Dányel 11 - Bokyi Bible

¹ Nyǐ ba/tî [ǎ] ba/fu, ochwáp mě o-ku mě.

² Ne ńkyí mu m-bâ ǒ esét kántîk nkyi ntûntû. Orím ámu o-raa o/fu, batu ba/chi ba-chîkyú bachât ké Pésha, ne otu okíri mú o/chi o-já esang o-shwôm batu ḿbé áku kángkáng o/chi o-nye. Ké nkéré oo/já busa ne esang kanong kanong, nyǐ o/chi o-kyé oshê mú Girîs byiraa.

Eshê nyí Éjip ne Syírya

³ Ne okân-otu kâng o/chi o-já busa. Nyǐ o/chi o-kyú otu mú o/jang erêe, ne o-chi i nang ebóng ńkyí mu o-ryuu ng.

⁴ Nké ké nkéré oo/firi kiǐtí-otu, oshê emen o/chi o-róng ba-kyii kámú byikit byinyii. Batu ḿbé ba*da/fím kyikû emen* ba/chi ba-kyú batu ké kyikit emen. Nké mbé baa*ba/chi ba-kyú ne busa wǎ nyǐ*.

⁵ Otu mú Éjip o/chi o-kyú ne busa. Nké otu-dyishí-bannwa byití emen obónge o/chi o-kyú ne busa o-shwôm ǎ ne o/chi o-kyú otu mú oshê mú kiǐtí o-shwôm.

⁶ Ké nkéré aje aa/shwôm, otu mú Éjip o/chi o-chi kyikwáré ne otu mú Syírya, ne o/chi o-kye ǎ wǎn emen mú onyinyi o-bé. Nké kyikwáré ánkyi kii*ba/chi kyi-rí* ne wǎn-onyinyi ámu ne otyép emen ne [wǎn emen] ne bǎmgbán ḿbé ba/ce ne nyǐ ba-ju ng kámbé kángkáng.

⁷ Ké kaǎnyín-nkéré, wǎn-boné-wǎn-onyinyi ámu obónge o/chi o-firi otu. Nyǐ o/chi o-nwa ne bannwa byití ḿbé otu mú Syírya o-nung ké kyise ńkyí badabwom ne ba-nwa byití ebe o-kpógê kámbé.

⁸ Nyǐ o/chi o-kúng erím-bakye ebe o-jâ ne nyǐ Éjip cibicibi ne byěm-ociring ḿbyí ba/chi ké gûl ne syílyíba. Ké nkéré aje nyí bunyîn-dyityém chwóó aa/shwôm,

⁹ otu mú Syírya o/chi o-nwa o/fu, nyǐ o-koo ng Éjip, nké ba/chi ba-chi ǎ o-bwa esim ésim.

¹⁰ Bwǎn ḿbé otu mú Syírya ḿbé banyinchéng ba/chi ba-kpá byiko-byití ne ba/chi ba-já bannwa byití chwóó. Onet obónge ké burwám ebe o/chi o-rim kámbé ne bunwa wǎ kiǐsúsú-kace ne o-kye bunwa ké kyise ńkyí badabwom ne ba-nwa byití ńkyí banet-bushwôn emen.

¹¹ Otu mú Éjip o/chi o-dim byití enwa ké kafâ esa ne otu mú Syírya ne o/chi o-bam bujê-bannwa byití ḿbé otu mú Syírya o-koo.

¹² Nyǐ o/chi o-tông byiko ké okpóge mú o/kpógê ne ké basúja ḿbé nyǐ o/ju chwóó. Nké nyǐ oo*ba/chi o-chîkpógê o-ca kashú*.

¹³ Otu mú Syírya o/chi o-bwa esim o-da-cibi bannwa byití chwóó ba-shwôm ḿbé kashú. Ké nkéré ochíchí-nkéré oo/fyi, nyǐ o/chi o-bwa esim ne bannwa byití chwóó ḿbé mbe ne byiyám ḿbyí byinong.

¹⁴ Ne banet chwóó ba/chi ba-bírî bunwa ne otu mú Éjip. Ne bakân-banet bakíri ḿbé ba/fím oshê eyên, ǎ Dányel, ba/chi ba-bírî bunwa ké bubwô ḿbú chwǒm-akat ńkyí mbé baa/ri. Nké ba/chi ba-kpógê kámbé.

¹⁵ Ké bubwô ámbu, otu mú Syírya o/chi o-nwa ne oshê mú ba/ku kámú o-bam kámú o-koo. Basúja ḿbé Éjip baa*ba/chi ba-chînwa ba-ca kashú* nang ḿbé badaman enwa kanong kanong baa*kyú ne busa chwóó*.

¹⁶ Onet-Syírya mú mu o-nwa ng ne mbé o/chi o-chi kámbé ńkyí kyi/nyîn ǎ, okân ké dyishí oo*chi*. Nyǐ o/chi o-bwom ké esí nyí Osówo o/kye banet-Ézerel ne e/chi e-firi ké bubwô emen kángkáng.

