Azáya 8 - Bokyi Bible

Wǎn mú Azáya o/chi o-bwom Banet wǎ Ekap

¹ Óburúkpâbí o/raa ne Azáya o/fu, kúng kiǐbáá-nwet ńkyí kyiryên a-sáng byiraa ḿbyín ne [basáng ḿbé baryên] a/fu, oshê ekpógê babap ba-bên n kámú ochéé óchee.

² Kúng banyinchéng ashí afee ḿbé a/fé dyityém ne mbé, nchi kyifen-Osówo mú odabángê Oryâ ne Zákaryâ mú wǎn-Jeberékya ba-bwom ǒ wǎ ntûesé.

³ Ké nkéré mú ńkyín kii/shwôm, onyi-Azáya o-koo dyifít. Ké nkéré mú ba/fwon wǎn-onyinchéng ámu, Óburúkpâbí o/raa ne Azáya o/fu, fé wǎn ámu dyizîn ńdyí badakó Oshê ekpógê Babap ba-bên n Kámú Ochéé Óchee.

⁴ Ne wǎn ámu o-kán mú odakûman ekó boné ne bonchí, otu mú Asyírya o/chi o-wuri kángkáng esang nyí ké Damásákus ne kángkáng byěm ḿbyí ba/wuri ké byití ké Samérya o-jâ ne mbyí.

Otu mú Asyírya mu o-bâ

⁵ Óburúkpâbí o/chîraa ne Azáya

⁶ o/fu, ké nǎ, banet ḿbén baa/né omu mú odasen degere, mú kace ńké ké Shílo, ba-tím banê ké bushú ḿbú Otu Rézen ne Otu Péka,

⁷ me Óburúkpâbí n/chi m-bâ ne otu mú Asyírya ne kángkáng basúja emen o-ba-nwa ne Júda. Ba/chi ba-bâ wǎ omu mú kace ńké badakó Yuférétyis ké nkéré kaa/sú ka-pám.

⁸ Ba/chi ba-wuri kángkáng byěm ké Júda wǎ kace ńké kadasú ka-byí onet ké kyitông. [Osówo mu ne be. Abyibabang emen nyí o/paam nyi a-ku ng esí.]

⁹ Ben eshê, cibi n̂g kyikit kyibónge ké bushî. Ben byikit-ejíí ḿbyí mbyi tíbítíbí, fwôo n̂g atông ba-jwo. Kpá n̂g byiko ḿbyí badanwa bunwa, nké kyú n̂g ne bushî.

¹⁰ Kabe n̂g eringe nyí ba/chi ba-chi, nké ńkyí ba/chi ba-kabe éné kii*byí běn dyishí*. Raa n̂g eringe nyí kyi/nyîn běn, nké kyiraa ánkyi kyi*da/byí chwǒm* ké nǎ, Osówo mu ne be.

Osówo o/kuri Azáya Ekó

¹¹ Ne kiǐtí-busa emen Óburúkpâbí o/kuri Azáya ekó o/fu, o*dachi o-cen ké kiǐfáng ńkyí banet mbe ba-cen n*. O/raa o/fu,

¹² *dachi a-kyú ne abwô ké byěm ḿbyí banet mbe ba-chi i* ne *dachi a-shî byěm ḿbyí mbé mbe ba-shî ng*.

¹³ Zîim a/fu, me Óburúkpâbí mú o/rêe o-shwôm mu kanong. Me nké ben badaman ba-shî.

¹⁴ Ké bubwô ḿbú kanong ejí ńké kadachi bushî, me mu wǎ buká ḿbú banet mbe ba-kpán n ácíring ké mbú. Me mu wǎ kaǎtám ńké ka/chi ka-kám banet ḿbé batu ḿbé Júda ne Ézerel ne banet ḿbé Jerúsélem.

¹⁵ Banet chwóó ba/chi ba-kpán. Ba/chi ba-myii ba-kpú. Kaǎtám ka/chi ka-kám kámbé.

Ekó ekuri kyi-kim ne Bapem epem ne Bakúsí

¹⁶ Ben bǎmgbán ejí ba-man ba-bám, ba-tî kyitwóm ńkyí Osówo o/kye mě.

¹⁷ Óburúkpâbí oo/rôo byiko o/fu, banet emen ba*da ǎ eri* nké me n/fé dyityém ne nyǐ, n-tî okabe ejí ne nyǐ.

¹⁸ Me mu nyín ne bwǎn ḿbé Óburúkpâbí o/kye mě. Óburúkpâbí mú o/rêe o-shwôm, mú kakyúng-butu emen nke ké kaku ńké Záyon o/fu, akpen eten abwom banet ḿbé Ézerel wǎ ekap.

¹⁹ Nké banet ba/chi ba-sét běn ba/fu, ben bakûbí byiraa ne bansô epé ne banet-ekpábé, ḿbé badaraa ba-rime e ké kyitông. Mbé ba/chi ba-raa ba/fu, nang kyi/bwa kyi-chi nǎ, banet babí bakye ebe ne bakúsí byiraa ké bubwô ḿbú banet ḿbé mbe bakpó. [

²⁰ Ben ba-man ba-faa kámbé ejá ba/fu, fwôo n̂g atông ba-jwo ńkyí Óburúkpâbí mu o-tángê e běn. *Da n̂g ejwo bansô epé* ké nǎ, ńkyí mbe ba-sét ng běn kii*ba/chi kyi-chwáp běn*.]

Nkéré mú Afaníkong

²¹ Banet ámbe ba/chi ba-yêe ké esí, asa a-jwâa kámbé, esong e-nwa kámbé. Ké esong ne kafâ esa ebe, ba/chi ba-shú otu ebe ne Osówo ebe. Ba-man n etún achi kyíbóng

²² ne kyísí, nké baa*ba/chi ba-ri chwǒm* kyi-cibi ne afaníkong ne kyifip*. Kyifip ńkyí kyidachi bushî, ńkyí mbe ba-ró ng kámbé ba-fé ké nkyí.