Azáya 52 - Bokyi Bible

Osówo o/chi o-nyii Jerúsélem

¹ Jerúsélem, chîkyú kiǐtí ne shwaneshwane. Oshê mú onong mú o/já Osówo, cít byiko eyên ne bunong. Banet ḿbé ba/bángê ké bakye esháng baa*ba/chi ba-chînung ké afyi eyên*.

² Pâ byiko eyên, ǎ Jerúsélem. Bûu ké édúkǎndú a-kyú ké kakyúng-butu eyên. Ben banet ḿbé Záyon ḿbé ba/kám běn, két n̂g bamgbokobá ḿbé ba/fé běn.

³ Óburúkpâbí o/sét banet emen o/fu, onet o*fí mú o/kye akpuga ké dyishí enen* ké nkéré ba/firi básóng*. Ké bukwóp ámbu bubónge, chwǒm kyi*fí ńkyí ba/chi ba-kye ne ba-zú běn abwô*.

⁴ Ké nkéré ben ba/dim ba/fu, ba-da ng ekyú ké Éjip wǎ bacinbánet, ben ba/dim ké byiko enen. Banet ḿbé Asyírya kâng ba/kám běn ké busa, nang chwǒm ba*da/kye ké dyishí enen*.

⁵ Kántîk, dyizong-chwǒm ándyi nké dii/chîchi ké Bábyílon. Ben ba/firi básóng, nang chwǒm ké dyishí enen ba*da/kye*. Banet ḿbé bamu ké abwô ebe mbe ba-tông ng byiko, ba-kyâ mě edángé kángkáng nkéré.

⁶ Ké nkéré mú mu o-bâ, ben ba/chi ba-nyît ba/fu, me n-chi i Osówo ne nn/sét běn byěm.

⁷ Kyi-chi i chwǒm-bunyîn-dyityém ńkyí adari onet-kyitwóm ké mu o-nyáng ng eku o-bâ, o-bâ ne bǎmpém ḿbé banong, bǎmpém ḿbé bunyîn-dyityém. Onet-kyitwóm ámu mu o-sét ng dyikpóge ńdyí baa/kpógê. O-sét ng Záyon o/fu, Osówo enen o-chi i Otu.

⁸ Banet ḿbé mbe ba-bám m oshê mbe ba-wonge e, ba-wonge e ne barî ké bunyîn-dyityém. Mbé ba-man n ekúng achi ebe ba-ri eringe nyí Óburúkpâbí oo/bwa esim o-kâm Záyon.

⁹ Ben biǐbwô-byise ḿbyí Jerúsélem, kû n̂g ewonge dyiwonge ńdyí bunyîn-dyityém. Óburúkpâbí o/chi o-nyii oshê emen o-koo, o-fé banet emen dyityém.

¹⁰ Óburúkpâbí o/chi o-tông busa emen ḿbú bunong. O/chi o-nyii banet emen, ne ejíí emúmú e/chi e-ri.

¹¹ Ben kángkáng ḿbé bamu ba-níbî ng byěm ḿbyí kiǐtí-kyise-kyifen-Osówo echi, dim m̂ ké Bábyílon. *Da n̂g echi ba-ta chwǒm-ociring nang kyibónge*. Tî n̂g byiko enen kpárám, ba-dim.

¹² Mpéne mún, baa*ba/chi ba-chîdim ké ochéé*. Baa*kan ba/fu, ba-chêe ng ochéng*. Óburúkpâbí mú mu Osówo eyên o/chi o-tông běn kiǐfáng, o-ku běn byicê byimúmú ké afaníkong.

Ḿgbán mú mu o-ri ng Busông

¹³ Óburúkpâbí o/raa o/fu, ḿgbán ejí o/chi o-chi bǎmkpóngé emen ba-man. [Ba/chi ba-kye ǎ kiǐtí-ofê.]

¹⁴ Kyi/chi bujê-banet chwǒm-byiko eziri ké nkéré mú ba/ri ǎ. Enyam-byiko emen e/mû ee/yángê, e*fí to wǎ nyí onet*.

¹⁵ Nké kántîk, kyi/chi kyi-chi eshê chwóó wǎ chwǒm-akat kyi-kim ne nyǐ. Ne batu ba/chi ba-waa ocím ké dyishí fúú baa*man to efaa ojá*. Ba/chi ba-ri, ba-nyît chwǒm ńkyí mbé ba/mû ba*da/nyît ne*.