¹⁷ Otu mú Syírya o/chi o-nam bunwa edim ne basúja emen kángkáng. Ne ké eringe nyí nyǐ o/chi o-bên oshê mú onet-bushwôn emen, nyǐ o/chi o-chi kyikwáré ne nyǐ o-kye ǎ [wǎn emen mú onyinyi] ké dyibé. Nké okabe emen oo*byí ǎ dyishí*.

¹⁸ Ké nkéré ńkyín kii/shwôm, nyǐ o/chi o-nwa ne eshê nyí nyi ké bukô-baya ḿbé Medeterényan ne o-kpógê bujê chwóó. Nké onet-dyishí mú mu ocinónet o/chi o-kpógê ǎ o-chi byiko emen etông byi-man. Ké ntûntû, nyǐ o/chi o-chi [byiko etông ḿbyí otu mú Syírya byi-bwa esim byi-ju ǎ nyǐ oyén.]

¹⁹ Otu ámu o/chi o-bwa esim ké byise ḿbyí badabwom ne ba-nwa byití, ḿbyí oshê emen. Nké ba/chi ba-kpógê ǎ, ba-ju ǎ.

²⁰ Otu okíri o/chi o-nye ǎ ké kyikû mú o/chi o-twóm onet-dyishí-bǎmkpóngé-okákárá o-da-cít banet ké akpuga-dyishí eringe odachi esang nyí oshê emen e-jê. Ké kaǎnyín-nkéré, ba/chi ba-ju otu ámu. Nké baa*ju ǎ wááng* nang ké byití*.

Kyibî-Otu mú Syírya

²¹ Orím mú onong ámu o-sét kyikû o-ca kashú o/fu, nnyinyěng-otu mú Syírya o/chi o-kyú kyibî-onet mú o*fí ne mpât mú odakyú otu*. Nké nyǐ o/chi o-byí kiǐmút o-koo busa ké kyibî-bukwóp.

²² Ba/chi ba-ju nang yeě, nang otu-nchi kyifen mú Osówo mú o*fí o-bángê e ne nyǐ*.

²³ Nyǐ o/chi o-nîm eshê nyí áku ké kyikwáré echi. Ne nyǐ o/chi o-shwane, o-shwane o-shwôm, nang ké nyǐ mu otu mú oshê mú o*da/rêe*.

²⁴ Nyǐ o/chi o-kye oshê mú mu ne esang bunwa oo*chi kámú o-nyît* ne nyǐ o/chi o-chi byěm ḿbyí banchí emen ḿbé kpákpá ba*da/chi*. Ne nyǐ kâng o/chi o-kyii bǎmgbán emen byěm ḿbyí nyǐ o/bam o-koo ké byití. Nyǐ o/chi o-kyé akwóp nyí nyǐ odanwa ne byise ḿbyí badabwom ne ba-nwa byití, nké nkéré emen oo*bwon ne o-man*.

²⁵ Nyǐ o/chi o-cíp dyityém o-koo bannwa byití chwóó ḿbé odanwa ne otu mú Éjip, mú o/chi o-kpá byiko to ne bannwa byití emen chwóó ḿbé mbe ne busa ḿbú odanwa. Nké ba/chi ba-nîm otu mú Éjip ne oo*ba/chi o-kpógê*.

²⁶ Banet-bacê emen ḿbé dyityém ba/chi ba-bên ǎ. Ba/chi ba-ju basúja emen chwóó ne ba/chi ba-man ne basúja emen kángkáng.

²⁷ Batu ámbe kâng bafee ba/chi ba-kyú ba-ryí byiryíng ké ókpákpúrúk obónge. Nké ekabe ebe e/chi e-kyú byibî-ekabe, ne ba-sét ng barî byisédéng. Mbé baa*ba/chi ba-já ńkyí mbé mbe ba-ryuu ng* ké nǎ, nkéré mú mbé badajá kánkyí o*da/fyi ne*.

²⁸ Otu mú Syírya o/chi o-já byise ne kángkáng byěm emen ḿbyí nyǐ o/bam o-koo, ne o/chi o-tigi ékwâbashi nyí banet-Osówo ebên. Nyǐ o/chi o-chi eringe nyí kyi/nyîn ǎ ne o-jâ ké oshê emen.

²⁹ Ké nkéré mú nkéré ámu oo/fyi, nyǐ o/chi o-chînwa ne Éjip. Nké ntáng mún, byěm byi/chi byi-yángê.

³⁰ Banet-Rûm ba/chi ba-bâ ké bǎnsukyíkang ba-bwom bunwa ne nyǐ, ne bushî bu/chi bu-róng ǎ. Ne nyǐ o/chi o-pín esim ké kafâ esa o-kan o/fu, nyǐ o-bên n ékwâbashi nyí banet-Osówo. Nyǐ o/chi o-jwo bacê ḿbé banet ḿbé baa/né ékwâbashi ányi.

