Azáya 57 - Bokyi Bible

Óburúkpâbí o/bîn Ézerel ké Bakye ḿbé mbe ba-sháng ng

¹ Banet ḿbé banong mbe ba-kpú u, onet o*fí mú mu o-nyît ng kyikû* o-kérê ng nang okére*. Nké â ba/kpú kyibî-chwǒm kii*ta kámbé*.

² Banet ḿbé mbe ba-kyú u akpen nyí anong ba-jáng ng, ba-kyú ké bunyîn-dyityém ké nkéré baa/kpú.

³ Ben banchi byibî, bâ n̂g nyín ba-pan běn mpan. Ben ba*da/cángê ba-shwôm bansô epé* ne banchi byinam* ne banryî akpara*.

⁴ Ben bamu ba-jwó ng yeě. Ben bansêt byisédéng bamu ba-fát ng yeě kiikuku.

⁵ Ben bamu ba-fâ esówo nyí ba/fu, e-kyâ bufwon, ba-rí i ne banyinyi ké byikû-byichí-ociring enen. Bamu ba-yip ng bwǎn enen ba-chi i byifen ké bacim ḿbé ba/fárâng ne kace.

⁶ Bamu ba-kúng ng aká nyí gogégogé ké kace ánke ba-fâ kányí wǎ esówo. Bamu ba-pwó ng bato ké nyǐ ḿbé kyifen echi, ba-kyâ kányí byiryíng. Ben ba/kabe ba/fu, nkyi kyi-nyîn n mě ne kángkáng byěm ḿbyín?

⁷ Ben bamu ba-câ ké eku nyí nyáám ba-da ng echi byifen, ba-rí i ne banyinyi.

⁸ Bamu ba-yip ng banunut-erím-bakye enen ba-kpong ng ké ecím-afyi enen. Bamu ba-né ng mě. Bamu ba-pii ng byídí enen ba-yú u ké biimbâng-buríng enen ne bákyî enen ḿbé bamu ba-kyâ kámbé akpuga ba-rí i ne mbé. Ányi nké bamu ba-chee ng kyijé-babép enen.

⁹ Bamu ba-sabe ng bakút-kyinung enen ba-dim m ba-da ng efé osówo mú badakó Mólok. Bamu ba-twóm m banet ba-ca tíbítíbí tete ba-ribi nang ké oshê-bakúsí ba-da-kyé běn esówo nyí badafé.

¹⁰ Ben baa/kyee ké byiko ké esówo ekíri nyí bamu ba-kyé ng, nké ba*fí ba-mîng ng*. Bamu ba-kabe ng ba/fu, banunut-erím-bakye enen nyi e-kyâ běn busa, ne ké bubwô ámbu, ba*fí ba-kyee ng*.

¹¹ Óburúkpâbí mu o-bí ng o/fu, esówo erá nyi e-chi i běn ba-shî ng, e-chi i běn ba-sét ng mě byisédéng, ba-ráp ng mě kángkáng. Ben baa/mîng mě ofê ekye, ké nǎ, kaa/bwon ńké me n*da/chîfaa ne ojá*?

¹² Ben bamu ba-kabe ng ba/fu, ńkyí bamu ba-chi i nkyi kanong, nké n/chi n-fîm édúú enen n-tî wááng, ne erím-bakye enen ee*ba/chi e-man běn echwáp*.

¹³ Â ba/tii ba/fu, bachwáp běn, erím-bakye enen enyii běn. Kaǎnyín-bufú ka-man n etugi kányí ka-pwó. Nké banet ḿbé ba/fé dyityém ne me ba/chi ba-kyú ké esí ńnyín, ne ba/chi ba-fé mě ké kiǐtí-kyise-kyifen ejí echi.

Osówo o/ryí Ocím o/fu, Nyǐ o-chwáp ng Banet Emen

¹⁴ Óburúkpâbí o/raa o/fu, mîng n̂g banet ejí ba-bwa esim ba-kâm mě. Fîm m̂ nang ebóng chwǒm ńkyí kyi/chi kyi-ku kámbé ké bukwóp. Rim m̂ bukwóp, ba-chi kámbú bu-nwa.

¹⁵ Me n-chi i Osówo mú mu nyáám ne mú mu onong, mú mu o-kpen n ne banyá. Me mu n-kyú u ké kyikit ńkyí nkyi nyáám ne ńkyí nkyi kanong, nké me mu n-kyú u to ne banet ḿbé mbe ba-kúng ng byiko ebe kyísí ne ḿbé byiko mbyi byi-kpú u kámbé ké byibî ebe, eringe nyí me ndaman efé kámbé dyityém ne busa. [

¹⁶ Me n/kye banet ejí dyikpen, ne mm*ba/chi n-chîbîn kámbé* n-chîsa nang kafâ ne mbé n-ca kashú ne banyá*.]

¹⁷ Me m/mû n-sa ng kafâ ne mbé ké bubwô ḿbú byibî ebe ne byěm ebe eshwam, ne ké bubwô ámbu, n/kye kámbé busông, m-mîng kámbé. Nké mbé ba/mû ba-shwane e ashí ba-chi i ńkyí kyi/nyîn kámbé ba-câ.

¹⁸ Me nn/ri eringe nyí ba/chi, nké n/chi n-chi kámbé ba-nyange. N/chi n-tông kámbé kiǐfáng, n-nyángê kámbé, ne n/chi n-fé banet ḿbé mbe ba-ta ng dyikán dyityém.

¹⁹ Me mu n-kyâ kángkáng banet bunyîn-dyityém, ḿbé mbe jwángjwáng ne ḿbé tíbítíbí. N/chi n-chi banet ejí ba-nyange.

²⁰ Nké byibî-banet mbyi wǎ baya ḿbé baryên ḿbé badanáng onâng ónang, ḿbé omu emen oo*mîng enáng* o-kpaa ng biǐbyém ne biǐntóng*.

²¹ Óburúkpâbí o/fu, bunyîn-dyityém bu*fí ne banchi byibî*.