Dányel 1 - Bokyi Bible

Byisat ḿbyí mbyi ké Kyibám-Otu Nébúkanéza

¹ Ké nkéré kyi/byí aje achât nyí Otu Jehóyákim o/mû otu mú Júda, Otu Nébúkanéza mú Bábyílon o/wâng oshê-Jerúsélem o-kye kámú bunwa.

² Óburúkpâbí o/mîng ǎ o-kám Otu Jehóyákim o-bam byěm-kiǐtí-kyise-kyifen-Osówo echi byikíri o-koo. Nyǐ o/yip banet ḿbé o/kám o-dim ne mbé wǎ básóng ké kyise-kyifen echi ńkyí erím-bakye emen ké Bábyílon, ne o/fé byěm ḿbyí o/bam o-koo ké banfût ḿbé byěm etî, ḿbé kyise-kyifen echi ánkyi.

³ Otu Nébúkanéza o-kye Ashípenaz mú onet-dyishí-bǎmkpóngé emen busa o/fu, ocá byisat byikíri ḿbyí byi/fím ké kyikû-butu ne ḿbé ba/fím ké byikû-biǐtí-banet ké burwám-banet-Ézerel ḿbé ba/kúng kámbé wǎ básóng.

⁴ O/fu, mbé ba-man ba-nwa bunong, ba-kyú ne bubong ne banet ḿbé baa/kwâa byěm kanong kanong ne ḿbé mbe ba-kwáng ng ké byěm ekwâa ne ba*dachi ba-kyú ne kyinêm ké enyam-byiko* eringe nyí mbé badakwárê mú badachi bǎmkpóngé ké kyibám-otu. O/sét to o/fu, Ashípenaz otángê kámbé eringe nyí badakó ne eringe nyí badasáng ejá-Bábyílon.

⁵ O-sét to o/fu, bakye kámbé dyizong-byiryíng byibónge ne dyizong-bato babónge kángkáng dyicí wǎ eringe mbe ba-kyâ banet ḿbé kyibám-otu. O/fu, babwom ké bushú emen ké nkéré mbé baa/kwâa byěm ḿbyín ké aje achât.

⁶ Dányel ne Hanánya ne Myíshal ne Azaryâ ba/mû ké burwám-banet ḿbé ba/cá kámbé. Mbé kángkáng ba/fím ké kyikû-banet ńkyí Júda.

⁷ Onet-dyishí-bǎmkpóngé o/fé kámbé azîn nyí ejá-Bábyílon něen, Betesháza ne Shádárak ne Méshak ne Abédenego.

⁸ Dányel o-tî ké dyityém emen o/fu, nyǐ oo*mîng byiko emen byi-bên ké bushú ḿbú Osówo* ké byiryíng eryí ne bato ejwáp ké kyibám-otu*. Ké bubwô ámbu, nyǐ o/bí Ashípenaz o/fu, ochwáp ǎ.

⁹ Ne Osówo o/chi Ashípenaz byiko byi-kpú ǎ ne Dányel.

¹⁰ Nké Ashípenaz o/mû o-shî ng otu. Ké bubwô ámbu, nyǐ o/sét Dányel o/fu, otu oo/sét ńkyí wo adaryí ne ńkyí adajwáp ne â a*fí nyangenyange ké byiko wǎ byisat ḿbyí áku* nyǐ o/chi o-ju mě.

¹¹ Ké bubwô ámbu, Dányel o/dim o-kâm onet-mbâm mú Ashípenaz o/tî o/fu, okûbám Dányel ne bacín emen ashí achât.

¹² O-raa o/fu, kan bě ké ací diǐkpú. Kye bě byiryíng ḿbyí badaryí ne omu mú badajwáp.

¹³ A-kúng bě kâng a-kan ne byisat ḿbyí mbyi byi-ryí i byiryíng ḿbyí kyibám-otu, ne a-sét eringe nyí be byimu.

¹⁴ Onet-mbâm ámu o-bángê o/fu, nyǐ o-mîng ng kámbé ba-kan ké ací diǐkpú.

¹⁵ Ké nkéré ací ányi aa/man, mbé ba/mû ba-rángê e nyangenyange ne shwaneshwane ké byiko ba-shwôm kángkáng ḿbé mbe ba-ryí i byiryíng-otu.

¹⁶ Ké bubwô ámbu, kyi-fím ké nkéré ámu kyi-ca kashú, onet-mbâm ámu o/mîng kámbé ba-kûryí esang-byichí ba-mîng ḿbyí otu o/kye.

¹⁷ Osówo o/kye byisat ámbyi ashí anyii byinyídíng ne busa ké byěm enyît ḿbyí ba/sáng kyísí ne ḿbyí bubong. Ne o/nye o-kye Dányel busa ḿbú odaman esét eringe barê eri ba/byí.

¹⁸ Ké nkéré aje achât nyí otu o/tî aa/man, Ashípenaz o/kúng byisat ámbyi kángkáng byi-kâm Otu Nébúkanéza.

¹⁹ Otu o/raa ne mbé kángkáng. Dányel ne Hanánya ne Myíshal ne Azaryâ ba/chi kyi-nyîn otu ba-shwôm nang yeě ké burwám-banet ḿbé áku. Ké bubwô ámbu, mbé ba-firi banet-kyibám-otu.

²⁰ Ḿbím nang orá mú otu o/bí, ne nang ebóng kyiraa ńkyí otu o/bê ne nkyí, banyinchéng ḿbén ashí anyii ba/mû ba-nyît ng kampén bujam ba-shwôm nang nsô epé orá ne nang onet-bambirirím orá ké kyikim-oshê kyimúmú.

²¹ Dányel o/waa ké kyibám-otu tete Otu Sárus mú Pésha o-kpógê Bábyílon.