³¹ Basúja emen bakíri ba/chi ba-bên kiǐtí-kyise-kyifen-Osówo echi ké byibî-byěm echi ké nkyí. Mbé ba/chi ba-chi banet ba-mîng byifen echi ḿbyí kángkáng dyicí, ne ba/chi ba-tî kiinchi bushî-chwǒm-ociring ányi.

³² Otu o/chi o-kúng kaǎnínǐm o-chi banet ḿbé baa/mîng ékwâbashi ebe ba-bángê ne nyǐ. Nké banet ḿbé ba/bángê ne Osówo ba/chi ba-bwom bunwa.

³³ Banet-ashí ebe ḿbé mbe ne bubong ba/chi ba-kyii bubong ebe ne banet bakíri chwóó. Nké ké kaǎkím-nkéré, ba/chi ba-ju kyicê-banet ké byití, bakíri ba-shí kámbé ké okwâ ne bakíri ba-bam kámbé byěm ba-koo ba-fé kámbé ké mgbokobá.

³⁴ Ké nkéré mbe ba-ju ng banet ba-câ kashú, banet-Osówo ba/chi ba-koo onyin-ochwâp, nang banet chwóó ḿbé mbe ne mbé ké kyikû ba/chi ba-chi éné ké mpún mú ebe mbé bayén.

³⁵ Ba/chi ba-ju kyicê-banet-bubong ámbe. Nké ké bubwô ámbu, banet ba/chi ba-firi kpárám ké bushú ḿbú Osówo. Ńkyín kyi/chi kyi-ca kashú tete nkuli kyikû-nkéré mú Osówo oo/tî o-fyi.

³⁶ Otu mú Syírya o/chi o-chi eringe kyi/nyîn ǎ. Nyǐ o/chi o-tyem bubwô ké kakim o/fu, nyǐ mu kiǐtí o-shwôm nang Osówo orá, o-fu, nyǐ o/shwôm nang Osówo mú o/rêe o-shwôm. Nyǐ o/chi o-man echi ńkyín tete nkéré mú Osówo o/chi o-kye ǎ busông. Osówo o/chi o-chi kerededet ńkyí nyǐ o/nam.

³⁷ Otu o/chi o-né Osówo mú banchí emen ḿbé kpákpá ba/fé, ne Osówo to mú mu o-jê ng banyinyi. Ké ntûntû, nyǐ o/chi o-né kángkáng esówo, ké nǎ, nyǐ o/chi o-kabe o/fu, nyǐ mu kiǐtí o-shwôm esówo kángkáng.

³⁸ Nyǐ o/chi o-bwa o-fé Osówo mú mu o-ku ng byise ḿbyí badabwon ne ba-nwa byití. Nyǐ o/chi o-kúng gûl ne syílyíba ne byibwáng ne byěm-eyáré byikíri ḿbyí byidashwane kasî o-yárê osówo mú banchí emen ḿbé kpákpá ba*da/fé*.

³⁹ Nyǐ o/chi o-kúng banet ḿbé mbe ba-fâ osówo mú bacinbánet ba-ku byise emen ḿbyí badabwom ne ba-nwa byití. Nyǐ o/chi o-kye banet ḿbé mbe ba-koo ng ǎ wǎ otu kiǐtí-ofê, o-tî kámbé ké byikit-bǎmkpóngé-okákárá ḿbyí nyáám, o-kye kámbé esí wǎ eyáré.

⁴⁰ Ké nkéré nkuli kyikû-nkéré mú otu mú Syírya oo/fyi, otu mú Éjip o/chi o-nwa ne nyǐ, ne otu mú Syírya o-bwom m bunwa ne busa emen kángkáng ké bamútu ḿbé bubyî-orá budatut ne bubyî-orá ne bǎnsukyíkang chwóó. Nyǐ o/chi o-koo eshê chwóó wǎ kiǐsúsú-kace.

⁴¹ Nyǐ o/chi o-koo nang esí nyí Osówo o/kye banet emen, o-ju égot-banet. Nké eshê nyí Édom ne Mówep ne kyicê-Ámon ńkyí kyi/waa e/chi e-fem.

⁴² Ké nkéré oo/koo eshê ányi kángkáng, nang oshê-Éjip oo*fem*.

⁴³ Nyǐ o/chi o-yip esang nyí Éjip nyí gûl ne syílyíba ne byěm byikíri ḿbyí byidashwane kasî. Ne o/chi o-kpógê Lyíbya ne Sudân.

⁴⁴ Ne bǎmpém ḿbé badafím ké kyicê ńkyí óbyísû mu o-byí i ne kyicê ńkyí bushûyû ba/chi ba-fé ǎ bushî, ne nyǐ o/chi o-nwa o-fé busa kanong kanong, o-ju banet chwóó.

⁴⁵ Nyǐ o/chi o-bi nang biimbâng-bampyep emen ḿbé badabi ké byídí ké otyém ne otyém-baya ḿbé Medeterényan ne kaku ńké ba/bi kiǐtí-kyise-kyifen-Osówo echi. Nké nyǐ o/chi o-kpú, onet oo*chi mú oda ǎ echwáp*.