Azáya 60 - Bokyi Bible

Busan ḿbú Ragerage ḿbú Jerúsélem, ḿbú Nkéré mú mu o-bâ ké Kashú

¹ Bûu, ǎ Jerúsélem, a-san wǎ óbyísû. Busan ḿbú Óburúkpâbí ḿbú ragerage mbu bu-san n ǒ ké byiko.

² Kyifip kyi/chi kyi-cít eshê nyí ee*nyît Óburúkpâbí*. Nké wo, kiinwángé ńkyí Óburúkpâbí kyi/chi kyi-san ǒ ké byiko. Busan emen ḿbú ragerage bu/chi bu-kyú ne wo.

³ Eshê ányi e/chi e-kûbê ké kiinwángé eyên, batu to ba-kûbê ké dyicí eyên ńdyí dyidacé.

⁴ Tún achi ké byiko eyên a-ri ńkyí nkyi kyi-chi i. Banet eyên ba-kú ba-kpá ng byiko ḿbyí badafyi. Bwǎn eyên ḿbé banyinchéng ba/chi ba-fím tíbítíbí ba-fyi. Ba/chi ba-yip bwǎn-banyinyi eyên wǎ boǒbwásíng.

⁵ Wo a/chi a-ri ńkyín a-jêe. Wo a/chi a-kûjêe, a-tím m banê. Ba/chi ba-yip esang nyí ké eshê nyí ee*nyît Óburúkpâbí* ba-bâ ǒ ne nyǐ. Esang ebe e/chi e-nyáng baya ḿbé baryên e-bâ.

⁶ Banet ba/chi ba-fím Médyan ne Éfa ne boonyam-atû chwóó ba-bâ. Ba/chi ba-fím Shéba ba-bâ ne gûl ne burwan. Banet ba/chi ba-sét bǎmpém ḿbé banong kyi-kim ne ńkyí Óburúkpâbí oo/chi.

⁷ Ba/chi ba-bâ ǒ ne kángkáng etyítǎm nyí Kéda ne Nebáyot nyí ba/chi ba-ba-chi byifen ké kyikit-kyifen echi eringe nyí kyidanyîn Óburúkpâbí. Óburúkpâbí o/chi o-chi kiǐtí-kyise-kyifen emen echi kyi-kyú ne ofê.

⁸ Nyín ebóng bǎnsukyíkang ḿbé mbe ba-cen n ba-bâ wǎ éfíbí, wǎ bunurung ḿbú bu-kú bu-bwa ng esim dyijê.

⁹ Ba-chi i bǎnsukyíkang ḿbé ba/fím eshê nyí tíbítíbí, ḿbé mbe ba-fyi ng ne banet-Osówo. Mbé mbe ba-bâ to ne gûl ne syílyíba ba-ba-kye dyizîn ńdyí Osówo Óburúkpâbí mú onong mú Ézerel ofê, mú oo/chi kángkáng eshê e-kye banet emen ofê.

¹⁰ Óburúkpâbí o/raa ne Jerúsélem o/fu, bacinbánet ba/chi ba-bwât ekpe nyí e/wáp ǒ e-fé ké kafâ ba-bi, ne batu ebe ba/chi ba-kyú bǎmgbán eyên. Me n/kye ǒ busông ké kiikuku. Nké kántîk, n-tông ǒ kanong ejí, n-ri ǒ bafip.

¹¹ Afyi eyên a/chi a-waa fúú buchú ne esû eringe nyí batu ḿbé eshê nyí ee*nyît Óburúkpâbí* ba/chi ba-bâ ǒ ne esang ebe.

¹² Nké eshê nyí e*da ǒ ekye ofê* ba/chi ba-bên kányí kángkáng.

¹³ Ba/chi ba-bâ ne byichí ḿbyí byi/nwa byi-shwôm ké byizinge ḿbyí Lebánon ba-ba-bwât ǒ ba-bi, ǎ Jerúsélem, ba-chi kiǐtí-kyise-kyifen ejí echi kyi-nwa, ba-chi oshê ejí o-firi ne kiǐtí-ofê.

¹⁴ Bwǎn-banyinchéng ḿbé banet ḿbé ba/mû ba-kyâ běn busông ba/chi ba-bâ ba-ba-tíngê kyísí ba-kye ǒ ofê ebe. Kángkáng banet ḿbé ba/mû ba/ciring ǒ ba/chi ba-bwom ǒ ké byiká ba-fé ǒ. Ba/chi ba-kó ǒ oshê mú Óburúkpâbí, ba-kó ǒ Záyon mú mu oshê mú Osówo mú onong mú Ézerel.

¹⁵ Wo aa*ba/chi a-chîsa banet kafâ* ba-né ǒ*. Aa*kyú to oshê mú baa/dim ba-mîng kámú*. Me n/chi n-chi ǒ a-kûnwa, a-firi kiǐtí, ne kyikit ńkyí bunyîn-dyityém ḿbú ne banyá ne banyá.

¹⁶ Eshê nyí ee*nyît Óburúkpâbí* ne batu ebe ba/chi ba-tún ǒ wǎ eringe nyí boné odakye wǎn emen abî. Wo a/chi a-nyît a/fu, me Óburúkpâbí nn/nyii ǒ. A-nyît to a/fu, Osówo mú kiǐtí mú Ézerel nké mu o-chi i běn ba-firi ké byiko enen.

¹⁷ Ńkyí m/mû n/chi m-bâ ǒ ne borôn, n/chi m-bâ ǒ ne gûl, ne ńkyí m/mû n/chi m-bâ ne biǐré ne byichí, n/chi m-bâ ǒ ne syílyíba ne borôn, ne ńkyí m/mû n/chi m-bâ ǒ ne aká, n/chi m-bâ ǒ ne biǐré. Batu eyên baa*cít ǒ to*. N/chi n-chi kámbé ba-tún ǒ ké bukwóp ḿbú acît a*fí* ne ne bunyîn-dyityém.

¹⁸ Banet baa*jwo to ejá nyí bunwa*. Chwǒm kii*bên to oshê eyên*. Me n/chi n-ku ǒ ké afaníkong, m-bwom ǒ ké esim wǎ ekpe-kyise. Wo a/chi a-kpee mě, ké nǎ, me nn/nyii ǒ.

¹⁹ Esû ee*kyú to kiinwángé eyên ńkyí esû* nang otukáku oo*kyú to kiinwángé eyên ńkyí buchú*. Me Óburúkpâbí n/chi n-kyú kiinwángé eyên ńkyí ne banyá. Kiinwángé ńkyí busan ejí ḿbú ragerage kyi/chi kyi-san ǒ ké byiko.

²⁰ Ací eyên nyí bafip a/chi a-man. Me Óburúkpâbí n/chi n-kyú kiinwángé eyên ńkyí ne banyá, ńkyí kyi/chi kyi-rí kyi-shwôm óbyísû ne otukáku.

²¹ Banet eyên kángkáng ba/chi ba-chi ńkyí nkyi kanong, ne esí nyí n/ryí kámbé ocím e/chi e-já kámbé ne banyá. Me nké n/kwón kámbé wǎ osu-kyichí, n-chi kámbé n/fu, batông kángkáng banet eringe nyí me mu kiǐtí.

²² Nang kyikû-banet eyên ńkyí kyi*da/jê* kyi/chi kyi-firi wǎ oshê mú mu ne busa. Ké nkéré mú ochíchí-nkéré oo/fyi, me n/chi n-chi ńkyín kyi-chi babap. Me n-chi i Óburúkpâbí.