kyú onet-dyishí mú ejíí emúmú.

⁴⁰ Ké kanyii, batu ba/chi ba-kyú, ḿbé mbe ba-shwane e wǎ biǐré ḿbyí mbyi byi-sé ng kángkáng byěm. Wǎ eringe nyí biǐré mbyi byi-sé ng kángkáng byěm, mbé to ba/chi ba-pap ba-shiryi kángkáng bambwôp kashú-batu.

⁴¹ Wo a/ri to ké ba/chi kyicê-abe-byiká ne efwa-byiká ké bumee, kyicê ké biǐré. Ńkyín kyi/byí kyi/fu, batu ḿbén ba/chi ba-kyii ké byikim. Mbé ba/chi ba-kyú ne chwǒm ńkyí nkyi ne busa ḿbú kiǐré, ké nǎ, ba/chwáp biǐré ne bumee.

⁴² Efwa-byiká nyí ba/chi kyicê ké biǐré, kyicê ké bumee, kyi/byí kyi/fu, kyicê-batu ba/chi ba-kyú ne busa, ne kyicê ba/chi ba-kyú kyeekyee.

⁴³ Wo a/ri to a/fu, ba/chwáp biǐré ne bumee. Ńkyín kyi/byí kyi/fu, batu ámbe ba/chi ba-kan ba/fu, mbé ba-cibi ng byikû ebe ké barî ebé. Nké mbé baa*ba/chi ba-man ecibi* wǎ eringe nyí biǐré bii*man ecibi ne bumee*.

⁴⁴ Ké nkéré mú batu ámbe, Osówo mú kyíbóng o/chi o-tî butu ḿbú boo*man ne banyá*. Baa*kpógê kámbú ne banyá* nké mbú bu/chi bu-man ne batu ámbe kángkáng ne bu-waa ne banyá.

⁴⁵ Wo a/ri ké buká bu/zûu kyíbóng-kiǐmbém, onet o*da/ta kámbú* ne eringe nyí bu/róng ké chwǒm ánkyi ńkyí ba/mee wǎ onet, ńkyí ba/chi ké biǐré ne bumee ne borôn ne syílyíba ne gûl. Osówo mú o/rêe o-shwôm mu o-sét ng ǒ, ǎ átá-otu, ńkyí kyi/chi kyi-chi ké nkéré mú mu o-bâ ké kashú. Me nn/sét ǒ kerededet ńkyí a/ri ké burê ne me nn/sét kyikû emen ntûntû.

Otu o/kye Dányel Eyáré

⁴⁶ Ne Otu Nébúkanéza kâng o-tím arông kyísí o-kye busa o/fu, bachi byifen ne eyáré ba-kye Dányel.

⁴⁷ Otu o-raa o/fu, Osówo mú eyên o/rêe o-shwôm kángkáng esówo, ne mu otu mú batu ne mú odatông byěm-akat wááng. Me mu n-nyît ng ńkyín, ké nǎ, wo aa/man mě esét kyikû-akat ńnyín.

⁴⁸ Ne nyǐ kâng o-kye Dányel kiǐtí-kyikit-bǎmkpóngé, o-yárê ǎ eyáré chwóó nyí enong enong, o-kúng kyikim-esí ńkyí Bábyílon kyi-firi ké bubwô emen, o-chi ǎ onet-dyishí mú kángkáng bankye bacê emen.

⁴⁹ Ké ochwâp mú Dányel o/bí, otu o/kúng byiraa ḿbyí byi/kim kyikim-esí ńkyí Bábyílon byi-firi ké abwô nyí Shádárak ne Méshak ne Abédenego. Nké Dányel o/waa ké kyibám-otu.