Dányel 10 - Bokyi Bible

Burê ḿbú Dányel o/ri ké Bukô-Kace ńké Tágiris

¹ Ké aje achât nyí Otu Sárus oo/rí wǎ otu mú Pésha, Osówo o/sét Dányel kyitwóm. Kyitwóm ánkyi kyi/mû ntûntû. [Nké kyi/mû kyi-sóng ng kyikû enyît.] Ba/sét ǎ kyikû-kyitwóm ánkyi ké burê.

² Ké nkéré ámu, me m/mû n-ta ng dyikán ké byipyán byichât.

³ Me n*da/ryí byiryíng ḿbyí byinong* nang enyam* n-jwáp nang bato* n-sáp nang eji ejí* tete byipyán ámbyi byichât byi-shwôm.

⁴ Ké ací bujam ne anyii nyí ké mbwôp kashú-otukáku, me m/mû m-bwom m ké bukô ḿbú kiǐtí-kace ńké Tágiris.

⁵ Me m/bírî achi kyíbóng n-ri onet obónge mú o/mû o/fé byídí-okpówo ne emâp nyí ba/chi ké gûl.

⁶ Byiko emen byi/mû byi-san n wǎ byibwáng. Bushú emen bu/mû ragerage wǎ kasabang ńké kadakédê, ne achi emen a/mû a-mang ng wǎ okwâ. Abwô emen ne byiká emen byi/mû wǎ biǐré-borôn ḿbyí baa/shí, ne ejá emen e/raa wǎ kyicoge ńkyí bujê-banet.

⁷ Me kǎnchí nké n/ri chwǒm-akat ánkyi. Ḿbé banyinchéng ḿbé ba/mû ne me ba*da/ri chwǒm*. Nké bushî bu/róng kámbé ba-chêe ba-da-rem.

⁸ Me n/waa ányi kǎnchí n-tún n kiinkaa-byiko-chwǒm-akat ńkyín. Busa bu/man mě kángkáng ne bushú ejí bu/yángê kanong kanong ḿbú onet nang obónge o/mû oo*cêe mě to*.

⁹ Ké nkéré me n/jwo ejá emen, me m/myii kyísí n-jwâa ne bushú kyísí.

¹⁰ Ne bubwô kâng bu-níbî mě bu-bêem mě m-bwom abwô kyísí ne arông to kyísí. Me m/mû n/tôong n-tím m banê.

¹¹ Orím mú onong ámu o-raa ne me o/fu, Dányel, wo amu a-jê ng Osówo. Bûu nensang a-fwôo atông a-jwo kanong kanong ńkyí me mu m-bâ ǒ esét. Baa/twóm mě ba/fu, me mbâ n-kâm ǒ. Ké nkéré oo/raa ńkyín, me m/bûu nensang ne banê ḿbé n/tôong n-tím m.

¹² Ne nyǐ o-raa kâng o/fu, *dashî* ǎ Dányel*. Osówo oo/jwo nshwam eyên kyi-fím ké mbwôp kashú-dyicí ńdyí wo a/bángê a/fu, wo a-tî ng byiko eyên kyísí eringe nyí wo adajá bubong. Me mm/bê ké bubwô-nshwam eyên.

¹³ Orím-mbâm mú oshê mú Pésha o/bwom bunwa ne me ké ací bujam ne din. Ne Mákel kâng mú mu otu-dyishí-barím ḿbé banong obónge o-bâ mě echwáp, ké nǎ, baa/mîng mě ányi kǎnchí ké Pésha.

¹⁴ Me m/bê ǒ ebachi a-nyît dyishí-chwǒm ńkyí kyi/chi kyi-chi banet eyên ké nkéré mú mu o-bâ ké kashú. Nyín ányi burê kyi-kim ne nkéré mú mu o-bâ ké kashú.

¹⁵ Ké nkéré nyǐ o/fu ńkyín, me n/tún achi kyísí, n*da/man efaa ojá*.

¹⁶ Ne orím mú onong kâng mú o/mû o-rángê e wǎ onet o-tan bubwô emen o-ta ké byibî-ocím ejí. Me n-raa ne nyǐ n/fu, bonchí, chwǒm-akat ńkyí n/ri něen nkyi kyi-chi i busa ejí bu-man kanong kanong ḿbú mm*man emîng banê etím*.

¹⁷ Me mu wǎ ósóng mú mu cip ké bushú ḿbú bonchí emen. Me n-cen n nǎ ne n-raa ne wo. Me n*fí to ne busa* nang kiǐnjáng kyi*fí mě to*.

¹⁸ Nyǐ o/chî mě eníbî, ne n-chîfiri ne busa.

¹⁹ Nyǐ o/raa o/fu, wo amu a-jê ng Osówo. Ké bubwô ámbu, *damîng chwǒm nang kyibónge kyi-kédê ǒ ofong* kyi-fé ǒ nang bushî*. Ké nkéré nyǐ o/raa ńkyín, busa bu/bwa bu-nung mě onǔng bu-shwôm, ne n-raa n/fu, bonchí, sét mě ńkyí ada mě esét. Wo aa/chi mě n-firi kanong.

^20-21 Nyǐ o-raa o/fu, wo amu a-nyît ng chwǒm ńkyí kyi/chi ne m-bâ n-kâm ǒ dí. Me m/bê eringe nyí me nda ǒ esét ńkyí ba/sáng ké Nwet mú Osówo o/sáng Byěm ḿbyí byidachi Ntûntû. Kántîk, me m-bwa ng esim n-da-nwa ne orím-mbâm mú Pésha. Ké nkéré ńkyí ányi kii/shwôm, orím-mbâm mú Girîs o/chi o-byí. Onet o*fí mú oda mě echwáp* kyi-cibi ne Mákel mú [orím-mbâm] mú Ézerel*.